| شراب التوت والليمون والحبق |

.
.

 

 

 

 

 

 

 

 

 

 

 

 

شي منعش للصيف وطعم حلو ..

خاصة الحبق معاه معطيه طعم عجيب .

 

ماعرف اسم ثاني للحبق صراحة :/ !

هو مثل النعناع بس طعمه مختلف شوي .

 

 

| الطريقة والمقادير مع بعض | :

 

- عصير نص حبة ليمون أصفر

 

- عصير 3 حبات ليمون أخضر

 

- شراب التوت طريقته هنــــا  ( حطيت الكمية اللي سويتها كلها )

 

- علبتين مياه غازية

 

- ملعقتين سكر

 

- ثلج مجروش

 

- شوي حبق

 

- شرايح ليمون

 

- توت طازج

 

نحرك كل هالشغلات مع بعض ماعدا المياه الغازية والثلج .

قبل التقديم نضيفهم ,

 

* إذا كنتوا بتستبدلون المياه الغازية بالسفن اب أو أي مشروب غازي ثاني ألغوا السكر .

 

 

 

 

.
.

 

 

 

| Raspberry syrup |

.

.

 

 

 

 

 

هذي طريقتي في شراب التوت .

ممكن نحطه مع مياه غازية أو مشروبات غازية , يعطي طعم ولون حلو .

 

 

| المقادير | :

 

 

- كاس توت طازج

 

- 2/3 كاس سكر

 

- ربع كاس ماء

 

 

.
.

 

 

| الطريقة | :

 

 

نقطع التوت بالنص ونحطه مع السكر في قدر ع النار .

 

بيبدأ يطلع ماي .. نقلبه ونخليه على نار هادية لمدة ثلث ساعة تقريباً ..

 

بعدين نضيف ربع كاس ماي ونحركه ونخليه ربع ساعه ع النار

 

بعدها نصفيه ..

 

 

 

 

 

 

 

ونحتفظ فيه بعلبة محكمة , ونحطه بالثلاجة .

 

* ممكن نحتفظ فيه مدة أسبوع .

 

.
.

 

 

 

| شوربة البطاطس والزهرة |

.

.

عندي طريقتها من زمان .. أخذتها من النت ولا أذكر لمين :( .

| المقادير | :

- كوبين زهرة مقطع وردات ,

- كوبين بطاطس مقشرة ومقطعة مكعبات

- فص ثوم مهروس

- مكعب ماجي

- 4 ملاعق زيت

- بصله مفرومه

- رشة ملح وفلفل أسود

- كوبين ماء مغلي

- كوب حليب سايل

- نصف كوب كريمة خفق

| الطريقة | :

نحمس البصل والثوم بالزيت بعدهاا نضيف الزهرة والبطاطس .
نضيف الملح ، الفلفل ، الماء المغلي ونتركه على نار هادية .

نضيف الحليب السايل والكريمة ونخلطه بالخلاط الكاس

ونردجعها ع النار ونخليها تطبخ شوي وبعدين نقدمها .

.

.

 

| مطبّق |

.

.

 

 

 

 

 

 

كل واحد له طريقته في ناس تحطه ع الصاج وتسويه حبه  حبه ,
احنا نسويه قطعه كبيرة وندخلها الفرن وبعدين نقطعها ..

| الطريقة والمقادير مع بعض | :

 

- للحشوة

نحط اللحم المفروم ع النار لما يطلع مويته ثم تنشف ,
بعدين نحط عليه بصل مقطع مكعبات صغيره
ونحط عليه فلفل اسود وملح وشوي بهارات وشوي كزبره مفرومه .

ونقلب لما نحس ان البصل ذبل وكل شي استوى , ونخليه على جنب .

 

نجيب بيضتين ونخفقهم مع شوي ملح وفلفل اسود .
ونجيب كراث مقطع لشرايح صغيره ,

ونحطه على البيض ونحط معهم اللحم ونقلبهم مع بعض .
طبعا نحط اللحم والكراث بكميه مناسبه مع البيض بحيث انه مايصير عندنا البيض كثير ويصير الخليط سايل ويحوسنا .


الحين نجيب ورق المطبق ,
ونحط اللحم فيه بالنص مثل كذا ..



لا حظو ان البيض ما يبين .

ونقفل الاطراف اللي ع اليمين واليسار بـ ( ماي وطحين )

وبعدين نقفل الأطراف اللي فوق وتحت ..

وندهنه بشوي زيت ..

وندخله الفرن لما يتحمر ,

ونطلعه ونقطعه ونقدمه ..

 

 

 

 

 

.
.

 

| أقراص الدجاج |

.

.

سهلة ولذيذة ممكن تقدمينها مع باستا أو رز أو خضار أو تحشين فيها السندوتشات ..

أحب الشغلات اللي لما تسوينها ممكن تسوين منها عدة أطباق بوقت واحد .

.

.

| المقادير |

- نص كيلو دجاج مفروم

- بصله كبيرة مفرومه

- بقدونس مفروم * كميته تقريباً بحجم قبضة اليد أو أقل شوي *

- فصين ثوم متوسطين الحجم مفرومين

- بيضة مخفوقة مع نقطة خل

- 3 ملاعق كبيرة - معيارية - بقسماط

- فلفل اسود

- بهارات مشكلة

- ملح

| الطريقة | :

نخلط المقادير مع بعض ونشكلها على هيئة أقراص دائرية متوسطة الحجم .

بعدين نشويها إما بالفرن أو بالشواية ..

ندهن صينية الفرن أو الشواية بشوي زيت ونحط الأقراص عليها ونخليها ربع ساعة تقريباً لكل جهة .

وبعد كذا نقدمها .

.
.

 

| Crispy Chicken Strips |

.
.

الوصفة أخذتها من عبير السعيد - بالانستغرام - ,

وحبيت أشارككم إياها .

| المقادير و الطريقة مع بعض | :

صدور دجاج مقطعه لشرايح طويلة متبلة بـ :

- بتر ميلك ( كوب حليب + ملعقة خل ) استبدلته بكاس لبن .

- فلفل أسود

- ملح

- بابريكا

- ثوم بودرة

- بهارات دجاج

- أعشاب مجففة , أنا حطيت نعناع وبقدونس مجففين .

نتركها بالثلاجة أقل شي 4 ساعات , عن نفسي خليتها ليلة كاملة

قبل القلي نجهز خلطة الطحين اللي بنغمس الدجاج فيها  وهي عبارة عن :

طحين نخلطة مع ملح وفلفل أسود وشوي بهار و3 إلى 4 ملاعق حليب سائل عشان يكون الخليط على هيئة فتات .

نغمس قطع الدجاج فيه

ونقليها بالزيت على طول ونصفيها بعدين ونقدمها .

* بعض القطع غمستها بطحين عادي قبل بعدين غمستها بالخليط ..

* الوصفة لذيذة والمرة الجاية إذا بسويها بزيد البهارات وبحط شوي ليمون مع التتبيلة طبعاً في ناس ماتحبها كذا بس الناس أذواق

 

| اندومي بالخضار |

.
.

 

 

 

 

 

سهله وتفك أزمة زي ما يقولون :p

 

 

| الطريقة والمقادير مع بعض | :

 

 

نقطع : [ جزر | كوسا | خيار - لحد يستغرب - | فلفل بارد | ملفوف ] لشرايح طويلة ,

 

 

 

 

نحمس الخضار مع البصل الأبيض - مقطع شرايح طويلة -  مع شوي زيت .

 

ومانخليها تذبل .

 

نسلق الأندومي دقايق بس تستوي نص استواء ونصفيها ونضيفها ع الخضار .

 

نقلبها ونضيف صوص عبارة عن :

 

[ معجون طماط | صوص صويا | كاتشب | بهارات الأندومي ]

 

الكميات مثل ماتحبون مرات .

 

ونقلبها دقايق ونقدمها .

 

 

 

.

.

 

 

 

| إلبــه |

.

.

من الحلويات القديمة , التراثية - صح علي كذا :p - ؟

لذيذة مثل الكريم كراميل بالفرن والزعفران والهيل يعطيها طعم مميز وحلو ,

والأهم من كل هذا سهله ..

هي لها طريقتين مافيها إختلاف كبير جداً , بحاول أحط الطريقة الثانية إن شاء الله إن قدرت .

| المقادير | :

- 5 بيضات متوسطات

- ثلث كاس ماي ورد

- كاسين ونص ماي

- علبه كبيرة حليب نستله

- نص ملعقة صغيرة - معيارية - هيل مطحون

- ملعقة صغيرة فانيلا

- زعفران

| الطريقة | :

نخفق المقادير مع بعض ونصبهم في قوالب ونضعهم في حمام مائي ,

وندخلهم في فرن مشغل مسبقاً على درجة حرارة 360 لمدة 30 دقيقة تقريباً ان كانت بقوالب صغيرة

أما إذا كانت في قالب كبير ممكن تاخذ 40 دقيقة .

ونطلعها ونخليها تبرد برا

وبعدين ندخلها الثلاجة لمدة ساعتين ع الأقل ونزينها ونقدمها .

.

* الورد شريته من المطاحن الدولية بالكويت .

.
.

 

| Carrot cake .. كيكة الجزر |

.

.

سهلة وخفيفة ولذيييذة ,

أخذت طريقتها من أخت صديقتي مريومه الصغيرة :p

.

.

| المقادير | :

- 3 بيضات - على درجة حرارة الغرفة -

- كاس جزر مبشور

- نص كاس زيت

- كاس سكر

- كاس ونص طحين

- ملعقة كبيرة باكينج باودر

- شوي قرفة - حسب الرغبة -

- شوي فانيلا

.

.

| الطريقة | :

- نخفق البيض والسكر والفانيلا على سرعة متوسطة لما يصير لونها فاتح بعدها نضيف الزيت .

- بعد كذا ننخل الطحين والباكينج باودر والقرفة .

- نضع المكونات الجافة والجزر على السائلة ونحركهم لما يتجانسوا 

- بعد كذا نصب الخليط في صينية الكيك المدهونة بزيت وندخلها الفرن على درجة حرارة 350 فهرنهايت

للـ " كريمه " ,

نحتاج لـ :

- 12 حبة جبن كيري

- كاس سكر * أنا حطيت كاس إلا ربع :$ *

- 3 ملاعق كبيرة حليب سائل 

نخفق مقادير الكريمه مع بعض حتى تصبح متماسكة ونخليها بالثلاجة لما تستوي الكيكة وتبرد ونزينها .

بعد ما تستوي الكيكة نطلعها ونخليها تبرد 10 دقايق بعدين نقلبها ونخليها تبرد بشكل كامل .

بعد ما تبرد نبدأ نزينها بالشكل اللي نبي .

أنا زينتها بالكريمه بعدين ع الأطراف حطيت جوز هند + عين جمل مفروم فرم خشن .

ومن فوق سويت عين جمل أو جوز مكرمل - كذا ترجمتها بالعربي الفصحى وش أسوي ههههه -

- طريقته هي :

نحط سكر في قدر ع نار متوسطة لما يبدا يذوب ويتحول لكراميل مثل كذا 

طبعاً كل ما طولتي بالوقت كلما صار اللون أغمق والطعم أقل حلاوة .

بعدين نحط عليه حبات الجوز ونقلبها لما تتغطى فيه 

بعدين نشيلها ونحطها على ورق زبده بس تبرد شوي ونزين فيها الكيك .

وهذا شكل الكيكة النهائي 

.

.