| كانيلوني باللحم Beef Cannelloni |

.

.

أهلاً يا أصدقاء .

اليوم بحط لكم وصفة الكانيلوني المحشية باللحم المفروم ..

هالوصفة لذيذة جداً إذا سويتوها بتعتمدونها ؛)

| المقادير والطريقة | :

أول شي نحمس بصله كبيرة مقطعة مكعبات صغيرة مع فص ثوم مفروم وزيت .. ونخليه لما يذبل .

على ما يذبل في قدر ثاني نحط نصف كيلو لحم المفروم على نار عالية بدون زيت أو أي شي لما يبدا يتغير لونه نضيفه على البصل ونحمسهم مع بعض .

بعدين نضيف بهارات مشكلة وفلفل أسود وملح .

بالخلاط نحط :

- حبتين طماط كبار مقشرين ومقطعين  أو إذا عندكم علبة طماط ايطالي فهو يفي بالغرض .

- ربع حبة فلفل أخضر بارد 

- شوي كزبرة طازجة 

- ملعقتين طعام معجون طماط 

- مكعبين ماجي أو بديل الماجي 

نخلطهم بالخلاط ونضيفهم على اللحم المفروم ونقلبه ونخليه لما يتسبك ..

بعدين نحشي الكانيلوني بالحشوة أنا استخدمت النوع اللي ما يحتاج سلق قبل الحشو .

الحين بالخلاط نحط هالمقادير :

- علبة كريمة خفق 200 مل 

- علبة قشطة

- 3 ملاعق جبن سائل 

ونصب شوي من هالخلطة بصينية الفرن ونصف الكانيلوني المحشية بعدين نصب باقي الخلطة عليها لما تغطيها ..

ونغطي الصينية بقصدير وندخلها فرن مشغل مسبقاً على درجة حرارة 350 ..

بعد ماتستوي نحط عليها موزريلا ونحمرها ونقدمها ..

| كيكة الحليب : tres leches cake |

كيكة الحليب | tres leches cake

عبارة عن كيكة اسفنجية نسقيها بـ 3 أنواع من الحليب ..

هنا حبيت أسويها بنكهة الزعفران و موية الورد عشان تكون نكهة رمضانية ..

المقادير :

للكيك الإسفنجي :

- اصبع زبدة بدرجة حرارة الغرفة

- ٥ بيضات بدرجة حرارة الغرفة

- كاس سكر

- كوب ونص طحين

- ملعقة صغيرة بيكنق باودر

- ملعقة صغيرة ڤانيلا

- شوي ملح

طريقة الكيك :

نخفق الزبدة حتى تلين 

ونضيف عليها السكر ونخفقهم بعدين نضيف البيض حبه ونخفق بعدين نضيف بيضة ثانية ونخفق وكذا لما نخلص من كمية البيض ونضيف معاهم ملعقة صغيرة فانيلا

على ما نخفق البيض ننخل الطحين والبيكنق باودر والملح وبعدين نضيفه على خليط البيض على دفعات ونخفقهم

ضروري ننخلهم عشان بتوزع الطحين والبيكنق باودر مضبوط

بعدين نصب الخليط في صينية مدهونه بزبدة

وندخلها الفرن على درجة حرارة ٣٦٠ لمدة 20 - 25 دقيقة

نتأكد من انها مستويه لما نغرز فيها سكين او عود ويطلع نظيف

على ما تستوي نسوي خليط الحليب

مقادير خلطة الحليب :

- نص كاس كريمة خفق

- نص كاس حليب سائل

- علبة حليب مبخر ( بوني / أبو قوس )

- علبة حليب مكثف محلى ( نستله )

- ملعقة ماي ورد

- زعفران منقوع في شوي حليب حار من قبل لفترة ..

نحط المكونات مع بعض ونقلبهم

لما نطلع الكيكة من الفرن على طول وهي ساخنه نسوي فيها ثقوب كثيييييرة بالشوكة 

ونسقيها ٣/٤ كمية خلطة الحليب وهي لسى ساخنه

ونخليها تبرد برا بعدين ندخلها الثلاجة ..

ملاحظة : الأفضل نخلي الكيكة في الثلاجة وقت طويل حتى تتشرب الخليط 

قبل التقديم نخفق كاس كريمة خفق ونحطها كآخر طبقة في الكيكة ..

ونقطعها ونزينها و نصب شوي من خلطة الحليب في صحون التقديم ونحط قطع الكيكة فوقها