| Sweet and Sour Pineapple Chicken |

 

 

 

 

 

 

 

 

 

 

 

 

 

 

طعم لذيذ ماتوقعته صراحه ..

وهالطبق أتوقع أسويه أكثر من مره الايام الجايه دام الأناناس متوفر حالياً عندي :p

 

طبعاً هالطريقة لمحبي الأكل الآسيوي اللي فيه الطعم الحلو ..

 

 

| الطريقة والمقادير مع بعض | :

 

 

أول شي نقطع نقطع أناناس طازج ونصب عليه ماي دافي مقدار نص كاس تقريباً  ونغطيه ونخليه بالثلاجه ليلة كامله قبل .

عشان نقدر نستخلص شوي من طعم نافي الماي ونستخدمه في الطبخه .

 

طبعاً ممكن تستخدمون الأناناس المعلب والماي اللي معاه لكن أنا ما أحب هالشي عشان المواد الحافظه

وغير كذا , كان متوفر عندي البديل فليش أستخدمه ؟

 

.
.

 

نجيب فلفل بارد أحمر وأخضر ونقطعهم شرايح طويله

 

نجيب صدور دجاج ونقطعها لمكعبات متوسطة .. بعدين نغمسها في :

 

[ ملعقتين كبيرة طحين | ملعقة كبيره مليانة نشا | بابريكا | فلفل أسود ]

 

مثل كذا :

 

 

 

 

بعدين لما نشيلها نحركها شوي عشان يطيح الطحين الزايد .

ونحطها بصحن ونخليها بالفريز ..

 

 

ونسخن زيت للقلي ع النار ..

ونحط الدجاج فيه لما يتحمر .

 

بعدين نحطه بصحن فيه منديل عشان يمتص الزيت الزايد .

 

 

 

 

الحين نسوي الصوص اللي بنستخدمه ,

عبارة عن :

 

- ربع كاس - أو أقل شوي - خل

 

- ربع كاس صوص سويت آند ساور

 

- ملعقتين كبار صويا صوص - مو الحلوه -

 

- ملعقة صغيره فلفل أحمر مجروش " اختياري "

 

نخلطهم مع بعض ونخليهم في كاس .

 

* هذي صورة صوص سويت آند ساور اللي استخدمه

 

 

 

 

 

بعدين نقطع بصل أبيض لقطع كبيره ونحمسها بشوي زيت بس مانخليه يذبل ,

ونضيف عليه زنجبيل مقطع شرايح والفلفل المقطع شرايح .

 

 

نقلبهم دقايق ,

بعدين نضيف الأناناس مع الماي حقه .

 

ونقلبه دقايق بعدين نضيف قطع الدجاج ونضيف عليها الصوص اللي سويناه ونقلبهم .

بس يسخن ويثقل شوي نطفي النار عنه ونقدمه .

 

 

 

 

 

 

 

 

 

 

.
.