| Brownies with strawberry coulis |

.

.

| Brownies with strawberry coulis |

براونيز بـ كولي الفراولة - صوص الفراولة -

 

 

 

 

 

 

 

 

 

 

 

 

 

 

 

طريقة جديدة للبروانيز , طعمها رهيييب وأخف من اللي سبق ونزلت طريقتها .

اللي سبق ونلزت طريقتها ( هنـا ) كانت تتشرب بالشوكلت جاناش

بس بهالطريقة بنشربها بكولي الفراولة ..

أخف , وتغيير عن الطعم المعتاد والفراولة خيار ممتاز مع الشوكولاتة .

.

.

| المقادير | :

 

-  200 جم شوكولاته والافضل طبعاً تكون نسبة الكاكاو الموجودة فيه 60 - 70 %

- اصبع وثلث تقريباً زبده ونقطعها لمكعبات صغيره .

- كاس وربع سكر ( ممكن كاس لو ماتحبينها حاليه مره )

- كاس طحين

- 3 بيضات

- رشة ملح

- رشة فانيلا 

* وما ننسى بالنسبة للشوكولاته ,

كل ما كان النوع ممتاز كل ماحصلنا على براونيز أفضل .

ولو قدرتي تحصلين شوكولاته فيها 40 جم عشان تصير مثل المقدار بالضبط أفضل وأفضل .

 

.

.

| الطريقه | :

نجيب الصينية اللي راح ندخلها الفرن ونفرشها بقصدير  ونخليه مرتفع شوي عن الأطراف عشان يسهل علينا نشيل البراونيز بعدين

ونقطعها .

وندهن القصدير بزبده - من داخل طبعا - غير الزبده اللي بالمقادير .

* بالإمكان استبدال القصدير بورق الزبدة مثل ما اقترح علي البعض .

الحين نروح نذوب الزبدة مع الشوكولاته في حمام مائي ونحرك بشكل مستمر ونحاول مانطول عشان لا تحترق الشوكولاته

 

والأفضل طبعاً نكون مقطعين الزبدة مع الشوكولاتة لقطع صغيرة عشان تذوب بشكل أسرع ,

 

بعد ماتذوب ويتجانس الخليط نخليه يبرد شوي .

الحين نحرك السكر و البيض و الفانيلا مع بعض

بعدين نضيف عليهم الشكولاته والزبده اللي ذوبناهم ونحرك.

بعدها نضيف الطحين  على 3 مراحل 

نضيف كمية شوي ونحرك ونضيف شوي ونحرك وكذا

ونحرك شوي بس لما يتجانس مانبي نحرك كثير عشان مانبي ندخل فيها كمية هواء كبيره

بعدين نصبهم في الصينية

 

 

ونساوي السطح

ونحطها في الفرن - مشغل مسبقاً على 350 درجه

 

لمدة 25 - 30 دقيقه

الأفضل نشيك عليها بعد 25 دقيقة

 

وندخل عود ولازم يطلع شوي رطب ,

لو طلع جاف معناها مستويه أكثر من اللزوم .

 

 

* على ما تستوي نسوي كولي الفراولة ,

 

ع النار نحط :

 

- مقدار كاس فراولة مقطعة

 

- نص كاس سكر

 

- ملعقة صغيرة عسر ليمون

 

ونخليها على النار .. بتبدى الفراولة تطلع الماي اللي داخلها

 

نخليها 10 دقايق على نار متوسطة وبعدين نخلطها بالخلاط .

 

وبعدين نصفيها لين يتكون عندنا هالصوص :

 

 

 

 

ونخليها على جنب

 

لما تستوي البراونيز نطلعها ونصب عليها ربع كاس من كولي الراولة

نخليها تبرد على درجة حرارة الغرفه .

 

بعدين الأفضل نخليها يوم كامل بالثلاجة وقبل التقديم بنص ساعه أو ساعة نطلعها .

 

الطعم يفرق كثير ..

 

* طبعاً هي قاسية نوعاُ ما فاللي ماقد جربها لا يستغرب هالشي .

ونزينها بطبقة رقييييقة جداً من الشوكلت جاناش لو حابين .

 

ونقدمها :

 

 

 

 

 

 

 

 

* يوم صورتها كانت قبل لا أدخلها الثلاجة .

 

 

.
.

 

| Mini Delights |

.

.

 

 

 

 

 

 

 

 

 

 

 

تستحق هذه التسمية صراحه هههههههه .

لذيذة وسهلة , لما تذوقها وتعجبك بتنبسط أكيد :p

 

الطريقة حافظتها عندي من سنين وأسويها من زمان , كنت ماخذتها من  أموري - عضوة بالإقلاع -  وغيرت شغلات بسيطة فيها .

 

بحط لكم الطريقة بعد تغييراتي أكيد =)

 

.
.

 

 

| المقادير | :

 

- اصبع زبده بدرجة حرارة الغرفة .

- نص كوب سكر ( لو تحبونه حالي حطوا 3/2 كاس )

- بيضه

- شوي فانيلا

- كاس طحين

- ثلث كاس كاكاو بودرة

- شوي ملعقة ملح

 

- ملعقتين كبار حليب سائل

- نص كاس لوز مفروم فرم خشن شوي

| الطريقة | :

أول شي نخلط الزبده و السكر و البيض و الفانيلا لما يصير خليط كريمي .

 

بعدين نضيف له الكاكاو ونقلب لما نحسه انخلط , بعدها نضيف الطحين والملح

شوي شوي ونقلب لما يتجانس ,

 

الخليط بيكون ثقيل شوي فنضيف الحليب ونحركه شوي بس لما يتجانس

الحين نحط الخليط في الثلاجه لمدة تتراوح من نص ساعة لساعة ,

 

بعدين نطلعه ونكوره لكورة صغيرة ونغمسها في اللوز .

 

الحين نصفهم في الصينية ونضغط ع الكور ونضغط زيادة في النص , بتصير مثل كذا :

 

 

 

وندخلها الفرن مشغل مسبقاً على درجة حرارة 350 ونخبزها من 10 الى 12 دقيقه تقريباً

لما تستوي نطلعها من الفرن  ونخليها تبرد شوي ونزينها بشوكلت جاناش ( سبق وحطيت طريقته )

أو كريمة بيتي كروكر بالشوكولاته لو تحبونها .

 

وفوقها حبة لوز .

 

 

 

 

 

 

 

 

 

 

 

 

.
.

 

 

 

 

| Strawberry trifle |

 

.
.

 

 

 

 

 

 

 

 

 

 

 

 

 

 

سبق وتكلمت على الترايفل ( هنـا ) , لكن هالمرة سويته مع وجود طبقة الكريمة .

+ استبدلت التوت بالفراولة وضاعفت كمية الباستري كريم اللي بعد سبوق وتكلمت عنه ( هنـا ) ,

 

فحبيت أوريكم كيف يكون شكله وبعيد الطريقة بس مرة ثانية  .

 

طبعاً هو ممكن يتقدم بكاسات صغيرة وقوالب صغيرة أو قالب كبير والكل يغرف منه

أنا سويت الإثنين هالمره .

 

| المقادير والطريقة مع بعض | :

 

أول شي نحط قطع كيك كطبقة أولى ,

 

 

بعدين نحط صوص فروالة - بما إني استخدمت فراولة -

سبق وتكلمت عن هالصوص في التشيز كيك وغيره من الحلويات .

 

وممكن إستبداله بـ مربى 

 

 

وبعدين نحط قطع الفراولة

بعدها نحط الباستري كريم .

بعدين نحط طببقة كريمه مخفوقة
 

وبعدين نعيد تكرار الطبقات .

 

ونحطه بالثلاجه لما يبرد ونقدمه ..

 

 

 

 

 

 

 

 

 

.
.

 

| Molten Chocolate Cake |

.
.

| مولتن شوكلت كيك |
 

 

 

 

من الحلويات اللذيذة جداً ومليااانة شوكولاته , والدسمة طبعاً .

لها عدة أسماء غير المولتن كيك .. بس اللي اشوفة منتشر أكثر شي هنا غير مسمى الملونتن هو التشوكلت فوندانت كيك .

 

وبعد منتشر مسمى الـ سوفليه , وهو مسمّى خاطئ لها ..

بحاول أسوي السوفليه يوم من الأيام وأتكلم عنه بوقته .

 

المولتن بداخله يكون الشوكولاته سائلة بعكس السوفليه يكون رطب من داخل بس مو سايل .

ناهيك على أن السوفليه نستخدم البيض فيه كـ مادة رافعه وما إلى ذلك ..

 

هالطريقة ماخذتها من النت من سنييين وحافظتها من كثر ماطبقتها .. تستحق التجربة .

 

: | المقادير |

 

- أصبع زبدة مقطعة لمكعبات صغيره .

- 120 جم شوكولاته غامقة مقطعة لقطع صغيرة .

- 3 بيضات

 
- صفار بيضتين

 

- 4 ملاعق صغيرة طحين

- 4 ملاعق كبار كاكاو بودرة

- كاس سكر بودرة ( ممكن تخلونها كاس وربع لو تحبون طعمها حالي أكثر )

 

- رشة ملح

 

..

: | الطريقة |

 

أول شي ندهن صحون السيراميك ( الخاصة بالمولتن والسوفليه ) بزبدة دافية ونحطها بالثلاجة لحد مانسوي خليط المولتن .

 

الحين نشغل الفرن على ٣٥٠ ,
في حمام مائي نذوب الزبدة والشوكولاته ونحركها لما تذوب وتتجانس مع بعض ,

طبعاً الغرض من تقطيع الزبدة والشوكولاته لقطع صغيرة هو إنها تذوب بشكل أسرع وما تحترق مع طول مدة التذويب .

 

 

 

 

بعد ما تذوب ننخل عليها الكاكاو مع الملح والسكر ونخلطهم مع بعض .

بعدين نضيف صفار البيض ونحرك زين وبعدها البيض الكامل والطحين ونحرك بس ما نطوّل بالتحريك مجرد يتجانس ونوقف .

الحين نفرغ الخليط في قوالب السوفليه , نعبيها لين ثلاثة أرباع مثل كذا :

 

 

 

* الكمية تكفي 7 - 8 قوالب متوسطة مثل كذا

 

 وندخلها الفرن ,

 

 

 

نخليها في الفرن حوالي ٢٠ دقيقة تقريبأً مرات تكون أقل ومرات أكثر على حسب الفرن وغير كذا نوعية الشوكولاته بعد ،

مره غيرت نوعية الشوكولاته وخذت معاي ربع ساعه بس .

 

للإحتياط عشان أعرف الوقت المناسب أدخل قالب واحد الفرن وأعرف كم بتاخذ مني بالضبط بعدها أدخل القوالب الثانيه كلها .

 

- كيف أعرف أنها استوت ؟

 

لما تكون الأطراف بدت تستوي بس الوسط يلمع شوي ولما ندخل سكين أو عود يطلع وعليه الخليط السائل .

الحين نطلعها من الفرن ونخليها تبرد شوي ,

بعدين نفك الأطراف بسكين ونقلبها على صحن ونزينها .

 

 

 

 

 

 

.
.

 

| سلطة المكسرات |

.
.

 

 

| الطريقة والمقادير مع بعض | :

 

نحط [ خس - نوعين - | توت | جبن - نوعين : هنغاري و فيتا - | لوز مبشور ومحمّص | فستق مبشور | عين الجمل ]

ونقلبهم في صحن التقديم ,

 

 

ونضيف عليهم الدريسنغ :

عباره عن :

 

[ ملعقة صغيره دبس رمان | ملعقة كبيره خل | ملعقه كبييرة زيت زيتون | نص ملعقه صغيره سكر بني | ملح حسب الرغبه ] مخلوطين مع بعض .

 

ونقدمها

 

 

 

 

 

.

.

 

 

| Raspberry Trifle |

.

.

من الحلويات السهله واللذيذة واللي ممكن الواحد يبتكر عدة نكهات فيها ويغير فيها .

تحتوي على عدة طبقات :

- كيك

- صوص فواكه أو ممكن استخدام المربى

- قطع فاكهة

- كاستر ( ممكن يكون باستري كريم أو ليمون كرد  - خثارة الليمون - وما إلى ذلك )

- كريمة ( كريمة خفق )

في هذه الوصفة استخدمت مربى توت بدل صوص التوت و استخدمت باستري كريم وطريقته ( هنــا ) .

وأضفت فستق , وما حطيت كريمة لأنها ما كانت متوفرة وقت ماسويته , المره الجايه بحطها وبوريكم كيف شكلها يكون بالكريمه .

| المقادير والطريقة مع بعض | :

أول شي نحط قطع كيك كطبقة أولى ,

بعدين نحط صوص توت - بما إني استخدمت توت - وممكن تحون صوص فراوله إذا بتستخدمون فراوله

سبق وتكلمت عن هالصوص في التشيز كيك وغيره من الحلويات .

بس هنا استخدمت مربى توت مثل ماقلت لكم , وبعدين نحط قطع التوت .

وحطيت شوي فستق مبشور ..

بعدها نحط الباستري كريم .

وبعدين نعيد تكرار الطبقات .

ونحطه بالثلاجه لما يبرد ونقدمه ..

* كميّة الباستري كريم اللي سويتها في الوصفة كفت 3 كاسات بس .

 

 

 

 

 

 

 

 

 

 

 

 

 

 

 

.

.

 

| Pastry Cream |

.

.

 

 

الباستري كريم , وتسمّى أيضاً بالـ الكريم باتسيير , نقدر نقول عنها فرع من فروع الكسترد أو كسترد ثقيل نوعاً ما .

ممكن نخليها بنكهات محتلفة أو بدون نكهة .. يعني نكهة الكاسترد العادي .

نستخدمه في عدة حلويات مثل الترايفل , وممكن تكون كحشوات للتارت أو الاكلير وغيره .

النكهات اللي ممكن تنضاف لها مثل :

- الكوفي

- الشوكولاته

- الفانيلا

- الفواكة

وما إلى ذلك , اللي بيفرق في كل طريقة لإضافة النكهة هو متى نضيف النكهة ؟ في أي خطوة ؟

مثل الكوفي نضيفه مع الحليب ع النار , أما الشوكولاته نضيفها بالمرحلة قبل الأخيرة يعني قبل ما نرجع الخليط كامل ع النار .

وكذا .

المرات الجاية بحاول أسوي أكثر من نوع وأحطه لكم , وأحط معاه طريقة حلى استخدمته فيه .

| المقادير | :

- صفار 3 بيضات بدرجة حرارة الغرفه .

- ربع كاس سكر

- ملعقة صغيرة فانيلا

- كاس وربع حليب طازج

- ملعقتين كبار نشا

- ملعقتين كبار طحين

.

.

| الطريقة | :

أول شي نحط احلليب على النار .. وننتظر لما يبدى يسخن وبيبدأ يغلي نرفعه من على النار على طول .

على مايسخن الحليب نخفق صفار البيض مع السكر ..
 لما نحصل على قوام ثقيل شوي وكريمي نوعاً ما ,






بعد كذا نضيف الطحين والنشا منخولين .

ونقلب لما نحصل على قوام مثل كذا :

 

 

 

في هالمرحله بيكون الحليب سخن , نضيف شوي من الحليب على الخليط ونحرك أثناء إضافة الحيب بسرعه عشان مايتكتل علينا الخليط .

 

 

 

 

هالحركه نسويها عشان نقلل الفرق بين درجة حرارة الحليب ودرجة حرارة خليط البيض عشان لما نبدى نضيف الحليب الباقي مايتكتل علينا .

بعد ما نحركهم نضيف باقي الحليب ونحرك أثناء إضافة الحليب وبعد مانخلص , نحرك دقايق بعدها نرجع الخليط كله على النار .

ونحركه لما يثقل ونرفعه من النار ونحطه بقالب , وكذا قوامه :

 

وممكن نحفظه بالثلاجة من 3 لـ 4 أيام .

طبعاً عشان نحفظه نحط عليه بلاستك ع الوجه على طول عشان ما تتكون عليه طبقة لما يجمد :

 

 

 

 

 

وبس هذا هو الباستري كريم .

سهل ؟





 

 

.
.