| مطعم فوشي FUSHI .. التقرير اثاني |

.

.

 

 

أهلاً  أهلاً

 

مثل ماتشوفون العنوان هالمرة بكتب لكم تقريرعن مطعم من المطاعم المفضلة عندي ..

 

مطعم فوشي FUSHI

 

موقعه بالخبر عند الواجهة البحرية جنب أب تاون

 

المكان شرح ويدخله نور الشمس وهذا الشي يعجبني

لكن غالباً يكون زحمة وإزعاج شوي :/

 

عشان كذا مرات أفضل أطلب ويوصلونه للبيت

وهذا رقمهم :

 

0138989595

 

هالمطعم  سبق وكتبت عنه تقرير قديم جداً هذا الرابط حقه :

 

| مطعم Fushi .. الخبر |

 

وهذا التقرير بيكون تحديث ..

 

المنيو صار مصور على الآيباد ..

 

وطلباتنا كانت :

 

 

 

 

عصير ليمون بنعناع ..

 

مو لي فما أدري هل هو مضبوط أو لا :$

 

 

 

 

 

 

 

شوربة توم يم ..

 

من الشوربات المفضلة عندنا وأعجبت اختي .

 

بس ثقيلة نوعاً ما  مو خفيفة  .

 

ما أقدر أكتب عنها بالتفصيل لأني ما جربتها هالمرة .

 

 

 

 

فنكي تشكن رولز ..

 

هو عبارة عن سبرنغ رول مقطع بشكل مايل

 

محشي دجاج مبهر وخضار ..

 

الطبقة الخارجية مقرمشة ومو شاربه زيت كثير ..

 

طعمه لذيييذ ومو أول مره أطلبه :$

 

 

 

 

 

وهذي التشيلي بيف نودلز ..

 

من ألذ أنواع النودلز اللي عندهم

 

خفيفة ما تغث ..

 

اللحم مقطع لقطع صغيرة ..

كمية الخضار ممتازة ومتناسبة مع النودلز

 

باختصار ممتازة

 

 

 

 

 

 

طالعوها على راحتكم .!

 

 

 

 

 

 

 

 

 

وهذا التشيكن تبنياكي

 

طبق أخوي المفضل ..

 

الصوص اللي معاه فيه نسبة حلاوه بسيييطه

وفيه ثوم محموس

 

يجي مع خضار مسلوقة ورز من اختياركم .

 

 

 

 

سوشي ..

 

كريزي كالفورنيا ..

 

سوشي محشي بكراب وخيار وأفوكادو ومايونيز ياباني

ومن فوق كراب ومايونيز ياباني

 

لذيذ مره

 

 

 

 

تمقلوا رعاكم الله ..

 

 

 

 

 

نجي لهالطبق الجديد

 

كاجامي راب

 

كأنها سوشي بس مو مقطع لقطع صغيرة ..

 

تورتيا محشية رز وكراب وخيار ومنقا وماينويز ياباني ..

 

تتقدم مع سلطة البابايا وبطاطس ..

 

الطعم لذيذ صراحة لكن تمنيت إن في مثلها سوشي ..

 

وسلطة البابايا لذيذة حبيتها مره

 

والبطاطس أو الفرنش فرايز للكول أعجبتني إنها ناشفة مافيها زيت أبد ومبهرة ببابريكا..

 

أختي صارت تطلبه دايم من بعد ذاك اليوم :/

 

 

 

 

وبكذا خلصت التقرير السريع عن مطعم فوشي .

 

من زمان ما كتبت تقارير فأحس إني حايسة ههههه :$

 

 

.

.

 

 

| مطعم Trevi |

.

.

 

 

 

مطعم إيطالي ,

مكانه في الواجهة البحرية - الخبر - .

 

بين أب تاون - كاسبر سابقاً - ومطعم فوشي .

 

كنت أتمنى نروح له للغدا , بس روحتنا كانت للفطور .

 

 

المكان جداً راااايق وأعجبني .

بس إنه صغير .. والطاولات قريبة جداً من بعض ,

فإذا كان زحمة أتوقع كل اللي حولكم بيقطون معاكم في السوالف :p

 

 

 

 

 

 

 

 

 

 

 

جابو لنا المنيو العادي عشان فيه ساندوتشات وعصيرات زيادة عن منيو الفطور .

 

بالنسبة لمنيو الفطور .. أول صفحة منه بس على ما أذكر كانت أطباق للفطور :/

 

.
.

 

طلباتنا كانت :

 

 

 

 

تشيز أومليت ,

كانت كبيره صراحه  .. بس اللي ما أعجبني فيها إن نوعية الجبن كانت موزاريلا .. وأنا مو من عشاقة لذيك الدرجة :(

 

فـ هنيئاً لعشاق الموزاريلا بهالنوع :p

 

 

.

.

 

 

 

 

فيجتبل أومليت

ماذقته  بس يقولون زين .

 

طبعاً مايجي مقطع , أختي قطعته :D

 

 

.

.

 

 

 

بصراحه ما أدري وش أسم الطلب ,

لكن كان أول خيار بالمنيو ..

 

عبارة عن :

 

- أومليت

 

- جبن حلوم

 

- خضار

 

- نوع من أنواع اللحوم الباردة مدري وش هو صراحه

 

 

الأومليت كبيره مثل حجم حقتي لكنهم مقدمينها بهالشكل فلا يغركم .

والحلوم يقولون عنها مالحه ,

 

وترى صورت الصحن بعد ما خذوا منه كم قطعه :$

 

 

.
.

 

 

على أساس عصير رمان مثل ماهو مكتوب :/

حسبت بيجي شي طازج ..

 

ما أعجبني .. حااااالي , بس كان يبرد ع القلب .

 

 

.
.

 

 

 

 

 

 

 

كابتشينو

 

على أن كمية القرفة اللي راشينها فوق شوي .. إلا أن ريحتها قوووية ماشاء الله .

 

يقولون زين .

 

 

.
.

 

 

المطعم بشكل عام زين ,

ودي أروح له الصبح عشان أجرب حلوياتهم لأن القعدة فيه أعجبتني .

 

الفطور عن نفسي حسيته عادي ..

لو بجرب مره ثانية بجرب الفجتبل اومليت .

+ بصراحه أشوف ناس تمدح فطوره ..

فاللي أحسه عادي ممكن يكون ممتاز عند غيري .

 

منيو الفطور يبيله تنويع أكثر من كذا ..

أطباقة محدودة جداً .

 

 

الخدمه كانت زينه .. والأسعار ما أذكرها بالضبط بس أطباق الفطور كانت حول الـ 30 للواحد ,

بعضها أقل شوي وبعضها أكثر شوي .

 

فيه قسم عوائل وفيه قسم عزاب ..

العوائل فوق والعزاب تحت ,

 

والمدخل واحد

 

 وهذا حسابهم بتويتر : @treviresturant
 

.
.

 

 

 

| مطعم Fushi .. الخبر |

.

.

مطعم فوشي من المطاعم المفضلة عندي .

مطعم ياباني 90% تقريباً .

في عنده شغلات ثانيه لا تمت للأكل الياباني بصلة .. لكنها لذيييذة .

في له فرعين ,

واحد بالراشد .. بالتوسعه .

والثاني بكورنيش الخبر - الواجهة البحرية - , جنب اب تاون " كاسبر سابقاً "  .

روحتنا هذي كانت لفرع الكورنيش .

رحت له مع خالتي وبناتها , وخواتي طبعاً :p

المكان هادي ورايق

فيه نوعين للجلسات .. اخترنا هذي ,

- اول ماتطلعون الدرج تكون على جهة اليمين في الوجه -

ماكان حولي احد قعدت اصور من الفضاوه =)

.

.

المنيو

بالنسبه للمنيو مو مصور

عاد طلبنا منيو مصور خاص بالسوشي والهوسوماكي بس

يعني مو كل الاطباق لها صور ,

الزين فيه ان بالمنيو الأساسي - اللي بدون صور - يحط جنب كل طلب دائره فها حرف وكل حرف له معنى .

وتحت يكتب كل حرف وش يعني .. مثل اذا كان ني او فيه مكسرات او شي كذا

لأن اليابانيين مايخلون عنهم هالحركات البايخه فحب ينبه .. اجل ني ؟!

 

يجيبون لك مقبلات من عندهم عباره عن سوشي ..

عشان تجرب لو كنت مابتطلب يمكن يعجبك وتطلبه بدل ما تغامر وهالشي يحسب لهم .

طبعاً يغيرون النوع كل مره ..

 

جابو لنا تشكن ترياكي  ,

 

 

محاولة للأكل بأعوادهم :p

 

 

نجي للطلبات :

- شوربة توم يم 

- كريزي كالفورنيا ( يعتبر اورماكي .. من تفرعات السوشي تقدرون تقولون )

- سبايسي كريسبي تشيكن ( من السوشي )

- ايتاليانو ( من السوشي )

- تشيكن راب

- ربيان تمبورا

- تشيز بولز

-  بطاطس لـ نوني ماغيرها :p

 

.

.

 

| شوربة تُم يم |

 

 

 

 

عباره عن ربيان وفطر وحليب جوز هند ..

كاتبين حاره بس ماحسيت بحراره :/

 

أعجبتني .

| عصير ليمون بنعناع |

 

 

حق خالتي ..

يعحبها ,

بس بنت خالتي تقول ذايقته قبل ومو حلو عاد مدري <- الذمة والضمير عندي عالية :p

بيبسي ( لاه ماكنا ندري ههههههه )

| تشيز بولز |

 

جبنه مع هلابينو ومقليه يجي معها صوص للتغميس - ماصورته بروحه -

لذيييذة .. من الطلبات الدائمة لنا .

 

| كريزي كالفورنيا |

 

 

 

 

 

 

 

عباره عن كراب - قباقب - مع مايونيز وافوكادو وخيار ,

حقي وحق خالتي

خالتي تموت عليه ..

عاد يقولون إن مافي احد يطب هالمطعم الا ويطلبه :p

عن نفسي اعطيه 8.5 / 10

المشكله ان انا يوم كلت اللي بالترياكي تشيكن اللي جابوه كمقبلات اعجبني وصرت أحس أي شي أقل منه ,

يمكن لو ذقت هذا قبل بيكون زين مدري :/ ( تقيم بضمير  )

 

على فكرة ,

قريت معلومة أن الكراب المستخدم في السوشي عبارة عن سمك منكّه بطعم القباقب :/ .

مافيه بيور كراب .

 

 

هذا اتوقع سبايسي تشكين ,

هو سبايسي شي بس مدري وش هو ..

ماذقته :/

 

 

 

 

هذا طلب بنت خالتي

سبايسي كريسبي تشيكن واللي وراه ايتاليانو

ذقت الكريسبي زين بس يومها كان عندي مافي اطلق من الترياكي ههههه

 

هذا ايتاليانو

عباره عن رز داخله حبة فلفل احمر بارد مشوي وفوقه صوص

يعجب بنت خالتي , ماذقته .

| رُبيان تمبورا |

 

 

بصراحه مايسوى ومب حلو استغفر الله !

ذقته ماعجبني ولافيه طعم وتدور الربيان ماتلقاه من كثر ماهم مغطسينه بالبقسماط ,

وماصخ بعد .

4 / 10

 

هذا مايونيز ياباني على قولتهم وصوص حار ..

بصراحه المايونيز رهييييب .

حتى الصوص ,

هم يجيبونه من عندهم بس مرات ينسونه .. ذكروهم طيب

| تشيكن راب ساندوتش |

 

 

لذيذة جداً .. تحسون اللي مسويها هندي ههههه

استغربت من مكوناته اللي ماعرفتها الا عقب ماأكلته .

كان دجاج وزنجبيل وجبن فيتا .. بس ماتحسون فيه , رهيبه .

 

انضمت لقائمة الطلبات الدائمة :p

 

 

 

 

يقال نظره عامه :p

عقب ماخلصنا قالو بنحلي

وطلبو سيزلنج شوكلت براونيز

 

 

اعجبتهم

أحسها عاديه , والناس أذواق أكيد

هدية العدد :p

.
.

 

 

هنا مره طلبنا  للبيت .

| مكسد سي فود |

 

لذيذ جداً ..

عبارة عن سمك هامور وسالمون وربيان ومشروم مع منقا .!
بس ماحسيت بطعمها ابد !

أهنيهم

صار من الطلبات الدائمة بعد .

 

 

المطعم بشكل عام أعجبني .

 

قعداته رايقة .

أسعاره على حسب الأطباق .. بس متوسط تقريباً

الأكل لذيذ .

 

* طلب انصح بتجربته :

في واحد مالقيت له صور , اللي هو البيف تبنياكي .

رقم المطعم فرع الكورنيش :

8989595

.
.