| بصل محشي |

.

.

هالشي اللذيذ اللي وعدت ناس كثير أحط طريقته وتأخرت جداً وأعتذر عن هالشي :$

طبعاً تتوقعون أن طعم البصل لاذع .. لا أبداً .

| الطريقة والمقادير مع بعض | :

- للحشوة :

- كاس ونص رز مصري منقوع في ماء لمدة ساعه

- بيالة زيت زيتون

- شوية نعناع مفروم

- حزمة بقدونس مفروم

- 4 حبات طماط مقطعه لقطع صغيره جداً .

- بصله مقطعه قطع صغيره جداً

- فلفل اسود

- مكعبين ماجي ( نحاول نفرمها عشان تذوب بسرعه مع المقادير )

- عصير ليمونتين

- ملعقتين كبيرة دبس رمان" اختياري "

- ملعقة صغيرة كركم

نقلبهم مع بعض ونخليهم على جنب .

نجيب الحين بصل أبيض كبير (العدد براحتكم بس الحشوة بتكون كثيرة على فكرة ممكن تسوون أنواع محاشي مختلفة معاه أو تفرزنون الحشوة لمدة أسبوع وتسوونه مره ثانية ) .

أول شي نقطع البصل من فوق ومن تحت بهالشكل ..

بعدها نحاول نقطعه بشكل خفيف من على جنب للمنتصف مثل كذا ..

يعدين نحطهم في قدر فيه ماي مغلي ونخليه يطبخ مدة نص ساعة تقريباً .. لما نحس انه تفكك شوي وصار لين نوعاً ما ..

بعدها نصفيه ونخليه يبرد شوي ونبدأ ناخذ ورقة - ماعرفت وش أسميها ههه - ونحشيها

هي بالطرف ما تكون مفرودة بشكل كامل .. بالصورة واضح انها مفرودة مره بس هي لا :/

 ونلفها ..

ونصفه في صينية للفرن ونصب عليه صوص التمر الهندي.

عبارة عن : 

[  تمر هندي مذوبينه في كاسين ماي مغلي ونضيف عليه ملعقتين كبيرة سكر ومكعب ماجي و4 ملاعق كبيرة معجون طماط وفلفل أسود ]

التمر الهندي أخذت نص الكمية اللي في الكيس الصغير .. 

.
.

بعدها نغطية بقصدير وندخله الفرن لمدة ساعة إلى ساعة وربع تقريباً .

ونقدمه .

.
.

| كاري الربيان |

 

.
.

 

 

 

 

 

 

 

 

 

 

 

الطريقة أخذتها من الشيف فيصل بالانستغرام @chef_faisaln85 ,

 

يمكن تحسون طريقتها طويلة لكنها ما تاخذ وقت .

 

.
.

| المقادير | :

 

- كيلو ربيان كبير نسبياَ

 

- نصف بصلة كبيرة مقطعه شرايح طويلة

 

- ملعقة صغيرة حبوب الخردل

 

- ملعقتين صغار كركم ( وحدة للربيان ووحدة للكاري )

 

- ملعقة كبيرة ممسوحة كاري

 

- ملعقتين صغار كزبرة .

 

- ملعقة صغيرة بابريكا

 

- ورقتين غار

 

- 4 ملاعق كبيرة زيت

 

- 500 مل مرقة سمك " fish stock " أو مرقة ماجي خضار .

 

- 3/4 علبة حليب جوز هند

 

- 3 ملاعق كبيرة طماط مفروم

 

- ملعقتين معجون طماط

 

- فصين ثوم

 

- ملعقة صغيرة زنجبيل

 

- قبضتين سبانخ

 

- ملعقة كبيرة طحين

 

.
.

 

| الطريقة | :

 

 

- أول شي نقشر الربيان عدل مع فتح الظهر قليلا ونتبله بملعقة صغيرة كركم ونص ملعقة صغيرة ملح ونتركه على جنب .

 

- نسخن الزيت على نار عالية ونضيف فيه حبوب الخردل لمدة دقيقتين .

 

- نخفف النار ونضيف البصل والبهارات وورق الغار والثوم والزنجبيل .

 

- في هالمرحلة نضيف الطحين - عشان يثقل الخليط بعيدين -

 

- نضيف معجون الطماط والطماط , ونقلب ونضيف مرق السمك أو الخضار على دفعات ونخليها تطبخ مدة ربع ساعة إلى ساعة .

 

- قبل التقديم بقليل نضيف حليب جوز الهند والملح والفلفل الأسود .

 

- نشوح الربيان بالزيت دقايق على نار عالية ونضيفه على مرقة الكاري ونضيف السبانخ ونتركه 10 دقايق مو أكثر .

 

نقدمه ونزينه بحليب جوز الهند والكزبرة .

 

 

 

.

.

 

 

| شراب التوت والليمون والحبق |

.
.

 

 

 

 

 

 

 

 

 

 

 

 

شي منعش للصيف وطعم حلو ..

خاصة الحبق معاه معطيه طعم عجيب .

 

ماعرف اسم ثاني للحبق صراحة :/ !

هو مثل النعناع بس طعمه مختلف شوي .

 

 

| الطريقة والمقادير مع بعض | :

 

- عصير نص حبة ليمون أصفر

 

- عصير 3 حبات ليمون أخضر

 

- شراب التوت طريقته هنــــا  ( حطيت الكمية اللي سويتها كلها )

 

- علبتين مياه غازية

 

- ملعقتين سكر

 

- ثلج مجروش

 

- شوي حبق

 

- شرايح ليمون

 

- توت طازج

 

نحرك كل هالشغلات مع بعض ماعدا المياه الغازية والثلج .

قبل التقديم نضيفهم ,

 

* إذا كنتوا بتستبدلون المياه الغازية بالسفن اب أو أي مشروب غازي ثاني ألغوا السكر .

 

 

 

 

.
.

 

 

 

| Raspberry syrup |

.

.

 

 

 

 

 

هذي طريقتي في شراب التوت .

ممكن نحطه مع مياه غازية أو مشروبات غازية , يعطي طعم ولون حلو .

 

 

| المقادير | :

 

 

- كاس توت طازج

 

- 2/3 كاس سكر

 

- ربع كاس ماء

 

 

.
.

 

 

| الطريقة | :

 

 

نقطع التوت بالنص ونحطه مع السكر في قدر ع النار .

 

بيبدأ يطلع ماي .. نقلبه ونخليه على نار هادية لمدة ثلث ساعة تقريباً ..

 

بعدين نضيف ربع كاس ماي ونحركه ونخليه ربع ساعه ع النار

 

بعدها نصفيه ..

 

 

 

 

 

 

 

ونحتفظ فيه بعلبة محكمة , ونحطه بالثلاجة .

 

* ممكن نحتفظ فيه مدة أسبوع .

 

.
.

 

 

 

| شوربة البطاطس والزهرة |

.

.

عندي طريقتها من زمان .. أخذتها من النت ولا أذكر لمين :( .

| المقادير | :

- كوبين زهرة مقطع وردات ,

- كوبين بطاطس مقشرة ومقطعة مكعبات

- فص ثوم مهروس

- مكعب ماجي

- 4 ملاعق زيت

- بصله مفرومه

- رشة ملح وفلفل أسود

- كوبين ماء مغلي

- كوب حليب سايل

- نصف كوب كريمة خفق

| الطريقة | :

نحمس البصل والثوم بالزيت بعدهاا نضيف الزهرة والبطاطس .
نضيف الملح ، الفلفل ، الماء المغلي ونتركه على نار هادية .

نضيف الحليب السايل والكريمة ونخلطه بالخلاط الكاس

ونردجعها ع النار ونخليها تطبخ شوي وبعدين نقدمها .

.

.

 

| مطبّق |

.

.

 

 

 

 

 

 

كل واحد له طريقته في ناس تحطه ع الصاج وتسويه حبه  حبه ,
احنا نسويه قطعه كبيرة وندخلها الفرن وبعدين نقطعها ..

| الطريقة والمقادير مع بعض | :

 

- للحشوة

نحط اللحم المفروم ع النار لما يطلع مويته ثم تنشف ,
بعدين نحط عليه بصل مقطع مكعبات صغيره
ونحط عليه فلفل اسود وملح وشوي بهارات وشوي كزبره مفرومه .

ونقلب لما نحس ان البصل ذبل وكل شي استوى , ونخليه على جنب .

 

نجيب بيضتين ونخفقهم مع شوي ملح وفلفل اسود .
ونجيب كراث مقطع لشرايح صغيره ,

ونحطه على البيض ونحط معهم اللحم ونقلبهم مع بعض .
طبعا نحط اللحم والكراث بكميه مناسبه مع البيض بحيث انه مايصير عندنا البيض كثير ويصير الخليط سايل ويحوسنا .


الحين نجيب ورق المطبق ,
ونحط اللحم فيه بالنص مثل كذا ..



لا حظو ان البيض ما يبين .

ونقفل الاطراف اللي ع اليمين واليسار بـ ( ماي وطحين )

وبعدين نقفل الأطراف اللي فوق وتحت ..

وندهنه بشوي زيت ..

وندخله الفرن لما يتحمر ,

ونطلعه ونقطعه ونقدمه ..

 

 

 

 

 

.
.

 

| أقراص الدجاج |

.

.

سهلة ولذيذة ممكن تقدمينها مع باستا أو رز أو خضار أو تحشين فيها السندوتشات ..

أحب الشغلات اللي لما تسوينها ممكن تسوين منها عدة أطباق بوقت واحد .

.

.

| المقادير |

- نص كيلو دجاج مفروم

- بصله كبيرة مفرومه

- بقدونس مفروم * كميته تقريباً بحجم قبضة اليد أو أقل شوي *

- فصين ثوم متوسطين الحجم مفرومين

- بيضة مخفوقة مع نقطة خل

- 3 ملاعق كبيرة - معيارية - بقسماط

- فلفل اسود

- بهارات مشكلة

- ملح

| الطريقة | :

نخلط المقادير مع بعض ونشكلها على هيئة أقراص دائرية متوسطة الحجم .

بعدين نشويها إما بالفرن أو بالشواية ..

ندهن صينية الفرن أو الشواية بشوي زيت ونحط الأقراص عليها ونخليها ربع ساعة تقريباً لكل جهة .

وبعد كذا نقدمها .

.
.

 

| Crispy Chicken Strips |

.
.

الوصفة أخذتها من عبير السعيد - بالانستغرام - ,

وحبيت أشارككم إياها .

| المقادير و الطريقة مع بعض | :

صدور دجاج مقطعه لشرايح طويلة متبلة بـ :

- بتر ميلك ( كوب حليب + ملعقة خل ) استبدلته بكاس لبن .

- فلفل أسود

- ملح

- بابريكا

- ثوم بودرة

- بهارات دجاج

- أعشاب مجففة , أنا حطيت نعناع وبقدونس مجففين .

نتركها بالثلاجة أقل شي 4 ساعات , عن نفسي خليتها ليلة كاملة

قبل القلي نجهز خلطة الطحين اللي بنغمس الدجاج فيها  وهي عبارة عن :

طحين نخلطة مع ملح وفلفل أسود وشوي بهار و3 إلى 4 ملاعق حليب سائل عشان يكون الخليط على هيئة فتات .

نغمس قطع الدجاج فيه

ونقليها بالزيت على طول ونصفيها بعدين ونقدمها .

* بعض القطع غمستها بطحين عادي قبل بعدين غمستها بالخليط ..

* الوصفة لذيذة والمرة الجاية إذا بسويها بزيد البهارات وبحط شوي ليمون مع التتبيلة طبعاً في ناس ماتحبها كذا بس الناس أذواق

 

| اندومي بالخضار |

.
.

 

 

 

 

 

سهله وتفك أزمة زي ما يقولون :p

 

 

| الطريقة والمقادير مع بعض | :

 

 

نقطع : [ جزر | كوسا | خيار - لحد يستغرب - | فلفل بارد | ملفوف ] لشرايح طويلة ,

 

 

 

 

نحمس الخضار مع البصل الأبيض - مقطع شرايح طويلة -  مع شوي زيت .

 

ومانخليها تذبل .

 

نسلق الأندومي دقايق بس تستوي نص استواء ونصفيها ونضيفها ع الخضار .

 

نقلبها ونضيف صوص عبارة عن :

 

[ معجون طماط | صوص صويا | كاتشب | بهارات الأندومي ]

 

الكميات مثل ماتحبون مرات .

 

ونقلبها دقايق ونقدمها .

 

 

 

.

.

 

 

 

| إلبــه |

.

.

من الحلويات القديمة , التراثية - صح علي كذا :p - ؟

لذيذة مثل الكريم كراميل بالفرن والزعفران والهيل يعطيها طعم مميز وحلو ,

والأهم من كل هذا سهله ..

هي لها طريقتين مافيها إختلاف كبير جداً , بحاول أحط الطريقة الثانية إن شاء الله إن قدرت .

| المقادير | :

- 5 بيضات متوسطات

- ثلث كاس ماي ورد

- كاسين ونص ماي

- علبه كبيرة حليب نستله

- نص ملعقة صغيرة - معيارية - هيل مطحون

- ملعقة صغيرة فانيلا

- زعفران

| الطريقة | :

نخفق المقادير مع بعض ونصبهم في قوالب ونضعهم في حمام مائي ,

وندخلهم في فرن مشغل مسبقاً على درجة حرارة 360 لمدة 30 دقيقة تقريباً ان كانت بقوالب صغيرة

أما إذا كانت في قالب كبير ممكن تاخذ 40 دقيقة .

ونطلعها ونخليها تبرد برا

وبعدين ندخلها الثلاجة لمدة ساعتين ع الأقل ونزينها ونقدمها .

.

* الورد شريته من المطاحن الدولية بالكويت .

.
.