| شوكلت جاناش |

.
.

 

 

 

 

 

 

 

 

من الأشياء الأساسيه في بعض الحلويات , وله عدة إستخدمات مثل :

 

- تغطية الكيك  بأنواعه ., ويعتبر تغطية مثالية للموس شوكلت كيك .

 

- حشوة للتارت

 

- أساس لعمل الترفل عند تبريده

 

- عند التبريد ممكن يوضع في قمع للتزيين ونزين فيه

 

- في النوع الخفيف منه ممكن نخليه دافي ونستخدمه كـ آيس كريم صوص .

 

وغيره من الأشياء .

 

 

طريقة عمله سهله جداً ..

حبيت أحطها بحالها لأني كثير أكتب في وصفاتي ( شوكلت جاناش ) وأنسأل عن الطريقة .

 

فـ بدل ما أرجع أعيدها كل مره ,

بكتبها هنا عشان ترجعون لها .

 

| الطريقة والمقادير مع بعض | :

 

 

أول شي نجيب 200 جم شوكولاته تكون نسبة الكاكاو فيها 60 - 70 % أفضل شي .

في أنواع كثيرة مثل ليندت وغيرها متوفره .

 

نقطعها  لقطع صغيره عشان تذوب بشكل أسرع ونحطها في صحن عميق عشان بعدين نصب عليها الكريمة .

 

 

 

 

ع النار حطيت ثلاثة أرباع كاس كريمة خفق .

إذا كان متوفر كريمة قصيرة الأجل أفضل ..

بس عمرها ماتوفرت لي فأستخدم طويلة الأجل الموجودة دايم بالسوبرماركت .

 

أول ماتغلي نشيلها من ع النار ونضيفها ع الشوكولاته .

ونخليها دقايق عشان الشوكولاته تذوب وبعدين نبدا نحركها بالملعقه لما تذوب تماماً .

 

وبس هذا هو الشوكلت جاناش .

 

طبعاً هنا سويته ثقيل  شوي مثل ما أنتوا شايفين ,

فإذا تبونه خفيف ممكن تقللون من كمية الشوكولاته وتخلونها 150 أو 100 جم .

 

* ملاحظات مهمه :

 

- ممكن في الشوكلت جاناش نحط شوي زبدة مع الكريمة وهي تغلي عشان تعطيه لمعة .

 

- ممكن بعد نضيف شوي من الكورن سيرب عشان نخليه يلمع .

 

- أنا أفضل وأعشق الدارك شوكلت في الجاناش , بس في ناس تحس يبيله سكر , فممكن تضيفون سكر ع الكريمة وهي تغلي عشان يذوب .

 

- ممكن استبدال الدارك شوكلت بشوكولاته بالحليب أو أي نوع آخر لكن هذا بيخفف من الجاناش فالأفضل تزيدون كميته .

 

 

 

 

.

.