| دجاج بـ صوص جوز الهند وحبوب الخردل |

وش ذا الاسم الطويل ههههههههههه


طبعا من الاسم واضح ان نكهته ممكن تكون مو مرغوبه من الكل .
لكنه شي جديد وتغيير عن الأكلات والطعم المعتاد ,












| الطريقه والمقادير مع بعض | :


بالنسبه للدجاج
نجيب صدور دجاج ونقسمها لقسمين .. يعني نخلي الشريحه الوحده من صدور الدجاج شريحتين
بحيث تكون أرق .


ونغمسهم في :
 طحين مخلوط مع : بهارات مشكله / فلفل اسود / ملح


بحيث تكون كمية الطحين متناسبه مع البهارات .
مايتكون البهارات اكثر من الطحين .. لا تكون اقل من الطحين
ولا نبيها تكون قليله بحيث ان الطحين يكون طاغي ولا يبين فيه طعم البهارات .
- ممكن ترشين شوي بهار ع الدجاج قبل لا تحطينه في الخلطه -


بعد مانغمس الدجاج بهالخلطه ونخلص كل قطع الدجاج ..
نرجع نغمسها مره ثانيه عشان تعطينا طبقه سميكه شوي .


ونقليها في زيت غزير .
لما تستوي نحطها في صحن فيه منديل عشان يمتص الزيت الزايد


على مايستوي الدجاج نسوي الصوص .


نحمس بصل ابيض مقطع لشرايح طويله  وفص ثوم مفروم مع شوي زيت وزبده .
ونرش شوي ملح عشان يذبل بسرعه


لما يذبل نضيف عليه ملعقه كبيره - مو مليانه ننتبه - حبوب الخردل .
ونقلبهم


الحين بالخلاط نحط :
كاس كريمه خفق  + ملعقتين كبار بودرة جوز الهند + ملعقه كبيره طحين + نص كاس ماي


ونخلطهم ونضيفهم ع البصل والخردل
ونضيف عليهم رشة فلفل اسود وملح ورشه خفيييفه بهارات مشكله .


ونحركهم لما يطبخ ويثقل


يكون الدجاج استوى .
نضيف الصوص عليه .


ونقدمه ,





















 

| كفتة البطاطس |

هذي نسويها منها  حشوه للسمبوسه  بعد ..

ميزتها انها حاره من الفلفل والبهار .

تطلع دمااار

| الطريقه والمقادير مع بعض | :

3 بطاطسات كبار  نسلقها بقشرها
ثم لا استوت نقطعها مكعبات متوسطه .

الحين نجيب بصله كبيره مقطعه مربعات صغيره نحمسها مع زيت لما يذبل .

الحين نضيف البطاطس عليه ,

ونضيف بعد :

بهارات مشكله / مكعب ماجي / فلفل اسود / فلفل حار مجروش

ونقلب ونخليه 5 لـ 7 دقايق  - نراعي واحنا نقلب ان نحاول نهرس البطاطس مع التقليب -

بعدين نضيف عليها  كزبره مقطعه وشبت وحبة فلفل حار مقطع صغار - اختياري - وشوي ملح

بالنسبه للملح ضبطيها بالمقدار اللي تحسين مناسب لك .

ونخليها خمس دقايق .

وبعدين نخليها تبرد شوي ونبدا نكورها .

الحين نجهز :

1 / صحن فيه طحين

2 / ملّه - باديه او طاسه مثل مايسميها البعض :D - ونحط فيها بيضه ونخفقها مع شوي فلفل اسود .

3 / حبتين توست مطحونين ونحطهم في قدر ع النار مده 5 دقايق مع التحريك المستمر - ممكن نستخدم البسماط كبديل -

الحين نبدى ناخذ كور البطاطس ونغمسهم أول شي : في الطحين

ثم البيض

ثم التوست المطحون

وبعد مانخلصهم كلهم نرجع نعيد بس بدون طحين هالمره .

يعني نرجع نغمسهم في البيض قم التوست المطحون .

- ممكن تغمسينها مره وحده بس انا احب يكون في طبقه سميكه شوي حولها -

وبعدين نخليها في الفريز ..

ومتى ما اشتهيناها نطلعها قبل نص ساعه - عشان تصير بدرجة حرارة الغرفه ولما نقليها ماتصير بارده من داخل -

ونقليها .

ونحطها بعد القلي في صحن عليه منديل عشان يمتص الزيت الزايده

وللتزين نسوي فتحه بالسكين من فوق ونغرس فيه : شبت / بقدونس ..

وبالعافيه ,

وهنا شكلها من داخل :

| Crab Salad |

| Crab Salad |

وفي روايه : سلطة القباقب :D












أنا عن نفسي ماحب القباقب مره .. اللهم اذا كانت طازجه
وهنا استخدمت الجاهز المثلج ..
اللي يجي كأنه اعواد .

لأن ابوي جابه فاضطريت استخدمه ..
اللي يحبه بتعجبه السلطه ان شاء الله .

| الطريقه والمقادير مع بعض | :

فلفل ملون مقطع شرايح طويله تقريباً

كراب مقطع شرايح دائريه

خس مقطع لقطع صغيره تقريباً

بصل أخضر مقطع لشرايح دائريه

نخلطهم مع بعض

ونضيف عليهم هالصوص :

بالخلاط نحط :

شوي " شبت  "
ملعقه كبيره عسل
ملعقه كبيره خردل
ملعقه كبيره مايونيز
عصير نص ليمونه
فلفل اسود
ملح


ونصبهم ع السلطه بس ما نخليها تغرق بالصوص .!

ونقدمها .

| مكرونه بالجبن والصلصه |

هذي امي الله يحفظها سوتها لي .

مثل فكرة الدجاج بالجبن .. لأني احبه سوت لي مكرونه تشبهه :$

الله يطول بعمرك يا يمه ويخليك لي .

ومن يومها كل ماجعنا صرنا نسويها :D

ميزتها انها سهله ولذيذه

| الطريقه والمقادير مع بعض  | :

نسلق مكرونه

- سلقنا هنا نص علبه علبة بس والمقادير الباقيه بتكون على اساس انها لنص علبة مكرونه -

الحين في قدر نحمس بصل مقطع مكعبات

وفص ثوم مفروم ..

ونرش ملح شوي عشان يذبل البصل

الحين نخلط بالخلاط :

4 حبات جبن كيري + نص علبة معجون طماط + نص كاس ماي + ومكعب ماجي .

ونضيفهم ع البصل والثوم ونحرك لما يتسبك

الحين نضيف عليهم المكرونه المسلوقه - بعد مانشخلها طبعاً -

ونقلبها .

ونضيف عليها نص كاس كريمة خفق .

ونخليها لما تتسبك .

ونقدمها .. - مرات نرش عليها جبن شدر مبشور .. هنا حطينا بس ذاب -

| سلطة البقوليات |

| سلطة البقوليات |







| الطريقة والمقادير مع بعض | :

نقطع الخيار و الخس لقطع صغيره جداً ونضيف عليه :
فاصوليا حمرا + حمص حب + ذره حب - كلهم نصفيهم من الماي حقهم -

ونضيف عليه زيتون بالشطه - من حلواني - مع الزيت اللي معه عشان يعطي طعم شوي ,
ونحاول نكثر من الزيتون لأن الشطه اللي معه تعطي نكهه مميزه .

الحين نسوي صوص السلطه ,

عباره عن :

عصير ليمونه
ملعقه كبيره خل
ملعقه كبيره متبل ايطالي
ملح
فلفل اسود

ونصبها ع السلطه ونقدمها




وبالعافيه .

| حمص |

| حمص |










طريقته اخذتها من عضوه اسمها " سمواء "
كثير يمدحونه قلت اجرب
بصراحه ماحطيت نفس المقدار من الطحينه + الثوم حطيت فص صغير ..
فما كان نفس الطعم اللي في بالي .
واتوقع ان السبب من هالشيئين
المره الجايه بحط الطحينه مثل اللي مكتوب  + فص الثوم بخلي حجمه وسط


| الطريقه | :

‎بالخلاط :

علبة حمص حب بدون مويتها

علبة قشطه
‎عصير ليمونتين
‎ملح -ثوم-زيت زيتون

‎ وبعدماتنخلط نضيف كوب طحينه  - انا حطيت نص كوب تقريباً وماطلع مثل اللي ابيه فلا تسوون مثلي -
‎ونخلط من جديد

* طبعاً انا سويته وقدمته عشان ماكان عندي وقت والأفضل تخلينه بالثلاجه شوي عشان يصير متماسك اكثر وأحسن

| دجاج بالجبن والصلصه |

| دجاج بالجبن والصلصه |

رهيييب وماياخذ وقت .

جربوه وبتدعون لي :$

| الطريقة والمقادير مع بعض | :

أول شي تقطع صدور دجاج لمكعبات متوسطه

وبصل مقطع لقطع صغيره .
وفصين ثوم مفروم وتخليهم على جنب .


الحين نحط زيت في قدر ,
ونحط بهارات صحيحه - يعني مو مطحونه -
وهي :
3 حبات هيل
4 حبات مسمار

فلفل اسود حب - مو مطحون -
نص حبة قرفه
ثوم مفروم

نحمسهم شوي وبعدين نحط البصل عليها ونرش رشه خفيفه ملح عشان يذبل .

بقدر فبه شوي زيت وعلى درجة حرارة عالية نحط الدجاج ونقلبه ونحط عليه البصل والثوم اللي حمسناهم   و بهارات مطحونه وكزبره جافة مطحونه  وفلفل اسود .
وفلفل حار مقطع شرايح دائريه - لو تحبونها حاره -

ونقلبهم مع بعض ..

الحين بالخلاط نحط :
6 جبن كيري + علبة معجون طماط + كاس ماي + ومكعبين ماجي .

أو ممكن تحطون : 6 حبات جبن كيري وعلبة طماط معلب مثل الطائي وملعقة معجون طماط ومكعبين ماجي ..


ونضيفهم ع الدجاج .

ونقلبهم شوي لما يبدى يصير حار ويتسبك

ونقدمه .

| كفته بـ المرق |

.

.

| كفته بـ المرق |

 

 

 

طبعاً ما احسه شي جديد بس بما اني سويته بحطه :$

| الطريقه والمقادير مع بعض |

بالنسبه للكفته :

اول شي نجيب لحم مفروم ..

ونغسله ..

بعدين نضيف عليه

بصله كبيره + كزبره + فص ثوم متوسط الحجم + ربع حبة فلفل بارد مفرومين كلهم ..

بعدين نضيف ملعقه صغيره مليانه بهارات مشكله وملعقه صغيره ملحو ملعقة صغيره مليانه نشا - النشا يخليها ناشفه ممكن نستدبله بتوست مطحون انا عن نفسي احبه كذا :D -

ونخلطهم مع بعض بيدنا .
ونشكلهم على كور وندخلهم الفرن .

لما يستوون .

على مايستوون نجيب قدر ونحمس فيه :

 بصله متوسطه مقطعه مكعبات متوسطه وفصين ثوم مفرومين

ونرش شوي ملح عشان يذبل البصل بشكل أسرع .

الحين بالخلاط نحط :

طماطتين - بدون قشرهم .. نكون مقشرينهم من قبل -

وربع حبة فلفل بارد

وشوي كزبره بحجم قبضة اليد أو اقل شوي .

ولما ينخلط أضيفهم ع البصل والثوم .

واحركهم واخليهم لما يتسبكون .

الحين نضيف عليهم بطاطس وجزر مقطّعين لمكعبات متوسطه تقريباً

وارش عليهم شوي بهارات مشكله .

ونقلبهم

في هالوقت تكون استوت الكفته ونضيفها عليهم ونقلبهم

ونضيف نص علبة معجون طماط ومكعب ماجي و فلفل حار - الفلفل اختياري -

ونضيف ماي لما يغطي اللحم تقريباً .

ونخليه يطبخ لما يستوي البطاطس والجزر .

ونقدمه .

| شوربة الرُبيان |

قرب رمضان الله يبلغنا إياه واياكم بأحسن صحه وحال ..

حبيت احط لكم كم شغله تنفع لرمضان من شوربات وكريم كراميل بالفرن ومن هالشغلات .

 | شوربة الرُبيان |





الطريقه والمقادير مع بعض :

نحمس بصل أبيض مقطع شرايح ع النار مع زيت ..
ونرش شوي ملح عشان يذبل بسرعه ,

بعدين نحط عليه جزر مقطع شرايح متوسطة الطول ..
وقلبها 5 دقايق ..

ثم نضيف عليها الربيان ..
ونقلب 5 دقايق ..

ونحط عليه :
فلفل حار مقطع شرايح دائريه
وزنجبيل طازج مقطع شرايح كبيره ,
وشوي كزبره مفرومه ..
وفلفل اسود ومكعب ماجي وبابريكا فلفل حار ..

نقلبهم برضو 5 دقايق كذا يعني ..

الحين نخلط " 3 ملاعق كبيره معجون طماط + 3 ملاعق كبيره صوص sweet & sour + ملعقة كبيره صوص صويا + ملعقه كبيره خل " ..

ونضيفها ع الربيان وربعه .,

وتقلبهم دقايق
ونضيف عليهم ماي دافي .. ( عشان بسرعه تطبخ معنا )

ونجيب ربع كاس ماي ونحط عليه 3 ملاعق كبيره نشا ..
ونحركه لما يذوب ونضيفه للشوربه ..

ونقلبها ..

ونخليها لما تبدى تغلي نضيف عليها عصير ليمونه ..
وبصل اخضر مقطع شرايح _ اختياري _ ,

ونخليها دقايق ..

ونقدمها ,

أي استفسار أنا حاضره