.
.
شفت الطريقة باليوتيوب وعدلت على بعض المقادير .
كانت تجربة لنكهة جديدة للتشيز كيك , كنت متخوفة منها شوي قبل لا أسويها .
بحكم إني مو من عشاق القرع - اليقطين - .
لكن قلت خلني أجرب نكهة مختلفة عن الأشياء اللي متعوده عليها , وكانت تجربة ناجحه
وتستحق التكرار .
طعم حلو وجديد , أنصحكم تجربونه .
زينته بشوكلت جاناش وكان طعمه حلو معاه .
| المقادير | :
* للقاعدة :
- كاس بسكوت مطحون ( ممكن دايجستف ) , أنا أستخدمت الميبل كوكيز اللي سبق وحطيت طريقته .
- نص أصبع زبدة ذائبه
- ذرّة ملح
* لطبقة التشيز كيك :
- 4 بيضات بدرجة حرارة الغرفة
- 900 جم جبن كريمي ( فيلادلفيا ) بدرجة حرارة الغرفة .
- 450 جم هريس اليقطين - القرع - ( pumpkin puree ) أخذته جاهز من ماركة libbys .
هذي صورته :
تلقونه بأي هايبر ماركت .
- نص كاس سكر
- نص كاس سكر بني فاتح
- ملعقة صغيرة قرفه مطحونه
- ربع ملعقة صغيرة زنجبيل مطحون
- 1/8 ملعقة جوزة الطيب مطحونه
- 1/4 ملعقة صغيرة ملح
- ملعقة صغيرة فانيلا سائلة
| الطريقة | :
بالبداية نخلط مقادير القاعدة ونحطها بصينية التشيز كيك وندخلها الفرن مدة 10 دقايق ونطلعها ونخليها تبرد .
الحين نبدأ بخليط التشيز كيك ,
أول شي نحرك الجبن - يدوياً - شوي شوي لما يلين ,
بعدها نضيف عليه السكر بنوعيه ونقلب شوي شوي لما نحس إنه بدى يذوب
نضيف هريس القرع ونحرك شوي شوي لما نحس إن الخليط تجانس .
نبدى نضيف [ القرفة | الملح | جوزة الطيب | الزنجبيل ] ونقلب على خفيف .
الحين نضيف البيض حبة حبة , بعد إضافة حبة بيض نقلب ونضيف اللي بعدها وكذا ..
بالنسبه للفانيلا أنا أضيف شوي مع كل حبة بيض وأخلطهم شوي قبل بعدين أضيف البيضه على خليط التشيز كيك .
الحين بعد ما قلبنا الخليط يدوياً وخليناه يتجانس نصبه على طبقة البسكوت .
الحين نغلي ماي ونجيب صينية للفرن ونصب الماي المغلي عليها وندخلها الفرن - مشغل مسبقاً على درجة حرارة 350 -
ونخليها بالرف السفلي ونقفل الفرن 5 دقايق .
بعدين نفتحه ونحط صينية التشيز كيك بالرف اللي فوق مثل كذا :
هذي طريقة للحمام المائي بس بشكل ثاني .
نخليها بالفرن على درجة 350 لمدة 30 إلى 35 دقيقة تقريباً .
بعدين ننزل درجة الحرارة إلى 325 لمدة 30 إلى 35 دقيقة تقريباً .
هالوقت المفروض تكون استوت .
كيف نعرف إنها استوت ؟
تكون متماسكه من الأطراف بس من الوسط لو هزيناها تهتز شوي , بس لما نمسك السطح من الوسط بإصبعنا
تكون جامده شوي وماينغمس إصبعنا .
لما نوصل لهالمرحله نعرف انها استوت ونسكر الفرن ونخليها داخل تبرد مع الفرن عشان ما يتشقق السطح حق التشيز كيك .
بعد ساعه أو ساعتين نطلعها برا شوي
وندخلها الثلاجة لليوم الثاني أفضل .
ونقطعها ونقدمها .
كان ودي أقدمها بشكل أفضل بس العجلة وما تسوي :p
* ملاحظات مهمّه :
- لا تخفقونها كثير وبسرعه عشان لا يدخل فيها هواء .
- البيض والجبن لازم يكونون بدرجة حرارة الغرفة .
- خلوها تبرد مع الفرن .
- للتقطيع استخدموا سكين حاد وغمسوه بمائ حار وامسحوا السكين مع كل مره تقطعون فيها .
.
.
.
شرح رائع ومفصل
ردحذفكم انتي رائعه 😍😍