| كيكة الفيلادلفيا |

.
.




















سهله ولذيذه ومايبيلها
لكل اللي مايحبون طعم الكريمه الحاليه هذي تعتبر خيار حلو لهم

عباره عن :
كيكه بالفانيلا
صوص الفراوله
كريمة الفيلادلفيا

بالنسبه للكيكه نفسها ،
استخدمي أي كيكه بيضاء بالفانيلا تعجبك .
انا عن نفسي اسوي حقت بيتي كروكر اسهل ،

عقب ماتسوتي تخلينها تبرد
وتقطعينها لمكعبات صغيره

أو ممكن تحطينها بصينيه مربعه وبس تقطعين الأطراف المتحمره .

عقب نقطعها من النص .

وندهنها بـصوص الفراوله ،

عباره عن :
ع النار نحط فراوله - المجمده تنفع - مقدار كاس تقريباً
+ 5 إلى 6 ملاعق كبيره مليانه سكر بودره .

نحركهم ع النار لما تبدى الفراوله تطلع الماي حقها .
عقب نقصر ع النار شوي وونحرك مدة 10 دقايق الى ربع ساعه .

الحين نخلطه بالخلاط .

وصار عندنا صوص الفراوله اللي ندهن فيه الكيكه من داخل .. كذا :





طبعا نكثر شوي وانتبهوا .. لا تقربون من الاطراف مثل ماسويت .
لأن بعدين لما تغطونها بكريمه بتحوسكم .

الحين نحط الطبقتين اللي قصيناهم على بعض وندهنهم بالكريمه ،

الكريمه عباره عن :

نص اصبع زبده - بدرجة حرارة الغرفه -
+ 4 الى 5 ملاعق سكر بودره - مو مليانه -

نخفقهم لما يتجانسون
ثم نضيف عليهم علبة فيلادلفيا - الصغيره أم 200 جرام -
ونخفق بس مانطول مره .. أول مانشوفهم تجانسو نوقف .
وطبعاً ان حسيتو السكر قليل بالنسبه لكم زيدوه وحركو بالملعقه .

انا عن نفسي كمية السكر هذي تعجبني .

الحين ندهن الكيكه بالكريمه ونساويها :





ونصب شوي من فوق صوص الفراوله .
ونزينها بالفراوله والتوت والريحان ،















.
.