| عصير ليمون بنعناع |

| الطريقه والمقادير مع بعض : |

جيبي نعناع قد قبضة اليد تقريباً .. أو اكثر شوي .
واخلطيه بالخلاط مع 5 ملاعق كبيره سكر وشوي ماي - بس شوي انتبهي لا تكثرين عشان ينخلط معك ولا يصير قطع كبار -

الحين صبي عليه عصير ليمون - نص كاس تقريباً - طازج طبعاً .
وحطي ملعقه كبيره حليب بودره - الملعقه ممسوحه مو مليانه -
وثلج .

وخليهم ينخلطون
الحين صبي عليها 3 كاسات ماي .
وبعدين عاد عدلي اللي تبين .. السكر .. الماي .. الليمون ..اللي هو يعني .
ع اللي يجي على مزاجك

.
.

BrB

| شوكلت تشيز كيك |

| الطريقه والمقادير مع بعض | :

الطبقه الأولى - اللي تحت - :

16 حبة أوريو مطحونه - بدون الكريمه -

+ نص اصبع زبده تقريبا - أو اقل شوي -

نفركهم في بعض ونصفهم بالصينية حقت التشيز كيك ونضغط عليه عشان يتماسك شوي .

وبعدين نغلف الصينيه من برا بقصدير - عشان بنسوي حمام مائي للتشيز كيك ومانبي الماي يدخل ويحوسها -

الحين نسوي الطبقه الثانيه :

بالخلاط اليدوي نخفق :

12 حبة جبن كيري + علبة زبادي لين يتجانسون .

ثم نضيف عليهم حبتين كبار بيض ورشة فانيلا ونخفق - شوي شوي -

وبعدين نضيف عليهم 3 ملاعق كبيره جاناش الشوكولاته - اللي هو كريمة خفق مع كاكاو خام مذوبين -

+ ثلاثة ارباع كاس سكر - ممكن تخلينها كاس كامل ان كنتي تحبينها تكون حالية شوي -

+ 3 ملاعق كبيره بودرة كاكاو .

ونخفقهم شوي شوي لما يتجانسون .

الحين نصبهم شوي شوي ع طبقة الأوريو

ونحط هالصينيه في صينية أكبر منها وفيها ماي دافي وندخلها الفرن ع حرارة 350 ..

ممكن تاخذ ساعه الا ربع وممكن اقل وممكن أكثر .

المهم ان لما نحط اصبعنا بالوسط على خفيف نلاقيها ثابته .

الحين لا استوت نسكر الفرن ونخليها تطبخ داخله لما يبرد الفرن .

عشان لما نطلعها برا ماتتشق علينا من فوق بسبب اختلاف درجة الحرارة فجأه .

عقب مانطلعها نخليها تبرد شوي ونصب عليها طبقة من جاناش الشوكولاته .

و ع الثلاجه .. الأفضل تقعد يوم كامل لما تتماسك بس انا ما امداني .

خليتها يمكن 3 ساعات بس للأسف :/

ولما نجي نقطعها نغمس السكينه بماي دافي شوي عشان تنقطع مضبوط

ونزينها ونقدمها .

اللي بيجربها بيدعي لي ان شاء الله وبيطلق تشيز كيك فاكتوري خخخخ

| فته بصلصة الطماط |

| فته بصلصة الطماط |

هالطريقه اخذتها من " سدن " وغيرت فيها شوي بس .

| الطريقه والمقادير مع بعض | :

نقطع الباذنجان والبطاطس والخبز لمكعبات متوسطه ونقليهم

ونحطهم في صحن فيه منديل عشان يمتص الزيت .

الحين نسوي صوص الطماط :

في الخلاط نحط :

[ حبة طماط مقشره + نص فص ثوم مفروم - صغير - + ملعقه صغيره صلصة طماط + ملعقة كبيره زيت + ملعقه صغيره دبس رمان + نص مكعب ماجي ]

بعد ماينخلطون نحطهم بالنار ونخليه يثقل لما يصير مثل صوص البيتزا

الحين نسوي الصوص الأبيض :

عباره عن :

علبة زبادي + ملعقتين كبيره طحينه + فص ثوم صغير مفروم + ملعقه كبيره مليانه لبنة - افضل شي بينار - + ملح + ليمون - على حسب ممكن عير نص ليمونه ممكن وحده كامله -

الحين نجيب صينية التقديم ونحط فيه بقدونس والباذنجان والبطاطس ونصب شوي من الصوص الأبيض .

ونرجع نحط بقدونس وبطاطس وباذنجان وشوي من الخبز ونصب فوقها الصوص الأبيض وصوص الطماط ونحط بقدونس وباقي الخبز

| فطاير الجبن |

| فطاير الجبن |

هالطريقه رهيبه وفيها شي ممكن البعض بيستغرب منه .
بس لما تذوقونها استحاله تصدقون انه موجود لأن طعمه يقلب زين :D


سوي العجينه اللي تعجبك
انا عن نفسي سويت هذي :

مقادير العجينه :

كاسين طحين
ربع كاس زيت
رشة ملح
ملعقه كبيره خميره فوريه
ملعقتين كبيره سكر
كاس حليب سائل دافئ مو مغلي - مثل حليب السعوديه -
ملعقة ونص صغيرة باكنج باوردر

الطريقه :

نحط السكر والخمير والبكنج باودر على الحليب ونتركه 5 دقايق
وبعدها - اذا كنتي بعجنينها بيدك ضيفي الحليب واللي معه شوي شوي ع الطحين واعجني -

واذا كنتي بتعجنينها بالآله ،
ضيفي الحليب اول بعدين الطحين مع الزيت

لما تنعجن غطيها ببلاستك وخليها تتخمر ساعه .

الحين نسوي الحشوه :
عباره عن :
جبن كيري + فلفل احمر بارد مقطع صغااار + بصل ابيض - تقريبا ربع حبه - مقطع صغااااار
وخلي كمية الجبن ضعف كمية الفلفل والبصل .
حركيهم مع بعض لما يصيرون متجانسين

الحين نفرد العجينه ونخلي جزء ع الفراده - بتشوفون بالصوره -
ونحط عليها الحشوه ،



ونرفع الطرف اللي ع الفراده ونغطي فيه - كننا نلحف الجبن D11 -
مثل كذا :





ونقطعها مثل كذا :



وناخذها حبه حبه ونبرمها ونحطها بصينيه مدهونه بزيت وندهن الفطاير ببيض أو حليب سائل - مثل بوني وكذا -
ماكان عندي فايتخدمت حليب نيدو مع ماي :(




وندخلها الفرن لما تستوي ونحمرها من فوق




ونقدمها

| جبنية بالتويكس |

| جبنية بالتويكس |

للجبنيه :

كاسين طحين ابيض
كاس جبن سايل - صغير -
بيضه
ملعقه كبيره خميره
رشة ملح
ملعقه كبيره سكر

نعجنها بحليب لين تصير لينه .
ونخليها تتخمر .


بعدين نفردها - نحط طحين ع المكان اللي بنفرد فيه عشان ماتلصق -
ونقطعها دوائر ونحط فيها قطع تويكس صغيره ونكورها ونقليها في زيت غزير .

ونحطها في صحن عليه منديل عشان تنشف من الزيت
ونزينها ونقدمها .

هنا صوره عقب ماقطعته عشان يبين ان التويكس ذايب D12

| تورتيا الدجاج بالشطه |

.

.

| تورتيا الدجاج بالشطه |

| الطريقة والمقادير مع بعض | :

بالنسبه للدجاج :

نفس طريقة الدجاج اللي بالشطه ( هنا )

نجيب خبز تورتيا وندهنه بهالصوص :

[ خردل + مايونيز + كاتشب ] - مخلوطين مع بعض -

ونحط الدجاج مع خس مقطع وجبن مبشور - حطيت موزاريلا -

ونلفها ونقدمها .

 

 

 

 

 

.
.

 

 

| دجاج بالشطه |

| دجاج بالشطه |

للي يحبون الشطه ويحبون الحار مره ..
بصراحه اخذت طريقته من عضوه اسمها - فهاوه - في منتدى وغيرت شغلات بسيطه فيه .

امممم احس اقرب طعم له بافلو تشكن :/

| الطريقه والمقادير مع بعض | :

بالنسبه للدجاج
اخذت صدور دجاج وقطعتها مكعبات متوسطه .
وتبلتها بليمون وثوم .

بعدين اخذت الدجاج حبه حبه وغمسته في :
[ طحين + بهارات مشكله - ملعقه صغيره تقريبا - + شوي بابريكا + فلفل اسود + ملح ]

عقب مانخلص منهم كلهم ونغمسهم المره الأولى نغسمهم ثانيه عشان تصير الطبقه سميكه شوي .

الحين نخليه بالفريز نص ساعه ،
ونقليه بس يتحمر خفيف .

ونشيله .

ونحطه على منديل عشان يمتص الزيت .

الحين نسوي الصوص :

ع النار :

[ 3 ملاعق كبيره - ممسوحه - سكر بني + 4 ملاعق كبيره كاتشب + ربع علبة شطة - ابو ديك لأنها بارده شوي  - + حطيت علبه صغيره شطة تباسكو - الصغيره مره اللي بالصوره - ]

لما يطبخ شوي .

الحين نجيب صينية للفرن ونحط فيها قصدير ونحط الدجاج فيه - انا حطيت نص الكميه -




ونصب شوي من الصوص عليه ونقلب شوي .
ونضيف الدجاج الباقي والصوص الباقي ونقلب شوي .



ونغطيه بباقي القصدير وندخله الفرن نص ساعه .



وبعدين نطلعه ونقدمه ،







انا سويت معه صوص عشان يبرد علينا
عباره عن :
[ ملعقتين مايونيز + بصل اخضر مقطع + ملح + فلفل اسود + ثوم بودره .. بعدين نبدا نخففه بلبن لما يصير الخليط لاهو سايل مره ولا ثقيل ]





وبعدين بالنهايه كلناه مع رز

| حلى المنقا |

.

.

من الحلويات اللي نسويها من سنين ..

| الطريقه والمقادير مع بعض | :

الطبقه الأولى :

كيك بالفانيلا - تبين الجاهز تبين انتي تسوينه براحتك -

نقطعه لشرايح ونصفه بصينيه ونضغط عليه عشان يتماسك مع بعض .

الطبقه الثانيه :

بالخلاط :

- 6 حبات جبن كيري ..

- علبة كبيره قشطة " قيمر " - لأنها تجي اثقل -

- كاس عصير منقا ( كي دي دي ) افضل شي

إذا ماتوفر نستخدم " نادك "

- ظرفين دريم ويب 

نخلطهم و نصبهم ع الكيك وندخلهم الثلاجه .

الطبقة الثالثه :

ع النار :

كاسين عصير منقا + 4 ملاعق كبيره نشا + ملعقتين كبيره سكر .

ونحركهم لما يثقلون .

عقب نسكر عنه النار ..

ونحطه بالثلاجه نص ساعه تقريبا عشان يبرد

وبعدها نصبه بشويش على اللي حطيناه بالثلاجة ،

ونحطه بالثلاجه لمدة 4 ساعات اقل شي .

ونزينه بشرايح كيوي و نقدمه .

| بابا غنوج |

هالطريقه من وحده لبنانيه ..
عطتني اياها وحده تعرفها يعني ان شاء الله مضمونه <- قصة حياتي

| الطريقة والمقادير مع بعض |

اول شي ناخذ باذنجان ونقطعه شرايح طويله - ماتكون سميكه ولا رقيقه مره -
وندهنها بزيت





ونحطها بصينية فرن ونغطيها بقصدير - عشان مانبيها تتحمر قد مانبيها تكون مستويه وبس -

تقريبا تاخذ نص ساعه ممكن اكثر وممكن اقل .


عقب ماتستوي نشيل القشر منها وبسرعه بينشال معنا .
وعقب نبدى نهرسها - ممكن نحطيها بالخلاط بس تاخذ لفه وحده فيه مو اكثر -

ونصب عليه عصير نص ليمونه ونقلبه عشان مايسوّد
ونضيف عليه فص ثوم مهروس وفلفل اسود وملح .

وعقب نضيف عليه :

طماط  مقطع صغار - انا ما احبه ابد بالسلطات فماحطيته -
فلفل اخضر بارد مقطع قطع صغار مره .
فلفل احمر بارد مقطع قطع صغار مره . - اختياري -
بصل اخضر مقطع صغار
نعناع طازج مفروم
بقدونس مفروم .





الكميه على حسب الباذنجان مافيه مقادير محدده .. تضيفينها بحيث انه ماتكون اكثر من الباذنجان ويصير مايبين .

عقب مانضيفها ونحركهم نضيف عليهم زيت زيتون ودبس رمان - مانكثر مره ونغرقه عاد -

وتقدمينها

انا حنا كنت حاطه تحت كقاعده باذنجان مقطع شرايح دائريه ومشوي .
وحطيت المحروس فوقها