| Baked Blueberry Custard |

.

.

من الشغلات السهله جداً بالتحضير .. ما تاخذ وقت ,

| الطريقة والمقادير مع بعض | :

أول شي نشغل الفرن على درجة حرارة 200 ونبدا نسوي شغلنا ,

ندهن صينية الفرن بزبدة ونوزع الـ Blueberry - التوت - عليها .

الحين ,

بالخلاط نحط :

- ثلث كاس حليب

- 3 بيضات كبيرة

- نص كاس سكر

- نص كاس طحين

- ربع كاس زبده ذايبه ( يعني نص اصبع زبده مذوب )

- نص ملعقة صغيره فانيلا

- ربع ملعقه صغيره ملح

نخلطهم دقايق , بعدها نصبهم شوي شوي ع التوت في الصينية .

وندخلها الفرن مدة نص ساعة تقريباً .

بعدين نرش ع الوجه سكر ونحمرها دقايق من فوق .

نطلعها برا الفرن ونخليها تبرد .. نص ساعة تقريباً .

بعدين نقطعها وممكن نحط عليها شوي سكر ونثدمها .

| زنجر بخبز التورتيا |

بصراحه حطيته لأن إنسألت عنه وطلبوا أحطه بالمدونة .

هو مو طبخة يبيلها تعب , كل شي جاهز ماعدا نوع من أنواع الصوص كنت مسويته بالبيت واللي هو honey mustard  صوص .

| المقادير والطريقة مع بعض | :

أول شي نجهز صوص الـ honey mustard :

عبارة عن عسل + خردل - يفضل خردل ديجون لكن ما كان متوفر عندي فأستخدمت العادي - + مايونيز

أنا أستخدم العسل الطبيعي أفضل .

طبعاً الكميه على حسب ذوق الشخص .. تنقص وتزيد على حسب ماتحسونه مناسب ,

أنا حطيت ملعقتين كبار من : الخردل والعسل والمايونيز .

ونخلطهم مع بعض ونخليهم على جنب

.
.

الحين نقلي الدجاج , استخدمت هذا النوع - جبت صورته من النت - .

أعجبني , أنصحكم فيه  - طبعاً هو حار -

بعد ما نقلي الدجاج نحطه في صحن عليه منديل عشان يمتص الزيت الزايد .

ونجيب خبز التورتيا ونحط عليه خس والدجاج وصوص الهني ماسترد وشوي جبن شيدر مبشور .

ونقدمه :

هنا استبدلت الهني ماسترد صوص بـ الرانش - جاهز - :

.
.

| french toast |

 

من الأطباق اللي أحبها و السهلة للفطور ,

أنا كنت أسويه بالتوست العادي .. بس لقيت أن الطريقة الأصلية المفروض يستخدم فيها خبز سميك .

فشريت french bread وجربتها فيه .

| الطريقة والمقادير مع بعض | :

أول شي نجيب نقطع البريد شرايح سميكه تقريباً .. ونخليها .

الحين نجهز المقادير اللي بنغمسه فيها .

نخفق بيضه مع حليب أو كريمة خفق .. وممكن الأثنين مع شوي فانيلا - إختياري - .

- الصورة اللي بالتوست العادي كنت مسويته مع حليب , والصورة اللي بالفرنيش بريد مسويته مع كريمه -

أنا خفقت بيضه مع شوية كريمة خفق .. أنا بصراحه ما أحط مقادير معينه .. أصب لما أوصل للقوام اللي أبيه .

مرات أخليه خفيف مرات لا .

الحين نجيب البريد ونغمسه فيه ونحطه في مقلى ع النار - بدون زيت أو زبدة - .

ونخليه يتحمر من الجهتين بس ماينحرق .

ونرش عليه سكر بودرة ونقدمه .

طبعاً ممكن تضيفون الإضافات اللي تحبون ,

هنا :

أضفت صوص الفراوله

وهنا :

 في خطوة سويتها ببعض قطع الفرينش بريد وهي إني بعد ماغمستها بخليط البيض غمستها بجوز هند مجفف ومبشور .

وعند التقديم صبيت شوي عسل .

| Scrambled eggs |

وجبة فطور سهلة جداً ولذيذة ,

بصراحه لقيت لها طريقتين بس طبقت الطريقة الأسهل .

وبشرحها لكم بالتفصيل :)

أول شي هالطبق عبارة عن بيض وزبدة وكريمة .

وممكن تضيفون عليه الإضافات اللي تحبونها عليه بالنهاية من أعشاب عطرية وغيره .

هالطبق غالباً يكون البيض فيه شبه مستوي ويتقدم بشكل شبه سائل , لكن بصراحه ما أستسيغه كذا فخليته يتسوي كامل :$ .

| الطريقة والمقادير مع بعض | :

أول شي نجيب 3 بيضات ونكسرهم ونخلطهم بالملعقه خلط بسيط جداً .

الحين نجيب المقلى ونحط فيه مقدار ملعقة كبيرة زبدة تقريباً , أول ماتذوب وتطلع فقاعات نضيف البيض ونبدى نحركه بالملعقه من الأطراف للداخل مثل كذا :

ونحرك لما يستوي - أو شبه يستوي للي يحبونه كذا -

بعدها نضيف الملح والفلفل الأسود .

ونضيف بعدها شوي من كريمة الخفق .. أنا أضفت 3 ملاعق كبيرة .

وأضفت معاها بصل أخضر مقطع وفلفل بارد مقطع شرايح صغيره .

ونقلب دقايق ونقدمه .

ملاحظات مهمه :

* الملح والفلفل ينضافون كخطوة أخيره

* كريمة الخفق تنضاف آخر شي لأنها توقف طبخ البيض لكونها تقلل من درجة الحرارة .

| تطبيقاتكم |

مثل ما وعدتكم من فتره ,

يكون في قسم لصور تطبيقاتكم .

وهذا هو فتحناه

بحط كم تطبيق هالمره مع رابط الطبخه اللي طبقوها منها .

وكل فترة بنزل مجموعة بإذن الله ..

.
.

نبدأ بأول تطبيق من ( N0o0re ) وكان لسلطة الدجاج ..

تشهي أكثر من حقتي صح :$ ؟

الطريقة :

هنا

.

.

التطبيق الثاني كان لكيكة التفاح من ( مشاعل ) ..

تطبيق أقل ما يُقال عنه : رائع .

الطريقة :

هنا

.
.

تسلم يدكم بنات والله يعطيكم العافيه يارب ..

فرحتوني مره بهالتطبيقات

+ باقي صور تطبيقات كثير , لكن خلوها حبة حبة :$

.

.

| محشي الكوسا |

.

.

من الأكلات اللي أحبها ..

حطيت الطريقة بالتفصيل بس للأسف من غير صور , لأن أمي اللي سوته وما كنت موجوده بالمطبخ :(

المره الجايه إذا سويته بصور الخطوات إن شاء الله .

| الطريقه والمقادير مع بعض | :

أول شي نجيب الكوسا ,

ونحكها شوي بالسكين من برا .. مانقشرها .!

بعدين نقطعها من الراس - ونحتفظ فيه - ونفرغها لين نوصل للقاع  تقريباً.

الحين نسوي الحشوه .

عباره عن :

كاس ونص رز مصري منقوع في ماء لمدة ساعه .

بيالة زيت زيتون .
شوية نعناع مفروم
حزمة بقدونس مفرومه
3 طماطات مقطعه قطع صغيره مره .
بصله مفرومه 

فلفل اسود
مكعبين ماجي - نفرمهم عشان نخلطون مع باقي المقادير -
عصير ليمونتين - أو ليمونه ونص إن كان عصيرها كثير - .

نقلب هالمقادير مع بعض ونحشي فيهم الكوسا ونحاول نضغط الحشو بداخل الكوسا واحنا نحشي عشان مايطلع لبرا بعدين .

الحين نجيب راس الكوسا اللي قطعناه ونحاول نقطع منه جزء لين يصير حجم الراس يمديه يدخل في الفتحه عشان نغطي الكوسا فيه  ومايطلع الحشو منها .

الحين نسوي الصلصه :

في قدر كبير  نحمس في الزيت حبة بصل كبيره مقطعه لشرايح طويله مع طماطتين مقطعه مكعبات

لين يذبلون  ونحط عليها فلفل أسود .

الحين نجيب الكوسا ونصفها فوق البصل والطماط .

بعدين ذوب علبه معجون طماط في ماي ونصبه مع عصير ليمونتين وتقريباً بيالة زيت زيتون على الكوسا .

نصبه شوي شوي مو مره وحده وبعدها نبدا نصب ماي شوي شوي لين يغطي الكوسا ونضيف مكعبين ماجي .

ونخليهم على نار عاليه لما يبدا يغلي وبعدين نخليها متوسطه لين تنطبخ الكوسا .. تاخذ تقريباً ساعه .

ونقدمها 

| Chicken Francaise |

.

.

طبخه إيطالية .. سهله جداً .

شفتها باليوتيوب وطبقتها مع تغييرات بسيطة جداً عشان ماتطلع طبخة ثانيه !

طعمها زين .. مافيها ذيك النكهه القوية اللي سببها البهارات .

عن نفسي آكلها مع رز , بس اخوي حبها مع خبز والناس أذواق :p

أحسن مافيها ماتحتاج حمسة وبصل :p

| الطريقة والمقادير مع بعض | :

صدر دجاج نقطعه بالنص عشان تصير عندنا شريحتين رقيقتين .

ممكن تدقونه بعدين عشان يرق أكثر بس عن نفسي ماسويت كذا .

عصرت عليه نص ليمونه وخليته يتتبل يوم كامل .

بعدين ناخذ الدجاج ونبهره بفلفل أسود وبابريكا وملح .

ونغمسه بطحين - الطحين بعد نذر عليه شوي فلفل أسود وبابريكا -

وبعدها نغسمه ببيض - البيض نفس الشي نذر عليه شوي فلفل أسود -

وبعدها نحطه على طول بالمقلى نكون حاطينه على نار متوسطه من أول وفيه زيت شوي .

نخلي الدجاج 5 - 6 دقايق وبعدين نقلبه للجهة الثانيه .

بعد ما يستوي ويتحمر شوي نشيله ونحطه بصحن ,

الحين بنفس المقلى نضيف كاس ماي مذوبين فيه  نص مكعب ماجي ,

ونضيف عليه ربع اصبع زبدة وشوي بقدونس مفروم وشوي فلفل أسود وممكن ملح بس أنا استغنيت عنه عشان الماجي مالح .

ونحركه لما تذوب الزبده ويبدا يثقل شوي بس .

في هالمرحله نضيف الدجاج عليه ,

ونقلبه شوي ونخليه لما يبدا الصوص يثقل مره مثل هنا شوفوا الفرق - أضفت شريحة ليمون تعطيه نكهه خفيفه -

وبعدها نقدمه .

* ملاحظه :
طبعاً بما إن قليناه ع الطبقه اللي فيها بيض , فتوقعوا يكون فيه نكهه خفيفه .

| دجاج بالكزبره والثوم و صوص الفطر |

.

.

| الطريقة والمقادير مع بعض | :

صدور دجاج نتبلها بليمون قبل بليلة .

وبعدين نغمسها بخلطة الطحين وهي عبارة عن :

[ طحين  + ملعقة كبيره من تتبيلة كنور للدجاج بالكزبرة والثوم + فلفل أسود + بابريكا + شوي ملح ] .

ونحاول ننفض عنها الطحين الزايد .

بعدين نغمسها في بيض - نضيف له شوي فلفل أسود - .

وبعدين نرجع نغمسها في الطحين مرة ثانيه ونحط قطع الدجاج بالفريز ربع ساعه .

نحط زيت ع المقلى ونحط عليه الدجاج .

بعد 6 دقايق تقريباً نقلبة للجهة الثانيه .

لما يستوي ويتحمر نشيله .

وبنفس المقلى نضيف الفطر ونقلبه .

بعدين نضيف كاس ماي مذوبين فيه نص مكعب ماجي .

ونضيف ربع اصبع زبدة .

لما تذوب الزبدة ويبدا الخليط يثقل نضيف ربع كاس كريمة خفق  وشوي فلفل أسود .

ونحركه لما يتجانس الخليط ونقدمه مع الدجاج .

| Parfait |

.

.

عباره عن حلى فرنسي الأصل ,

تقدرون تقولون طوروه الأمريكان وخلوه حلى بالستايل الفرنسي لكن مو نفس الطريقة الأصلية .

سويت المطور ماسويت الأصلي .

طبعاً هو ببساطه تقريباً عبارة عن فروزن يوقرت أو زبادي عادي بعد وفواكة - هذا الشائع -

أنا حبيت أغير شوي وأستبدل الزبادي المثلج بخلطة زبادي .

حبيت يكون طعم الزبادي واضح فكان له النصيب الأكبر من المقادير .. بس ممكن تغيرون فيها وتقللونه لو حابين :)

| الطريقة والمقادير مع بعض | :

نقطع منقا وفراوله لقطع متوسطه وتحط جزء منهم في قاع الكاس بعدين نسوي خلطتين من الزبادي .

* خلطة الزبادي ( 1 ) هي :

بالخلاط :

[علبة زبادي + ملعقتين كبيره لبنة بينار + 4 حبات جبن كيري + 3 ملاعق كبيره سكر - ممكن تقللونهم لو حابين - ]

* بعد ماينخلطون ناخذ نص هالخليط ونسوي منه خلطة الزبادي ( 2 ) :

نضيف لنص خليط الزبادي ( 1 ) حبة منقا مقطعه  ونخلطهم بالخلاط .

 الحين نجي لكاس التقديم اللي حطينا فيه منقا وفراولة بقاع الكاس .

ونضيف طبقة من خلطة الزبادي ( 1 )

وبعدها طبقة من خلطة الزبادي ( 2 )

بعدين تكرر الطبقات .. فواكه .. خلطة الزبادي  ( 1 ) .. خلطة الزبادي ( 2 )

ونزينه بالكريمه و لوز محمص ومفروم فرم خشن . - ممكن تضيفونه بين الطبقات بعد   -

* طبعاً تقدرون تحطون الفاكهة اللي تبونها

هنا بدون كريمه :

| دجاج بالكاجو |

.

.

سهل ولذيذ وما ياخذ وقت ,

للي يحبون الأكل الصيني والطعم الحلو و الحامض .

| الطريقة والمقادير مع بعض | :

نحط زيت ع النار - تقريباً مقدار 4 ملاعق كبيره -

ونضيف له صدور دجاج مقطعه لمكعبات متوسطه .

نقلبها لما ينشف الماي حقها وتتحمر على خفيف بعدين نضيف :

فلفل أسود - ونتوصى شوي لأن مافي بهار غيره -

زنجبيل مقطع شرايح طويله .

بصل أبيض و فلفل بارد مقطعين لمكعبات متوسطة  .

كزبره مفرومه .

مكعب ماجي .

ونقلبهم 5 دقايق .

بعدها نضيف الكاجو ونقلب دقيقتين .

وبعدها نضيف الخلطة هذي :

5 ملاعق كبيرة كاتشب

ملعقتين كبار شطة

4 ملاعق كبيره خل

ملعقتين صغار صوص صويا حلوه .

نخلطهم ونضيفهم ع الدجاج ونقلبهم 10 دقايق تقريباً ونقدمه .