| Chocolate Truffles |

| Chocolate Truffles |

 

 

الأساس فيها كريمة خفق + دارك شوكلت .

والبعض يحط زبدة شوي .

لقيت عدة طرق ,
اللي يخلي كمية الشوكلاته أكثر من الكريمه واللي يخليها متساويه ..
أنا عن نفسي أحط الشوكولاته دبل كمية الكريمه أو اكثر منها بشوي .

طبعاً من المهم هنا نوع الشوكولاته ,

لازم تختارين نوع شوكولاته ممتاز .. ويكون دارك .

الجالكسي مايمشي .

| الطريقه والمقادير مع بعض | :

نجيب 300 جم تقريباً من الشوكولاته .
ونقطعها لقطع صغيره عشان يسهل ذوبانها بشكل أسرع لما نضيف لها الكريمه .

وناخذ علبة كريمة خفق صغيرة ( تعادل كاس تقريباً )
نغليها ع النار ,

* أنا أضيف معاها مرات ملعقة كبيره سكر بودره مع الكريمة حسب الطعم اللي تبين توصلين له .
لكن بالغالب مايحطون .

أول ماتغلي نرفعها عن النار ونضيف نص كمية الكريمه أو أكثر شوي على الدارك شوكلت .
ونحرك لما يتجانس الخليط ,

ونشوف هل هو ثقيل جداً ومايتحرك إلا بالقوة ؟

إذا إيه

نضيف شوي من الكريمه بعد ونحرك .
لما نحصل على خليط كريمي ثقيل .

و نحطه بالثلاجه لما يصير متماسك تماماً
الأفضل تخلينه يوم كامل عشان لايحوسك .

بعدين نبدى ناخذه ونكوره ونحطه في بودرة كاكاو .

ونقدمه في قوالب ورق أو قوالب من شوكولاته مثل ما سويت هنا ,

وطريقتها :

نذوب شوكولاته بيضا ونلونها بملون طعام باللون اللي نبي .

وندهن ورق الميني كب كيك فيه

 

( النوع اللي لونه بني كانكم تعرفونه افضل شي لأنه يسهّل علينا مرحلة فصل الشوكولاته اذا جمدت )

وندخلها الفريز تجمد وبعدين ندهنا بطبقة ثانيه عشان تصير سميكه وماتتكسر معانا
وندخلها الفريز .



* ملاحظة :

في عملية الدهن نستخدم الفرشه ( حقت الطبخ )
في منها أنواع نوع يجي سيليكون مثل هذي :





وهذي اللي عندي حالياً , تحوس شوي بس سهلة التنظيف .

ونوع يجي كأنها حق الرسم .. وهذي أحسها أفضل , بس تنظيفها صعب .
كانت عندي بس أمي قطته

لما تجمد نطلعها ونفصلها عن الورق ونقدم الترفل فيها .


وممكن نزينها بنعناع .

 
* طبعاً ممكن نضيف لها عدة نكهات ومانقتصر على الشوكولاته وبس .
أثناء غلي الكريمة ممكن تضيفون نعناع لو حابين تكون فيها نكهة نعناع أو أي شي ودكم يدخل بالنكهة
في ناس تضيف روزماري بعد .
 

.

.

 

 

 

| مطعم Fushi .. الخبر |

.

.

مطعم فوشي من المطاعم المفضلة عندي .

مطعم ياباني 90% تقريباً .

في عنده شغلات ثانيه لا تمت للأكل الياباني بصلة .. لكنها لذيييذة .

في له فرعين ,

واحد بالراشد .. بالتوسعه .

والثاني بكورنيش الخبر - الواجهة البحرية - , جنب اب تاون " كاسبر سابقاً "  .

روحتنا هذي كانت لفرع الكورنيش .

رحت له مع خالتي وبناتها , وخواتي طبعاً :p

المكان هادي ورايق

فيه نوعين للجلسات .. اخترنا هذي ,

- اول ماتطلعون الدرج تكون على جهة اليمين في الوجه -

ماكان حولي احد قعدت اصور من الفضاوه =)

.

.

المنيو

بالنسبه للمنيو مو مصور

عاد طلبنا منيو مصور خاص بالسوشي والهوسوماكي بس

يعني مو كل الاطباق لها صور ,

الزين فيه ان بالمنيو الأساسي - اللي بدون صور - يحط جنب كل طلب دائره فها حرف وكل حرف له معنى .

وتحت يكتب كل حرف وش يعني .. مثل اذا كان ني او فيه مكسرات او شي كذا

لأن اليابانيين مايخلون عنهم هالحركات البايخه فحب ينبه .. اجل ني ؟!

 

يجيبون لك مقبلات من عندهم عباره عن سوشي ..

عشان تجرب لو كنت مابتطلب يمكن يعجبك وتطلبه بدل ما تغامر وهالشي يحسب لهم .

طبعاً يغيرون النوع كل مره ..

 

جابو لنا تشكن ترياكي  ,

 

 

محاولة للأكل بأعوادهم :p

 

 

نجي للطلبات :

- شوربة توم يم 

- كريزي كالفورنيا ( يعتبر اورماكي .. من تفرعات السوشي تقدرون تقولون )

- سبايسي كريسبي تشيكن ( من السوشي )

- ايتاليانو ( من السوشي )

- تشيكن راب

- ربيان تمبورا

- تشيز بولز

-  بطاطس لـ نوني ماغيرها :p

 

.

.

 

| شوربة تُم يم |

 

 

 

 

عباره عن ربيان وفطر وحليب جوز هند ..

كاتبين حاره بس ماحسيت بحراره :/

 

أعجبتني .

| عصير ليمون بنعناع |

 

 

حق خالتي ..

يعحبها ,

بس بنت خالتي تقول ذايقته قبل ومو حلو عاد مدري <- الذمة والضمير عندي عالية :p

بيبسي ( لاه ماكنا ندري ههههههه )

| تشيز بولز |

 

جبنه مع هلابينو ومقليه يجي معها صوص للتغميس - ماصورته بروحه -

لذيييذة .. من الطلبات الدائمة لنا .

 

| كريزي كالفورنيا |

 

 

 

 

 

 

 

عباره عن كراب - قباقب - مع مايونيز وافوكادو وخيار ,

حقي وحق خالتي

خالتي تموت عليه ..

عاد يقولون إن مافي احد يطب هالمطعم الا ويطلبه :p

عن نفسي اعطيه 8.5 / 10

المشكله ان انا يوم كلت اللي بالترياكي تشيكن اللي جابوه كمقبلات اعجبني وصرت أحس أي شي أقل منه ,

يمكن لو ذقت هذا قبل بيكون زين مدري :/ ( تقيم بضمير  )

 

على فكرة ,

قريت معلومة أن الكراب المستخدم في السوشي عبارة عن سمك منكّه بطعم القباقب :/ .

مافيه بيور كراب .

 

 

هذا اتوقع سبايسي تشكين ,

هو سبايسي شي بس مدري وش هو ..

ماذقته :/

 

 

 

 

هذا طلب بنت خالتي

سبايسي كريسبي تشيكن واللي وراه ايتاليانو

ذقت الكريسبي زين بس يومها كان عندي مافي اطلق من الترياكي ههههه

 

هذا ايتاليانو

عباره عن رز داخله حبة فلفل احمر بارد مشوي وفوقه صوص

يعجب بنت خالتي , ماذقته .

| رُبيان تمبورا |

 

 

بصراحه مايسوى ومب حلو استغفر الله !

ذقته ماعجبني ولافيه طعم وتدور الربيان ماتلقاه من كثر ماهم مغطسينه بالبقسماط ,

وماصخ بعد .

4 / 10

 

هذا مايونيز ياباني على قولتهم وصوص حار ..

بصراحه المايونيز رهييييب .

حتى الصوص ,

هم يجيبونه من عندهم بس مرات ينسونه .. ذكروهم طيب

| تشيكن راب ساندوتش |

 

 

لذيذة جداً .. تحسون اللي مسويها هندي ههههه

استغربت من مكوناته اللي ماعرفتها الا عقب ماأكلته .

كان دجاج وزنجبيل وجبن فيتا .. بس ماتحسون فيه , رهيبه .

 

انضمت لقائمة الطلبات الدائمة :p

 

 

 

 

يقال نظره عامه :p

عقب ماخلصنا قالو بنحلي

وطلبو سيزلنج شوكلت براونيز

 

 

اعجبتهم

أحسها عاديه , والناس أذواق أكيد

هدية العدد :p

.
.

 

 

هنا مره طلبنا  للبيت .

| مكسد سي فود |

 

لذيذ جداً ..

عبارة عن سمك هامور وسالمون وربيان ومشروم مع منقا .!
بس ماحسيت بطعمها ابد !

أهنيهم

صار من الطلبات الدائمة بعد .

 

 

المطعم بشكل عام أعجبني .

 

قعداته رايقة .

أسعاره على حسب الأطباق .. بس متوسط تقريباً

الأكل لذيذ .

 

* طلب انصح بتجربته :

في واحد مالقيت له صور , اللي هو البيف تبنياكي .

رقم المطعم فرع الكورنيش :

8989595

.
.

 

| وفتحنا قسم للمطاعم والمقاهي | ..

.
.

 

 

كل عام وأنتوا بخير .. ولو أنها متأخره :p

 

مرات تجيني أسئلة واستفسارات عن مطاعم ومقاهي .

فطرحت استسفسار للمتابعين بتويتر : هل أحط لكم تقارير عن المطاعم في قسم خاص ؟

 

ولقيت تشجيع حلو منهم .

 

لذلك ,

فتحنا قسم ( مطاعم ومقاهي ) ..

 

بتكلم فيها عن المطاعم والمقاهي اللي زرتها .

منها دعاية لهم :p

ومنها نفيدكم بتجاربنا .. والأكيد إنكم بتفيدوني بردودكم عن تجاربكم للمطاعم اللي بحط عنها =) .

 

راح أتكلم في التقارير عن :

 

- الطلبات

 

- المكان والقعدات

 

- الأسعار

 

والأكيد تقييمي لكل شي مع ذكر المساوئ والمميزات .

 

 

.
.

 

 

 

 

 

| حلى الكاسات |

.

.

 

هذا الحلا اللي سوته أختي وطلبتوه =)

ماخذته من النت بس مدري من مين .

| الطريقة والمقادير مع بعض | :

* القاعدة :

شوكلت كيك مفتت وصبينا عليه شوي " ماي مخلوط بنسكافيه "

.
.

* الطبقة الثانية - البيضاء - :

نخلط :

- 6 حبات جبن كيري

- ظرفين دريم ويب

- علبة قشطة

ونصبها على طبقة الكيك .

نحطها بالثلاجه على مانخلط الطبقة الثالثة ,

.
.

 

* الطبقة الثالثة :

بالخلاط :

- 4 أصابع تويكس

- ظرفين كريم كراميل

- ظرف دريم ويب

- قشطة

- فنجان حليب سائل .

لما تنخلط نصبها على الطبقة البيضا ونحطه بالثلاجه .

عند التقديم نرش كاكاو بودره .

.
.

| تورتيا بحشوة الدجاج |

.
.

سهلة ولذيذة جداً ,

من الحشوات اللي صار لنا أكثر من 7 سنين وإحنا نسويها .

لكن ما نسويها بخبز التورتيا , نحطها بخبز عادي - بس الحجم الميني - .

هذي المرة الوحيدة اللي سويناها بتورتيا  ,  وبصراحه .. بالخبز العادي ألذ بكثيييير .

والناس أذواق طبعاً ؛)

فاللي بيسويها يحطها بالخبز العادي ألذ .

| الطريقة والمقادير مع بعض | :

نقطع صدور دجاج لمكعبات صغيره ونتبلها بـ :

[ عصير نص ليمونة | ملعقة كبيرة خل | ملعقه كبيرة زيت زيتون | علبة زبادي | بصله مقطعه لمكعبات صغيره | كمية قليلة من الفلفل الأخضر البارد مقطعه لقطع صغيره | ملح | فلفل أسود ]

ونتبلها من 4 لـ 5 ساعات .

بعدين نحطه في صينية للفرن ونغطيها بقصدير ونخليها لما تنشف مويتها وتستوي .

لما تستوي نخليها على جنب يبرد شوي - عشان لما نضيفة ع الخضار ماتذبل -

ونقطع :

- خس  , لقطع صغيره

- بصل أخضر , لشرايح دائرية

- بقدونس .

ونحط الدجاج عليهم ونحط عصير ليمونة وملعقتين كبار مايونيز وملح وفلفل أسود , ونقلبهم .

ونحشي الخبز فيهم .

* ما أمداني أقدمه وأصوره بشكل أفضل كان بيأذن :/

.
.

| تورتيا الدجاج بصوص الـ hp |

.

.

سهله ولذيذة , وأهم شي مافيها حمسه :p

| الطريقة والمقادير مع بعض | :

نقطع صدور دجاج لشرايح طويلة نوعاً ما ونتبلها بـ :

[ عصير ليمونة | فص ثوم مفروم | علبة زبادي | 3 ملاعق كبيرة صوص الـ hp العادي | ملعقتين كبيره خردل | فلفل أسود | بابريكا | ملح ]

لمدة 3 ساعات أقل شي .. وممكن نخليها ليلة كامله بالثلاجة .

بعدين نحطها في صينية للفرن ونفطيها بقصدير وندخلها فرن مشغل مسبقاً على درجة حرارة 360 .

ونخليها لما تنشف .

ممكن تاخذ ساعه إلا ربع .. وممكن أقل أو أكثر حسب الفرن والكمية .

على ماتستوي نقطع خس .

ونسوي الصوص :

نخلط :

[ نص علبة زبادي | عصير نص ليمونه | 3 ملاعق كبيره رانش | 3 ملاعق كبيره كاتشب | ملعقة كبيره مايونيز | ملح | فلفل أسود ]

ونخليه بالثلاجه .

لما يستوي الدجاج .

نجيب خبز التورتيا وتحط الخس والدجاج والصوص ونحط شوي جبن تشدر مبشور .

ونلفها ونقدمها

* في كم حبه حطيت شوي بقدونس مفروم زايد عندي :$ بس المفروض ماينحط .

.

.