| حلى الجاناش بالشوكولاته البيضاء |

.
.









سهل ومايبيله .

عباره عن 4 طبقات - طبقتين منهم نفس الشي -


الطبقه الأولى - اللي تحت :

كيك فانيلا مفتت .. نحط في القاع من الكاس او صحن التقديم .


الطبقه الثانيه :

صوص الفراوله - مثل اللي في طريقة كيك الفيلادلفيا -


الطبقة الثالثه :

كاس من جاناش الشوكولاته البيضا ..
مثل طريقة الجاناش بالشوكلاته اللهم هنا حطيت الشوكولاته البيضا .

اللي هي ع النار :
نحط علبه كريمة خفق - المراعي العلبه الصغيره -
ونخليها لما تغلي .

الحين نصبها على 300 جرام من الشوكولاته البيضا تكون مقطعه صغار عشان تذوب بشكل اسرع .

ونحركها لما تذوب وتنخلط مع الكريما .

نخليها تبرد .

وبعدين ناخذ منها مقدار كاس ،

نخلطه بالخلاط مع : [ نص علبة لبنة بينار + 8 حبات جبن كيري ]

ونصبها كطبقة ثالثه .



الطبقة الرابعه :
صوص الفراوله .

ونزينها بفراوله ونعناع .











يقال بوريكم من داخل كيف .!





.
.

| كيكة الفيلادلفيا |

.
.




















سهله ولذيذه ومايبيلها
لكل اللي مايحبون طعم الكريمه الحاليه هذي تعتبر خيار حلو لهم

عباره عن :
كيكه بالفانيلا
صوص الفراوله
كريمة الفيلادلفيا

بالنسبه للكيكه نفسها ،
استخدمي أي كيكه بيضاء بالفانيلا تعجبك .
انا عن نفسي اسوي حقت بيتي كروكر اسهل ،

عقب ماتسوتي تخلينها تبرد
وتقطعينها لمكعبات صغيره

أو ممكن تحطينها بصينيه مربعه وبس تقطعين الأطراف المتحمره .

عقب نقطعها من النص .

وندهنها بـصوص الفراوله ،

عباره عن :
ع النار نحط فراوله - المجمده تنفع - مقدار كاس تقريباً
+ 5 إلى 6 ملاعق كبيره مليانه سكر بودره .

نحركهم ع النار لما تبدى الفراوله تطلع الماي حقها .
عقب نقصر ع النار شوي وونحرك مدة 10 دقايق الى ربع ساعه .

الحين نخلطه بالخلاط .

وصار عندنا صوص الفراوله اللي ندهن فيه الكيكه من داخل .. كذا :





طبعا نكثر شوي وانتبهوا .. لا تقربون من الاطراف مثل ماسويت .
لأن بعدين لما تغطونها بكريمه بتحوسكم .

الحين نحط الطبقتين اللي قصيناهم على بعض وندهنهم بالكريمه ،

الكريمه عباره عن :

نص اصبع زبده - بدرجة حرارة الغرفه -
+ 4 الى 5 ملاعق سكر بودره - مو مليانه -

نخفقهم لما يتجانسون
ثم نضيف عليهم علبة فيلادلفيا - الصغيره أم 200 جرام -
ونخفق بس مانطول مره .. أول مانشوفهم تجانسو نوقف .
وطبعاً ان حسيتو السكر قليل بالنسبه لكم زيدوه وحركو بالملعقه .

انا عن نفسي كمية السكر هذي تعجبني .

الحين ندهن الكيكه بالكريمه ونساويها :





ونصب شوي من فوق صوص الفراوله .
ونزينها بالفراوله والتوت والريحان ،















.
.

| كبه بـ لبن |

.













مسويتها من رمضان بس توني اتفرغ وأحطها :/

الطريقه اللي كنت اسويها أول بالنسبه للكبه أني أحطها بالفرن ،

لكن هالمره قليتها .
وحطيتها بصحن فيه منديل عشان يمتص الزيت .

وسويت الصوص اللي معها :

بالخلاط نحط [ 3 علب زبادي / كاس ونص حليب / شوي بقدونس ]
نحطها ع نار متوسطه ونقلب ونضيف عليها مكعب ماجي و3 ملاعق صغيره نشا .

ونحرك لما يبدى يثقل شوي .

الحين نقوم نجيب فص ثوم صغير ونفرمه ونحطه النار مع شوي زيت ونضيف عليها كزبره مفرومه ،

ونضيفها ع الزبادي .

الحين نصب الصوص بصحون تقديم وحط الكبه ..
ونحط عليها صنوبر محمر + نعناع مجفف .









* لو كنتو تبون الكبه مطبوخه معها تقدرون تحطونها آخر شي عقب ماتستوي ويستوي الصوص وتخلونها تطبخ معه 10 دقايق لربع ساعه .

* بالنسبه للصحون تراها من سعد الدين


.
.

| حلى الشمام بالبشاميل |

.
.

كني أشوف عيونكم تلوقس يمين ويسار ؟
وأنا اسويه خفت ان يطيح بكبدي ومحد ياكله بس الحمدلله جاز لهم




غريب ورهيب ..
وثقيل نوعاً ما .

للي يحبون التغيير

وبالمره نقدر نصرف هالشمام اللي يجبه ابوي كل كم يوم ..
زهقنا كل شوي نسوي منه عصير

نجيب قطع شمام ونقطعها ونحطها بصحون السوفليه .
نعبي الصحن للنص بس .

الحين نسوي البشاميل :

ع النار نحط زبده - انا تقريباً حطيت ملعقتين كبار -
ونحط الطحين - تقريبا حطيت من 3 لأربع ملاعق كبيره -
الطحين بالنظر احطه ماعتمد على كميه محدده .
واحرك لما يصير متجانس مع الزبده .

اضيف عليه حليب سايل - مقدار كاسين تقريباً -
اضيف شوي شوي ما اضيف كله مره وحده .

واحركه لما يغلي ويتجانس مع الطحين والزبده - عشان مايتكتل -
وابدى اضيف شوي بعد .. وكذا لما تخلص الكميه اللي عندي أو لما تشوفونه صار ثقيل شوي مو مره .

لأنه بيثقل زود لما يبرد .


الحين قبل لا نصبه فوق الشمام .
نرش شوية سكر ع الشمام ،

ونصبه عليه .
وندخله الفرن ابو ربع ساعه كذا ونحمره من فوق .

وعقب مايستوي نطلعه يبرد من ثلث إلى نص ساعه تقريباً .
حلاته ينوكل دافي ،
ونحط عليه آيس كريم فانيلا ..

عشان نعادل كمية السكر + عشان يطلع أحسن بكثير بصراحه من لما ينوك كذا .. أحسه يكون اثقل لو ينوكل لحاله مدري ليه .


طبعاً هنا ما امداني حطيت الآيس كريم الا ذاب على طول :/

وزينته بشمام مقطع شرايح رفيييعه عشان يقال تعرفون ان اللي داخل شمام




وهنا صوره تبين فيها طبقة البشاميل






.
.

| دجاج بالليمون والأعشاب |

.
.









| الطريقه والمقادير مع بعض | :


نقطع الدجاج لمكعبات متوسطه - انا هنا قطعتها صغيره لأن كنت بسويها ساندوتشات بس قالو يبون رز وغيرت الطبخه -

ونحط معها عصير ليمونه + ملعقه كبيره خل
انا خليتها تتبل قبل بليلة وخليتها بالثلاجه عشان يطلع طعم الليمون فيها .

عقب ماتتبل الدجاج .
ع النار نحط بصل ابيض مقطع شرايح طويله مع شوي زيت ونحرك لما يذبل ونضيف الدجاج عليه .

ونحركه ونخليه لما ينشف الماي حقه ونضيف عليه جزر مقطع شرايح .
ونرش عليه شوي : روزماري مجفف - اكليل الجبل - + ريحان مجفف .

وشوي كركم وفلفل اسود وملح .

ونقلبهم ..
ونضيف عليه تقريباً ربع كاس صوص الورستاشير
ونحركهم ونخليهم من 5 الى 10 دقايق بس .

ونضيف عليهم قطع طماط صغيره مو مقطعه - هذي حجمها صغير مره اصغر من الشيري توميتو العاديه -
وشرايح ليمون ،
ونقلب دقيقتين .

عقب مانسكر النار نضيف عليه بصل اخضر مقطع ونقلبه دقيقه ونقدمه .




.
.

| حلى الكوفي |

..

حلى سهل وللي يحبون نكهة الكوفي بالحلويات مثلي بيعجبهم ان شاء الله .

الحلى سهل وخطواته بسيطه لكن بشرحه بالتفصيل شوي لتفادي بعض الأخطاء اللي ممكن تخربه عليكم .

عباره طبقتين ،

الطبقه الأولى - اللي تحت - :
بقدر ع النار نحط :

[ ملعقتين كبار حليب بودره + كاس ماي + ظرف كريم كراميل + ملعقه كبيره نسكافيه ]

ونحركها لما يبدى يغلي ويثقل شوي .

الحين نحطه بالخلاط مع " علبة قشطه + كاس ونص كيك فانيلا مفتت " .

يعني نجيب كيك فانيلا جاهز أو مسوينه

ونفتته بيدنا أو بخلاط .

ثم ناخذ منه مقدار كاس ونص .

المهم عقب مانخلط هذولا كلهم

نصبهم كطبقه أولى ،

ونحطهم بالفريز على ماتسوي الطبقه الثانيه ..

الطبقه الثانيه :

في قدر ع النار :

[ كاس ماي + ظرف كريم كراميل + ملعقتين كبار كاكاو بودره - مو مليانه - + ملعقتين كبار نسكافيه - مو مليانه - ]

هالطبقه مره بتكون ترى .. ممكن تحطون ملعقة وحده نسكافيه لو تحبون .

ونحركها لما تبدى تغلي وتثقل شوي .

الحين نروح بالملعقه نصب الطبقه الثانيه ..

يعني مانصبها صب ع الكاسات لا شوي شوي

عشان لا تحوس الشكل .

ونحاول نسرع واحنا نصب عشان لاتجمد وتتكل .

وعقب نخليها بالثلاجه ساعه اقل شي .

وتزينها بكريمه .

زينه بأكثر من شكل :

* ممكن استبدال الطبقه اللي فوق بشوكلت جاناش

* هالحلى ماينفع بغير الكاسات

.

.

| عصير ليمون بنعناع |

| الطريقه والمقادير مع بعض : |

جيبي نعناع قد قبضة اليد تقريباً .. أو اكثر شوي .
واخلطيه بالخلاط مع 5 ملاعق كبيره سكر وشوي ماي - بس شوي انتبهي لا تكثرين عشان ينخلط معك ولا يصير قطع كبار -

الحين صبي عليه عصير ليمون - نص كاس تقريباً - طازج طبعاً .
وحطي ملعقه كبيره حليب بودره - الملعقه ممسوحه مو مليانه -
وثلج .

وخليهم ينخلطون
الحين صبي عليها 3 كاسات ماي .
وبعدين عاد عدلي اللي تبين .. السكر .. الماي .. الليمون ..اللي هو يعني .
ع اللي يجي على مزاجك

.
.

BrB

| شوكلت تشيز كيك |

| الطريقه والمقادير مع بعض | :

الطبقه الأولى - اللي تحت - :

16 حبة أوريو مطحونه - بدون الكريمه -

+ نص اصبع زبده تقريبا - أو اقل شوي -

نفركهم في بعض ونصفهم بالصينية حقت التشيز كيك ونضغط عليه عشان يتماسك شوي .

وبعدين نغلف الصينيه من برا بقصدير - عشان بنسوي حمام مائي للتشيز كيك ومانبي الماي يدخل ويحوسها -

الحين نسوي الطبقه الثانيه :

بالخلاط اليدوي نخفق :

12 حبة جبن كيري + علبة زبادي لين يتجانسون .

ثم نضيف عليهم حبتين كبار بيض ورشة فانيلا ونخفق - شوي شوي -

وبعدين نضيف عليهم 3 ملاعق كبيره جاناش الشوكولاته - اللي هو كريمة خفق مع كاكاو خام مذوبين -

+ ثلاثة ارباع كاس سكر - ممكن تخلينها كاس كامل ان كنتي تحبينها تكون حالية شوي -

+ 3 ملاعق كبيره بودرة كاكاو .

ونخفقهم شوي شوي لما يتجانسون .

الحين نصبهم شوي شوي ع طبقة الأوريو

ونحط هالصينيه في صينية أكبر منها وفيها ماي دافي وندخلها الفرن ع حرارة 350 ..

ممكن تاخذ ساعه الا ربع وممكن اقل وممكن أكثر .

المهم ان لما نحط اصبعنا بالوسط على خفيف نلاقيها ثابته .

الحين لا استوت نسكر الفرن ونخليها تطبخ داخله لما يبرد الفرن .

عشان لما نطلعها برا ماتتشق علينا من فوق بسبب اختلاف درجة الحرارة فجأه .

عقب مانطلعها نخليها تبرد شوي ونصب عليها طبقة من جاناش الشوكولاته .

و ع الثلاجه .. الأفضل تقعد يوم كامل لما تتماسك بس انا ما امداني .

خليتها يمكن 3 ساعات بس للأسف :/

ولما نجي نقطعها نغمس السكينه بماي دافي شوي عشان تنقطع مضبوط

ونزينها ونقدمها .

اللي بيجربها بيدعي لي ان شاء الله وبيطلق تشيز كيك فاكتوري خخخخ

| فته بصلصة الطماط |

| فته بصلصة الطماط |

هالطريقه اخذتها من " سدن " وغيرت فيها شوي بس .

| الطريقه والمقادير مع بعض | :

نقطع الباذنجان والبطاطس والخبز لمكعبات متوسطه ونقليهم

ونحطهم في صحن فيه منديل عشان يمتص الزيت .

الحين نسوي صوص الطماط :

في الخلاط نحط :

[ حبة طماط مقشره + نص فص ثوم مفروم - صغير - + ملعقه صغيره صلصة طماط + ملعقة كبيره زيت + ملعقه صغيره دبس رمان + نص مكعب ماجي ]

بعد ماينخلطون نحطهم بالنار ونخليه يثقل لما يصير مثل صوص البيتزا

الحين نسوي الصوص الأبيض :

عباره عن :

علبة زبادي + ملعقتين كبيره طحينه + فص ثوم صغير مفروم + ملعقه كبيره مليانه لبنة - افضل شي بينار - + ملح + ليمون - على حسب ممكن عير نص ليمونه ممكن وحده كامله -

الحين نجيب صينية التقديم ونحط فيه بقدونس والباذنجان والبطاطس ونصب شوي من الصوص الأبيض .

ونرجع نحط بقدونس وبطاطس وباذنجان وشوي من الخبز ونصب فوقها الصوص الأبيض وصوص الطماط ونحط بقدونس وباقي الخبز