| Parfait |

.

.

عباره عن حلى فرنسي الأصل ,

تقدرون تقولون طوروه الأمريكان وخلوه حلى بالستايل الفرنسي لكن مو نفس الطريقة الأصلية .

سويت المطور ماسويت الأصلي .

طبعاً هو ببساطه تقريباً عبارة عن فروزن يوقرت أو زبادي عادي بعد وفواكة - هذا الشائع -

أنا حبيت أغير شوي وأستبدل الزبادي المثلج بخلطة زبادي .

حبيت يكون طعم الزبادي واضح فكان له النصيب الأكبر من المقادير .. بس ممكن تغيرون فيها وتقللونه لو حابين :)

| الطريقة والمقادير مع بعض | :

نقطع منقا وفراوله لقطع متوسطه وتحط جزء منهم في قاع الكاس بعدين نسوي خلطتين من الزبادي .

* خلطة الزبادي ( 1 ) هي :

بالخلاط :

[علبة زبادي + ملعقتين كبيره لبنة بينار + 4 حبات جبن كيري + 3 ملاعق كبيره سكر - ممكن تقللونهم لو حابين - ]

* بعد ماينخلطون ناخذ نص هالخليط ونسوي منه خلطة الزبادي ( 2 ) :

نضيف لنص خليط الزبادي ( 1 ) حبة منقا مقطعه  ونخلطهم بالخلاط .

 الحين نجي لكاس التقديم اللي حطينا فيه منقا وفراولة بقاع الكاس .

ونضيف طبقة من خلطة الزبادي ( 1 )

وبعدها طبقة من خلطة الزبادي ( 2 )

بعدين تكرر الطبقات .. فواكه .. خلطة الزبادي  ( 1 ) .. خلطة الزبادي ( 2 )

ونزينه بالكريمه و لوز محمص ومفروم فرم خشن . - ممكن تضيفونه بين الطبقات بعد   -

* طبعاً تقدرون تحطون الفاكهة اللي تبونها

هنا بدون كريمه :

| Panna cotta |

.
.

حلى إيطالي ,

تقدرون تقولون عنه مهلبية الطليان :p

طعمه قريب جداً للمهلبية بس انه متماسك أكثر منها بسبب وجود الجيلاتين .

طبعاً بحط الطريقة الأصلية وأنتوا ممكن تبدعون بالنكهات اللي ممكن تضيفونها عليه .

تغيير عن المهلبية .

| الطريقة والمقادير مع بعض | :

أول شي هذا الحلى بعتمد على الكريمه .. لذلك هو دسم .

أول مره سويته حسيته دسم جداً فقللت من كمية الكريمه واستبدلت الجزء اللي قللته منها بحليب طازج .

أول شي ناخذ ربع كاس ماي فاتر - يعني عادي لا هو بارد ولا حار - ونضيف عليه ظرف جيلاتين .

ع النار نحط ثلاثة أرباع كاس كريمة خفق وكاس وربع حليب طازج

- ممكن تحطون طاس كريمه وكاس حليب -

وتضيفون عليه ثلاثة أرباع كاس سكر وملعقه صغيره فانيلا .

وتخلونه لما يبدى يغلي .. أول مايغلي تشيلونه من ع النار .

ونحركه الجيلاتين مع الماي ونضيفه ع الكريمه ونحرك بالملعقه لما ينخلطون مع بعض .

الحين نصبها في قوالب ونحطها بالثلاجه يوم كامل .

بعد ما تاخذ يوم كامل بالثلاجة نسوي صوص الفراوله .

نقطع فراولة ونحطها في قدر ونضيف عليها سكر ونحركها ونخليها على نار متوسطه لما تبدى تطلع الماي اللي فيها وتطبخ .

نسكر عنها وتخليها تبرد سوي ونخلطها بالخلاط .

بعدين نصفي الخليط من البذور .

ونخليها تبرد لحد وقت التقديم ..

وقت التقديم لو كنتب يتبين تقلبين البانا كوتا حاولي تحركين السكين ع الأطراف وبعدين حطي غمسي القالب لمدة 10 ثواني بس في ماي دافي واقلبيه .

لا تطولين تراها تذوب بسرعه .

وقدميها مع الصوص .

ملاحظه مهمه :

اذا بتسوين الصوص معاها الأفضل تقللين كمية السكر في البانا كوتّا لأن الصوص حالي وهي حاليه :)

| Banana and Chocolate Muffin |

.

.

لقيت طريقته باليوتيوب وطبقتها مع تغييرات بسيطه .

في ناس استغربوا من سالفة الموز ,

بس طعم جديد حلو الواحد يجربه .. لمحبي الموز طبعاً .

وفي مثل هالشغلات حلو تخلين الأطفال يشاركونك في عملية الخفق وغيرها - فرصه تهجدينهم :p -

حفيدة خالتي كانت عندنا يومها واستانست وهي تسويه ..

كل اللي علي إني احط لها المقادير وهي تخلط , مابقى أحد ماعلمته عن ( حفلة الموز والشوكولاته ) اللي سوتها هههههههه .

.
.

| الطريقه والمقادير مع بعض |

أول شي نخلط المقادير الجافه ثم السائله .

بعد كذا نضيف السائله على الجافه ونحركهم لما يتجانسون ,

أول شي نخلط بالملعقه :

[ كاس ونص طحين | ربع كاس كاكاو بودره | 4/3 كاس سكر | ملعقه صغيره مليانه تقريباً بيكربونات الصوديوم | نص ملعقه صغيره بيكنج باودر | نص كاس شوكلت شيبس ]

بالنسبه للشوكلت شيبس - رقائق الشوكولاته - أفضل استخدام نوع الـ سيمي سويت من هيرشي

هذي صورته  من النت :

بعد مانخلطهم  نبدى نخلط المقادير السائله .

نجيب حبتين موز ونحاول نهرسهم بس مو بشكل كامل .. نحاول نخلي فيه مثل القطع الصغيره والمتوسطه الحجم .

بعدها نضيف عليه ثلث كاس زيت ونحركهم ونضيف عليه بيضه مع رشة فانيلا .

ونحركهم لما يتجانسون ونضيفهم ع المقادير الجافه اللي خلطناهم .

ونحركهم لما يتمازجون ..

ونصبهم في قوالب الكب كيك وندخلهم الفرن - مشغل مسبقاً بدرجة حرارة 300 - لمدة 20 دقيقة تقريباً .

ممكن ياخذ وقت أطول أو أقل شوي على حسب الفرن .

عشان نتأكد أنه استوى نغرس سكين أو عود أسنان ويطلع نظيف وجاف .

ونقدمه .

.
.

| كيكة التفاح |

.

.

سهله ولذيذه وخفيفه وشكلها مرتب , والأهم اغراضها متوفره .

| المقادير والطريقه مع بعض |  :

أول شي نجيب 3 حبات تفاح أحمر ونقشرهم ونقطعهم لمكعبات متوسطه .

ونحطها بقدر ونصب عليها ربع كاس ماي .

ونخلي النار عاليه لما يبدى الماي يغلي بعدها نقلل الحرار ونخليها متوسطه ونغطي القدر ونخلي التفاح يطبخ بالماي والبخار .

على ما ننتهي من هالخطوه نكمل باقي الخطوات .

نجيب تفاحه ونقطعها بالنصف .. بالطول .

وبعدين ناخذ كل نصف  ونقطعه لشرايح رقيقه عشان تكون تغطيه للكيكه من فوق .

وبعد كذا نعصر عليها ليمون ونغطيها .

الحين نجيب التفاح اللي ع النار ونحطه بالقالب اللي بنخفق فيه الكيك .. ونبدى نخلطه مع نص كاس سكر واحنا نخلط بينهرس التفاح تقريبا .

بعد كذا نضيف عليه نص كاس زيت ونخفق لما يتجانس الخليط , نضيف حبتين بيض - كبيره - وحده ورى الثانيه  + رشة فانيلا , ونخفق .

بعدها نضيف كاس ونص طحين متعدد الاستخدامات + ملعقه صغيره مليانه بيكنج باودر + نص ملعقه صغيره - مو مليانه -بيكربونات الصوديوم + نص ملعقه صغيره قرفه مطحونه + رشة ملح .

ونخفقها شوي شوي بالبدايه بعدين نزيد السرعه .

بعدها نصبها في صينية للكيك مدهونه بزيت .

ونصف فوقها التفاح بهالشكل :

نبدا نصف شرايح التفاح من الأطراف للداخل , وحده بعدها فوق الثانيه تقريباً .. مثل كذا :

- صورتها بالصحن عشان نسيت اصور الخطوه من البدايه ع الكيك -

بعدين ندخلها الفرن مشغل مسبقاً على درجة حرارة 360 لمدة نص ساعه  تقريباً .. أو لما نغرس سكين أو عود اسنان ويطلع نظيف .

ونحمرها شوي من فوق وبعدين ندهن التفاح بالشيره ونقدمها .

.

.

| تفاح بحشوة الجبن |

.
.

 

هالشي لذييييييييييذ وسهل جداً ..

من محاولاتي للقصه على نفسي عشان اكل التفاح :p ,

وهالشي صدق خلاني احب التفاح هههههه

هو نفس فكرة التشيز كيك بس بدون كيك .. يعني نستبدل طبقة الكيك أو البسكوت بـ تفاح .

وينطبخ ويصير ذايب معاه ويعطيه نكهه حلوه .

* هالشي حطيناه عشان خاطر الاخت أنوار :p

.
.

| الطريقه والمقادير مع بعض | :

أول نسوي حشوة الجبن :

عباره عن 12 حبة جبن كيري .

بيضتين

ثلث كاس سكر - أو اقل لأنها طلعت حاليه شوووي بالنسبه لي -

رشة فانيلا

نخلطهم بالخلاط .

ونخليهم لما نجهز التفاح .

الحين نجيب التفاح

ونقسم التفاحه لنصفين بالعرض .

ونفرغهم عشان نصب حشوة الجبن فيه - طبعاً نخلي القاعده سميكه شوي -

بعد ما نفرغ التفاح ,

نصب خليط الجبن فيه ونحطهم بصينيه للفرن وندخلها الفرن 20  إلى 25 دقيقه تقريباً .

ونطلعها ونخليها نص ساعه تقريباً برا .

بعدين ندخلها الثلاجه ساعتين .

وبعدين عند التقديم نسوي هالكريمه ,

عباره عن :

علبة صغيره كريمة خفق نخفقها مع ملعقه طعام سكر بودره  - نخلي السرعه بطيئه اول دقيقه بعدين نخليها عاليه جداً - .

وبعد ماتنخفق وتصير كريمه القوام نضيف ملعقة طعام جبن فيلادلفيا .

ونخفق لما تتمازج .

ونزين فيها ,

ونرش قرفه مطحونه .

ونقدمها

- قدمتها مع فطيرة التفاح -

.
.

| فطيرة التفاح |

.
.

 

 

 

هالفطيرة تطبيق لطريقة عضوه بمنتدى اسمها ( سحايب ) ..

لذيذة , وتستاهل تتسوى أكثر من مره .

غيرت فيها تغييرات بسيييطه جداً لا تكاد تُذكر .

+ أنا من الناس اللي ما اتحمل طعم التفاح ولا حتى ريحته :(

قلت خل نخليه مطبوخ يمكن اتقبله هههه والحمدلله قدرت العب على نفسي واكله <- والمطلوب يعني هههه

ماعلينا ,

نخش بالطريقه :$

| المقادير والطريقه مع بعض | :

بحطها مثل ما كتبتها ( سحايب )  والتغييرات اللي سويتها بذكرها بعد :

 

* الطبقة الاولى


2-3 تفاح أحمر يقشر ويبشر - أنا حطيت 2 -
ثلث كوب سكر
2 م قرفة مطحونة
لوز مبشور -  أنا عن نفسي استبدلت اللوز بجوز هند مبشور ومجفف -



* الطبقة الثانية


أصبع زبدة يكون بحرارة الغرفة
كوب دقيق
ثلث كوب سكر
شوية فانيلا

* الطبقة الثالثة

بيضتين
نص كوب سكر
12 حبة كيري
فانيلا

في البداية :
ناخذ مقادير الطبقة الأولى كلها ماعدا اللوزع القدر ونخلطها
بعدين نخليها على نار هادية لما تنشف ويذبل التفاح بس مو تخلونها تنشف مرة لا لما تختفي الموية بس

-  عن نفسي بصراحه هالخطوه غيرت فيها , ماخليتها  تنشف كثير -


وخلال هالوقت هي ماتحتاج تحريك متواصل بس كل شوية تطلين عليها وتحركينها تشوفين نشفت او لا


وعشان كذا انصحك تبدين بالطبقة الثانية اللي هي الدقيق والزبدة كلهم عالعجانة واعجنيها لما تنخلط كويس وتطلع زي الكورة


والطبقة اللي بعدها - الثالثه - ع الخلاط ,

وبكذا بتكون جهزت عندك كل الطبقات .


افردي العجينة بصينية وسط والافضل حقت التشيز كيك وبعدين صبي عليها خليط الجبن .


بعدين بالشوكة جيبي التفاح ووزعيه

- هالخطوه غيرتها .. وخليت التفاح بالنص اكثر شي وحاولت احركه مع خليط الجبن عشان يتداخل معاه  -


وبعدين رشيت الوجه بجوز الهند المبشور والمجفف أو لو عندك جوز مثل ماهي سوت -


دخليها الفرن وغالباً تجلس 40 دقيقة بالتمام بس انتي اذا لاحظتي اطرافها تحمرت سكري عليها وحمريها من فوق


وبعدين زينتا بكريمه .

وقدمتها :

 

.
.

| كريم كراميل بالشوكولاته |

.

.

| كريم كراميل بالشوكولاته | 

مشتهيه اسوي حلى سريع ومقادير متوفره بالبيت وماتحتاج روحة بقاله ( + عندي اغراض قربت تنتهي صلاحيتها فأنقذني هالحلى )

ولقيت طريقة هالحلى .. أخذت الطريقه من عضوه بمنتدى اسمها ! P a i n

وبحط الطريقة والمقادير مثل ماهي كاتبتها

 

| المقادير والطريقة مع بعض | :

4 ملاعق طعام حليب بودره
1 كاس ماء
2/1 باكيت دريم ويب
ظرف كريمه
2/1 علبة قشطه
1 ملعقه طعام كبيره كاسترد
1 ملعقه طعام كاكاو بودره
2 ملعقه طعام شوكولاته مبشوره او قطعتين شوكولاته

للزينه / شوكولاته - كريمة دريم ويب خفق ,


* ضعي جميع المقادير في القدر على نار هادئه مع التحريك المستمر حتى يصبح الخليط غليظ ناعم
اسكبي الخليط بالأكواب وأدخليها الثلاجه لمدة 5 ساعات ,
اخرجيها واقلبيها بطبق وزينيها بكريمة الخفق والشوكلاته وقدميها ,

أنا عن نفسي زينتها بشوكلت جاناش وكريمه

* على فكره الكميه قليله وماتكفي الا لـ 3 قوالب مثل اللي سويته .

.
.

| حلى البسكوت |

بتقولون هذا كوكيز ههههههههه .

لا هو بصراحه لا فيه طحين ولا سكر ولا بيض ..

هو حلى ينحط بصينيه بس انا شكلته بهالشكل لأن حسيت أنسب له =)

هالحلى جداً سهل وبسيط ومقاديره شوي وما ياخذ وقت .

وش احسن من كذا ؟

| المقادير والطريقه مع بعض | :

نطحن علبة بسكوت شاي كبيره .. - 44 حبه يعني -

هذا النوع رهيييييب لا تفكرون تسسون بغيره .

 

وبعد مانطحنها نضيف عليها ربع كاس جوز هند ونحركهم ,

ثم نضيف عليها اصبع زبده لين - بدرجة حرارة الغرفه -

ونفركهم مع بعض زين لما تصير مثل عجينة الباي المفتته .

ثم نضيف على هالخليط ثلث كاس حليب مركز محلى - حليب نستله - .

ونعجن لما تتكون عجينه متماسكه .

ممكن تزيدين من حليب النستله شوي ان ما كانت متماسكه .

بعدها تضيفين حبات الشوكولاته .. استخدمت النوع اللي من هيرشي , بالتحديد نوع السيمي سويت .

ونكورها ولكور صغيره ونضغط عليها عشان تعطينا هالشكل .

ونحطها في صينيه عليها ورق زبده

وندخلها لفرن مشغل - من تحت - مسبقاً على درجة حرارة 360 لمدة 10 دقايق .

ونطلعها ونغطيها لما تبرد شوي ونقدمها

.

.

| Red Velvet Cake |

.
.

.
.

سويتها مرتين ..

مره ما كان عندي ملون الطعام الأحمر , سويتها كب كيك ..

والثانيه حطيت ملون طعام بس للأسف نوعيته مو ممتازه ..اللون خفيف جداً :(

فما اعطاني الدرجه اللي ابيها :(

وناويه اشتري لون طعام نوعية زينه واعيدها ان شاء الله , لأن طعمها أعجبني وتستاهل تتسوى أكثر من مره .

.
.

الطريقه أخذتها من عضوة بالاقلاع ( لمليسا ) الله يجزاها خير ,

بس الكريمه غيرتها وسويت مثل كريمة الزبده اللي اسويها واضفت عليها جبن فلادلفيا

حبيت الكريمه بصراحه مع إني غالباً ما استسيغ الكريمه :D

انحاست علي الكيكه بصراحه لأن كان الوقت اللي اسويها فيه ضيق وما امداني انتظرها تبرد كثير وحاست الكريمه بس رقعتها شوي :P

| المقادير | :

ـ إصبع زبده

ـ كاس وربع سكر - هي كاس ونص بس انا قللته لكاس وربع لأن الكريمه اللي بحطها حاليه -

ـ بيضتين

ـ ربع كوب ملون طعام " أحمر "

ـ ملعقتين كبيره كاكاو بودر

ـ كوب بتر ملك Buttermilk أو بأمكانكم إستبداله بكوب حليب وإضافة ملعقه صغيره خلَ عالحليب - وهذا اللي سويته :$ -

ـ كوبين وربع دقيق

ـ ملعقة صغيره فانيلاَ

ـ ملعقة صغيره كربونات الصوديوم

| الطريقة | :

ـ في الخلاط نخلط الزبده والسكر ثم نضيف البيض فوق المزيج بمعدل بيضة واحدة كُل مرة .

ـ في صحن آخر نخلط معاَ الكاكاو وملون الطعام نخلطهم زين لحدَ مايذوب الكاكاو بعدها
نصبه ع خليط الزبده والسكر .

ـ نخفض على سرعه الخلاط ونضيف البتر ملك ثم الدقيق بالتدريج ونحركه كويس.

ـ نضيف الفانيلاَ ونخلط زين ثم نضيف كربونات الصوديوم .

- نجيب مدهونه بزيت , ونرش عليها دقيق - نسيت اسوي خطو الدقيق :$ - ونحط خليط الكيك

وندخله الفرن على درجة حرارة 360 .

لما تستوي الكيكه - نتأكد من هالشي بغرز سكين أو عود اسنان ويطلع نظيف وجاف - =)

الحين نجي للكريمه :

نخفق 250 جرام زبده - بدرجة حرارة الغرفه -

مع اضافة كاس و4/3 سكر بودره بس شوي شوي لما تخلص كل كمية السكر .

بعدها نضيف ملعقة كبيره حليب سائل مع ملعقه صغيره فانيلا .

ونخفق بسرعه لين تتماسك , ونضيف بعدها نص علبة جبن فيلادلفيا ( العلبه الصغيره اللي فيها 200 جرام )

ونخفق بسرعه لدقايق بس تتجانس .

ونحطها بقمع التزيين ونزين .

طبعاً الكيكه قطعتها بالنص ودهنتها بالكريمه بعدين رجعتها على بعض وبديت ازينها