| كل عام وأنا أو مدونتي بخير :p ؟ |

.

.

اليوم مابحط طبخه جديده أو شي من هالقبيل ,

اليوم كملت مدونتي سنه كاملة ..

وشرفوني بهالفترة 20 ألف زائر .. أو أكثر شوي ..

وفرحوني بنات كثير بتطبيقاتهم الرائعة في الفتره اللي راحت ,

فـ هالمرة حابة أشكر كل شخص ساهم في نجاح هالمدونة .. سواء بنشرها , أو بالتطبيق منها , أو دعمني معنوياً ..

وشكر كبير لمن قام بإنشاء هذه المدونة لي  - بحكم إني ما أعرف لهالشغلات  -

.
.

الغرض من هالمدونة إني افيدكم ولو بالشيء القليل في مجال الوصفات ..

وأتمنى إني وصلت لغرضي ..

وبما أنه شرف كبير لي صور تطبيقاتكم اللي وصلتني .. جمعت أغلبها - اللي قدرت عليه -

وبعرضها هنا ..

+ راح أسوي قسم خاص لتطبيقاتكم وأعرض كل تطبيق بصوره لحالها مع إسم اللي طبقت ( الإسم اللي يوصلني منها وتبيني أحطه ) كل شهر تقريباً .. يعني لما تتجمع عندي عدد من التطبيقات بإذن الله .

دعمكم وتشجيعكم هو سبب إستمراري .. فـ شكراً لكم

 

 

 

 

 

 

| Spinach and Artichoke Dip |

| ديب السبانخ والخرشوف |

لا يغركم الشكل , الطعم لذييييذ ..

| الطريقة والمقادير مع بعض | :

ع النار نحمس حبة متوسطة بصل أبيض مقطع لمكعبات صغيره , مع الزيت ..

ونحط ملح عليه عشان يذبل .

بعدها نضيف عليه سبانخ - أنا استخدمت كيس صغير من السبانخ المجمده - .

ونحركها لما تسخن , بعدين نضيف عليها خرشوف - معلب - مقطع لمكعبات صغيره .

بالنسبة للخرشوف أنا حطيت بس قطعتين  - مقطعتهم لمكعبات -

طبعاً بتلقون بالسوبرماركت نوعين من الخرشوف الملعب ..

لأنهم يفصلون قطعة الخرشوف : يفصلون القمة أو الرأس أعتقد عن الباقي , ويعلبون كل جزء بحالة .

أنا أخذت الكعب اللي على شكل رأس  حبة الفطر , زبدة الموضوع خذوا اللي مكتوب عليها ( خرشوف - كعب ) :$

هذي صورته من النت :

بعد ما نقلب الخرشوف معهم نرش فلفل أسود ونقلب ,

بعدين نضيف ملعقه كبيره مليانه جبن سائل ونقلبهم لما تتجانس ثم نصب عليهم علبه صغيره من كريمة الخفق .

لما تغلي نضيف جبن شدر + موزاريلا .. مبشورين طبعاً .. بالكمية اللي تحبون .

طبعاً بأمكانكم تزيدون وتنقصون بالشكل اللي تحبونه لين توصلون للطعم اللي ترغبون فيه =)

ونقدمه مع التوست المحمص بالثوم .

| كبسة لحم |

.
.

هذي الكبسه سويتها برمضان اللي فات الله يبلغنا اياه واياكم بأتم صحه وعافيه مع أحبابنا =)

كان تحدي بيني وبين شخص من ينزل طريقة كبسته بالتفصيل مع الصور في أحد المنتديات .

تذكرتها هالكم يوم وقلت خل انزلها :$

| الطريقه والمقادير مع بعض | :


أول شي نقطع بصله كبيره لمكعبات متوسطه .
ونحطها في قدر مع ملعقه كبيره زيت ونحمس البصل لما يبدى يقلب بني فاتح - يشقر -

الحين نضيف اللحم - انا اضفت 5 قطع بس لأن محد ياكل اللحم عندنا الا 2 من اصل 8 -
ونحط معهم فصين ثوم مفرومين ونقلبهم مع بعض .
ثم نضيف بهارات مشكله مطحونه ورشة ملح وفلفل اسود ومكعب واحد ماجي ونقلبهم .





عقب مانقلبهم 5 دقايق كذا نضيف عليهم 3 طماطات كبيره مقشره ومقطعه لمكعبات متوسطه .

ونضيف بعد كزبره مفرومه + ربع حبة فلفل بارد مقطع لقطع كبيره شوي + ليمون اسود .




ونقلبهم ونخليهم ع النار لما يبدى الطماط يذبل مثل كذا :




لما يذبل الطماط نضيف عليه ملعقه معجون طماط مخلوط بملعقه ماي .

ونقلب لما يصير معنا كذا :

الحين نضيف ماي لين يغطي اللحم + ملعقة ونص صغيره ملح تقريباً ونخليه على نار عاليه ونغطيه لين يبدا يطبخ ثم نقصر ع النار .




ونخليه تقريباً ساعه ونص .

قبل لا تخلص الساعه ونص بـ 20 دقيقه نغسل الرز ونخليه ينقع بماي :




لمدة 20 دقيقه .

الحين نضيف الرز - بدون الماي طبعا - ع اللحم .
ونحرك شوي شوي لما نحس انه تداخل مع المرق الموجود
الحين نزيد كمية الماي بحيث انها تغطي الرز وتصير فوق الرز بـ 2 سم تقريبا .

الحين نغطيه ونخليه على نار عاليه شوي لين ينشف ماي الرز نقوم نقصر ع النار .
بتاخذ من هالخطوه تقريبا ساعه .

الحين نسوي الحشو اللي فوق

* اللوز :
ناخذ لوز مقشر ونحمصه في قدر مع شوي زيت لين ياخذ لون بني خفيف

* البصل :
نقطع بصله كبيره لمكعبات متوسطه ونحطه في قدر ونقلبه لما يبدى يقلب لونه والقدر يصير قاعه لونه بني خفيف





الحين نضيف شوووووي ماي ونحرك لما ياخذ لون بني وينشف الماي
نرجع نكرر هالعمليه لين يبدا وصل للون المطلوب .
الحين نضيف شوي قرفه مطحونه + هيل مطحون - شوي بس ! - ونقلب .
الحين نضيف شوي زيت ونقلب 5 دقايق .

وبس خلص الحشو حقنا

لما تستوي الكبسه نحاول نشيل قطع اللحم ونحطها بالفرن تتحمر من فوق شوي بس .
-  وبالغالب مايتحمر .. امي ماتحمره بس انا احبه كذا وحمرته   -

الحين ننكب - ننجب مثل مانقولها  - الكبسه ونحط البصل واللوز من فوق .

| Banana and Chocolate Muffin |

.

.

لقيت طريقته باليوتيوب وطبقتها مع تغييرات بسيطه .

في ناس استغربوا من سالفة الموز ,

بس طعم جديد حلو الواحد يجربه .. لمحبي الموز طبعاً .

وفي مثل هالشغلات حلو تخلين الأطفال يشاركونك في عملية الخفق وغيرها - فرصه تهجدينهم :p -

حفيدة خالتي كانت عندنا يومها واستانست وهي تسويه ..

كل اللي علي إني احط لها المقادير وهي تخلط , مابقى أحد ماعلمته عن ( حفلة الموز والشوكولاته ) اللي سوتها هههههههه .

.
.

| الطريقه والمقادير مع بعض |

أول شي نخلط المقادير الجافه ثم السائله .

بعد كذا نضيف السائله على الجافه ونحركهم لما يتجانسون ,

أول شي نخلط بالملعقه :

[ كاس ونص طحين | ربع كاس كاكاو بودره | 4/3 كاس سكر | ملعقه صغيره مليانه تقريباً بيكربونات الصوديوم | نص ملعقه صغيره بيكنج باودر | نص كاس شوكلت شيبس ]

بالنسبه للشوكلت شيبس - رقائق الشوكولاته - أفضل استخدام نوع الـ سيمي سويت من هيرشي

هذي صورته  من النت :

بعد مانخلطهم  نبدى نخلط المقادير السائله .

نجيب حبتين موز ونحاول نهرسهم بس مو بشكل كامل .. نحاول نخلي فيه مثل القطع الصغيره والمتوسطه الحجم .

بعدها نضيف عليه ثلث كاس زيت ونحركهم ونضيف عليه بيضه مع رشة فانيلا .

ونحركهم لما يتجانسون ونضيفهم ع المقادير الجافه اللي خلطناهم .

ونحركهم لما يتمازجون ..

ونصبهم في قوالب الكب كيك وندخلهم الفرن - مشغل مسبقاً بدرجة حرارة 300 - لمدة 20 دقيقة تقريباً .

ممكن ياخذ وقت أطول أو أقل شوي على حسب الفرن .

عشان نتأكد أنه استوى نغرس سكين أو عود أسنان ويطلع نظيف وجاف .

ونقدمه .

.
.

| ساندوتشات الدجاج |

.
.

سهله ومايبيلها

| الطريقه والمقادير مع بعض | :

أول شي نقطع صدور دجاج لمكعبات شبه متوسطه - أقرب للصغيره - ,

ونتبلها بـ [ علبة زبادي | عصير ليمونه | فص ثوم متوسط مفروم |  ملعقتين كبار من صوص الـ Hp العادي - الأزرق - | بصله مقطعه لشرايح طويله | ملعقة صغيره بهارات مشكله | فلفل اسود | مكعب ماجي - نفرمه عشان ينخلط - ]

هذي صوره  من النت لصوص الـ HP

لا تحسون الأغراض كثيره , كلها اشياء عاديه للتتبيل =)

نخليها تتبل ساعتين ع الأقل , وكل ما زادت المده كل ما كان افضل .. انا خليتها حول الـ 4 ساعات .

بعد ما تاخذ وقتها بالتتبيل نحطها بصينيه للفرن وندخلها الفرن - مشغل مسبقاً على 360 - .. تقريباً بتاخذ ساعه على ماتنشف مويتها .

بعد كذا نحمرها من فوق .

على ماتستوي بالفرن نبشر جزر ونضيف عليه شوي بقدونس ونضيف ملعقتين كبيره مايونيز وملعقتين كبيره عصير ليمون وشوي ملح .

بعد مايستوي الدجاج نضيفه على خلطة الجزر ونقلبه .

ونحطه بالتوست ونحط معاه شرايح جبن ونحمصه .

ونقدمه =)

| فتّة بصوص الحمص |

.
.

 

بصراحه كان ودي اليوم احط طبخه جديده كلياً ,

بس ما امداني اسوي شي جديد وهاذي امي مسويتها :$ ..

هذي الفته مو الأصليه طبعاً وصوصها مختلف شوي , لكن بالنهايه تعتبر فتّه وماهيب ذاك الاختراع .

أهم شي إنها لذيذه وسهله والا ؟

 

| الطريقة والمقادير مع بعض | :

نقطع بقدونس لقطع متوسطه , مانخليه مفروم .

ممكن بس تشيلين الأعواد حقته .

ونقطع خس لحجم متوسط بس نراعي أن كمية البقدونس تكون ضعف  كمية الخس .

وتقلي باذنجان مقطع مكعبات متوسطه ونحطه على صحن فيه منديل عشان يمتص الزيت الزايد بعد القلي ,

بعدها نجيب صحن التقديم ونحط البقدونس والخس كطبقه أولى ,

وفوقه الباذنجان .

ونغطيهم وندخلهم الثلاجه على مانسوي الصوص ,

الصوص عباره عن :

علبة زبادي

عصير نص ليمونه

فص ثوم صغير مفروم

ملعقة كبيره زيت زيتون

علبة صغيره حمص بالطحينه ( الحمص الجاهز تلقونه بالبقالات )

ملعقه كبيره بقدونس

نحطهم بالخلاط وبعد ماينخلطون نضيف عليهم فلفل اسود وملح .

ونغطيها ونخليها بالثلاجه لحين وقت التقديم .

وقت التقديم نقلي خبز مقطع لمربعات متوسطه حتى يتحمر .

ونحطه في صحن عليه منديل عشان يمتص الزيت الزايد .

ونحمص صنوبر .

نجيب صحن التقديم اللي فيه الخضار ونصب عليه الصوص ونوزع الصنوبر والخبز المقلي ع الوجه .

.
.