| مطعم فوشي FUSHI .. التقرير اثاني |

.

.

 

 

أهلاً  أهلاً

 

مثل ماتشوفون العنوان هالمرة بكتب لكم تقريرعن مطعم من المطاعم المفضلة عندي ..

 

مطعم فوشي FUSHI

 

موقعه بالخبر عند الواجهة البحرية جنب أب تاون

 

المكان شرح ويدخله نور الشمس وهذا الشي يعجبني

لكن غالباً يكون زحمة وإزعاج شوي :/

 

عشان كذا مرات أفضل أطلب ويوصلونه للبيت

وهذا رقمهم :

 

0138989595

 

هالمطعم  سبق وكتبت عنه تقرير قديم جداً هذا الرابط حقه :

 

| مطعم Fushi .. الخبر |

 

وهذا التقرير بيكون تحديث ..

 

المنيو صار مصور على الآيباد ..

 

وطلباتنا كانت :

 

 

 

 

عصير ليمون بنعناع ..

 

مو لي فما أدري هل هو مضبوط أو لا :$

 

 

 

 

 

 

 

شوربة توم يم ..

 

من الشوربات المفضلة عندنا وأعجبت اختي .

 

بس ثقيلة نوعاً ما  مو خفيفة  .

 

ما أقدر أكتب عنها بالتفصيل لأني ما جربتها هالمرة .

 

 

 

 

فنكي تشكن رولز ..

 

هو عبارة عن سبرنغ رول مقطع بشكل مايل

 

محشي دجاج مبهر وخضار ..

 

الطبقة الخارجية مقرمشة ومو شاربه زيت كثير ..

 

طعمه لذيييذ ومو أول مره أطلبه :$

 

 

 

 

 

وهذي التشيلي بيف نودلز ..

 

من ألذ أنواع النودلز اللي عندهم

 

خفيفة ما تغث ..

 

اللحم مقطع لقطع صغيرة ..

كمية الخضار ممتازة ومتناسبة مع النودلز

 

باختصار ممتازة

 

 

 

 

 

 

طالعوها على راحتكم .!

 

 

 

 

 

 

 

 

 

وهذا التشيكن تبنياكي

 

طبق أخوي المفضل ..

 

الصوص اللي معاه فيه نسبة حلاوه بسيييطه

وفيه ثوم محموس

 

يجي مع خضار مسلوقة ورز من اختياركم .

 

 

 

 

سوشي ..

 

كريزي كالفورنيا ..

 

سوشي محشي بكراب وخيار وأفوكادو ومايونيز ياباني

ومن فوق كراب ومايونيز ياباني

 

لذيذ مره

 

 

 

 

تمقلوا رعاكم الله ..

 

 

 

 

 

نجي لهالطبق الجديد

 

كاجامي راب

 

كأنها سوشي بس مو مقطع لقطع صغيرة ..

 

تورتيا محشية رز وكراب وخيار ومنقا وماينويز ياباني ..

 

تتقدم مع سلطة البابايا وبطاطس ..

 

الطعم لذيذ صراحة لكن تمنيت إن في مثلها سوشي ..

 

وسلطة البابايا لذيذة حبيتها مره

 

والبطاطس أو الفرنش فرايز للكول أعجبتني إنها ناشفة مافيها زيت أبد ومبهرة ببابريكا..

 

أختي صارت تطلبه دايم من بعد ذاك اليوم :/

 

 

 

 

وبكذا خلصت التقرير السريع عن مطعم فوشي .

 

من زمان ما كتبت تقارير فأحس إني حايسة ههههه :$

 

 

.

.

 

 

عوداً حميداً يا ( أنا ) ..!

 

.

.



 

 

 

 

 

 

مثل ما انتو شايفين بالصورة

 

من قراراتي لسنة 2016 العودة للمدونة بعد ما انقطعت أكثر من سنتين عن التدوين .

 

لكل شخص أهداف يطمح لتحقيقها سواء على الصعيد المهني أو العلمي أو الشخصي وغيره .

 

من أهدافي للمدونة لهذه السنة تخطي حاجز المليون مشاهدة بإذن الله ..

 

كيف بيتحقق ؟

 

حطيت لي خطة بمشي عليها بإذن الله وراح تشوفون بعض التغييرات الحلوة بالمدونة ..

 

وأكيد كل شي بيتحقق بعد إرادة الله ودعمكم لي وتشجيعكم .

 

.
.

 

حب العطاء من أهم الأشياء اللي كانت تعطي معنى لحياتي وفقدت جزء من جمال هالشي لما انقطعت عن التدوين .

 

كنت أتحمس أحط لكم الوصفات وتقارير لمطاعم .. أحب أقرأ تعليقاتكم ودعواتكم لما تضبط معاكم الوصفة ..

 

كان تأثير إيجابي فقدته ، صحيح بالانستغرام لقيت دعواتكم الطيبة وتعليقاتكم الحلوة لكن يبقى التدوين مختلف ما أعرف ليه .

 

اشتقت لكم وبرجع لكم بالأفضل بإذن الله ..

 

أحبكم وشكراً لتعليقاتكم الحلوة مقدماً ( كيف الثقة هههه ؟ )

.
.


( حوّل أحلامك لأهداف )

فكّر .. خطط .. نفّذ

أتمنى إن هالموضوع يكون بداية حلوة للمدونة
ويشجعكم تحددون أهدافكم لهذه السنة وتخططون لها
وتحققون اللي تطمحون له .



 

 

.

.

 

 

 

 

| بصل محشي |

.

.

هالشي اللذيذ اللي وعدت ناس كثير أحط طريقته وتأخرت جداً وأعتذر عن هالشي :$

طبعاً تتوقعون أن طعم البصل لاذع .. لا أبداً .

| الطريقة والمقادير مع بعض | :

- للحشوة :

- كاس ونص رز مصري منقوع في ماء لمدة ساعه

- بيالة زيت زيتون

- شوية نعناع مفروم

- حزمة بقدونس مفروم

- 4 حبات طماط مقطعه لقطع صغيره جداً .

- بصله مقطعه قطع صغيره جداً

- فلفل اسود

- مكعبين ماجي ( نحاول نفرمها عشان تذوب بسرعه مع المقادير )

- عصير ليمونتين

- ملعقتين كبيرة دبس رمان" اختياري "

- ملعقة صغيرة كركم

نقلبهم مع بعض ونخليهم على جنب .

نجيب الحين بصل أبيض كبير (العدد براحتكم بس الحشوة بتكون كثيرة على فكرة ممكن تسوون أنواع محاشي مختلفة معاه أو تفرزنون الحشوة لمدة أسبوع وتسوونه مره ثانية ) .

أول شي نقطع البصل من فوق ومن تحت بهالشكل ..

بعدها نحاول نقطعه بشكل خفيف من على جنب للمنتصف مثل كذا ..

يعدين نحطهم في قدر فيه ماي مغلي ونخليه يطبخ مدة نص ساعة تقريباً .. لما نحس انه تفكك شوي وصار لين نوعاً ما ..

بعدها نصفيه ونخليه يبرد شوي ونبدأ ناخذ ورقة - ماعرفت وش أسميها ههه - ونحشيها

هي بالطرف ما تكون مفرودة بشكل كامل .. بالصورة واضح انها مفرودة مره بس هي لا :/

 ونلفها ..

ونصفه في صينية للفرن ونصب عليه صوص التمر الهندي.

عبارة عن : 

[  تمر هندي مذوبينه في كاسين ماي مغلي ونضيف عليه ملعقتين كبيرة سكر ومكعب ماجي و4 ملاعق كبيرة معجون طماط وفلفل أسود ]

التمر الهندي أخذت نص الكمية اللي في الكيس الصغير .. 

.
.

بعدها نغطية بقصدير وندخله الفرن لمدة ساعة إلى ساعة وربع تقريباً .

ونقدمه .

.
.

| كاري الربيان |

 

.
.

 

 

 

 

 

 

 

 

 

 

 

الطريقة أخذتها من الشيف فيصل بالانستغرام @chef_faisaln85 ,

 

يمكن تحسون طريقتها طويلة لكنها ما تاخذ وقت .

 

.
.

| المقادير | :

 

- كيلو ربيان كبير نسبياَ

 

- نصف بصلة كبيرة مقطعه شرايح طويلة

 

- ملعقة صغيرة حبوب الخردل

 

- ملعقتين صغار كركم ( وحدة للربيان ووحدة للكاري )

 

- ملعقة كبيرة ممسوحة كاري

 

- ملعقتين صغار كزبرة .

 

- ملعقة صغيرة بابريكا

 

- ورقتين غار

 

- 4 ملاعق كبيرة زيت

 

- 500 مل مرقة سمك " fish stock " أو مرقة ماجي خضار .

 

- 3/4 علبة حليب جوز هند

 

- 3 ملاعق كبيرة طماط مفروم

 

- ملعقتين معجون طماط

 

- فصين ثوم

 

- ملعقة صغيرة زنجبيل

 

- قبضتين سبانخ

 

- ملعقة كبيرة طحين

 

.
.

 

| الطريقة | :

 

 

- أول شي نقشر الربيان عدل مع فتح الظهر قليلا ونتبله بملعقة صغيرة كركم ونص ملعقة صغيرة ملح ونتركه على جنب .

 

- نسخن الزيت على نار عالية ونضيف فيه حبوب الخردل لمدة دقيقتين .

 

- نخفف النار ونضيف البصل والبهارات وورق الغار والثوم والزنجبيل .

 

- في هالمرحلة نضيف الطحين - عشان يثقل الخليط بعيدين -

 

- نضيف معجون الطماط والطماط , ونقلب ونضيف مرق السمك أو الخضار على دفعات ونخليها تطبخ مدة ربع ساعة إلى ساعة .

 

- قبل التقديم بقليل نضيف حليب جوز الهند والملح والفلفل الأسود .

 

- نشوح الربيان بالزيت دقايق على نار عالية ونضيفه على مرقة الكاري ونضيف السبانخ ونتركه 10 دقايق مو أكثر .

 

نقدمه ونزينه بحليب جوز الهند والكزبرة .

 

 

 

.

.

 

 

| شراب التوت والليمون والحبق |

.
.

 

 

 

 

 

 

 

 

 

 

 

 

شي منعش للصيف وطعم حلو ..

خاصة الحبق معاه معطيه طعم عجيب .

 

ماعرف اسم ثاني للحبق صراحة :/ !

هو مثل النعناع بس طعمه مختلف شوي .

 

 

| الطريقة والمقادير مع بعض | :

 

- عصير نص حبة ليمون أصفر

 

- عصير 3 حبات ليمون أخضر

 

- شراب التوت طريقته هنــــا  ( حطيت الكمية اللي سويتها كلها )

 

- علبتين مياه غازية

 

- ملعقتين سكر

 

- ثلج مجروش

 

- شوي حبق

 

- شرايح ليمون

 

- توت طازج

 

نحرك كل هالشغلات مع بعض ماعدا المياه الغازية والثلج .

قبل التقديم نضيفهم ,

 

* إذا كنتوا بتستبدلون المياه الغازية بالسفن اب أو أي مشروب غازي ثاني ألغوا السكر .

 

 

 

 

.
.

 

 

 

| Raspberry syrup |

.

.

 

 

 

 

 

هذي طريقتي في شراب التوت .

ممكن نحطه مع مياه غازية أو مشروبات غازية , يعطي طعم ولون حلو .

 

 

| المقادير | :

 

 

- كاس توت طازج

 

- 2/3 كاس سكر

 

- ربع كاس ماء

 

 

.
.

 

 

| الطريقة | :

 

 

نقطع التوت بالنص ونحطه مع السكر في قدر ع النار .

 

بيبدأ يطلع ماي .. نقلبه ونخليه على نار هادية لمدة ثلث ساعة تقريباً ..

 

بعدين نضيف ربع كاس ماي ونحركه ونخليه ربع ساعه ع النار

 

بعدها نصفيه ..

 

 

 

 

 

 

 

ونحتفظ فيه بعلبة محكمة , ونحطه بالثلاجة .

 

* ممكن نحتفظ فيه مدة أسبوع .

 

.
.

 

 

 

| شوربة البطاطس والزهرة |

.

.

عندي طريقتها من زمان .. أخذتها من النت ولا أذكر لمين :( .

| المقادير | :

- كوبين زهرة مقطع وردات ,

- كوبين بطاطس مقشرة ومقطعة مكعبات

- فص ثوم مهروس

- مكعب ماجي

- 4 ملاعق زيت

- بصله مفرومه

- رشة ملح وفلفل أسود

- كوبين ماء مغلي

- كوب حليب سايل

- نصف كوب كريمة خفق

| الطريقة | :

نحمس البصل والثوم بالزيت بعدهاا نضيف الزهرة والبطاطس .
نضيف الملح ، الفلفل ، الماء المغلي ونتركه على نار هادية .

نضيف الحليب السايل والكريمة ونخلطه بالخلاط الكاس

ونردجعها ع النار ونخليها تطبخ شوي وبعدين نقدمها .

.

.

 

| مطبّق |

.

.

 

 

 

 

 

 

كل واحد له طريقته في ناس تحطه ع الصاج وتسويه حبه  حبه ,
احنا نسويه قطعه كبيرة وندخلها الفرن وبعدين نقطعها ..

| الطريقة والمقادير مع بعض | :

 

- للحشوة

نحط اللحم المفروم ع النار لما يطلع مويته ثم تنشف ,
بعدين نحط عليه بصل مقطع مكعبات صغيره
ونحط عليه فلفل اسود وملح وشوي بهارات وشوي كزبره مفرومه .

ونقلب لما نحس ان البصل ذبل وكل شي استوى , ونخليه على جنب .

 

نجيب بيضتين ونخفقهم مع شوي ملح وفلفل اسود .
ونجيب كراث مقطع لشرايح صغيره ,

ونحطه على البيض ونحط معهم اللحم ونقلبهم مع بعض .
طبعا نحط اللحم والكراث بكميه مناسبه مع البيض بحيث انه مايصير عندنا البيض كثير ويصير الخليط سايل ويحوسنا .


الحين نجيب ورق المطبق ,
ونحط اللحم فيه بالنص مثل كذا ..



لا حظو ان البيض ما يبين .

ونقفل الاطراف اللي ع اليمين واليسار بـ ( ماي وطحين )

وبعدين نقفل الأطراف اللي فوق وتحت ..

وندهنه بشوي زيت ..

وندخله الفرن لما يتحمر ,

ونطلعه ونقطعه ونقدمه ..

 

 

 

 

 

.
.