| دجاج بصوص المتبل الفرنسي |

بصراحه هالشي جبت فكرته من مطعم ,

قبل فتره اخوي طلب دجاج بالصوص الفرنسي .. قلنا اكيد انه شي غريب وخيالي ,

طلع اخرتها دجاج مقلي عليه صوص فرنسي وكريمه :/ ,

يعني هالشي بسيط يمدي يتسوى بالبيت , والأهم ما ياخذ وقت .

| الطريقه والمقادير مع بعض | :

صدور دجاج نسوي فيها خطوط بالسكين ونبهرها ونملحها ونخليها بالثلاجه على مانجهز باقي الأغراض .

نجيب بصل ونقطعه لشرايح طويله ونحمسه مع زبده وشوية زيت لما يذبل ..

ونحط عليه نص مكعب ماجي ( نبي نكهه خفيفه بس )

ونحط الدجاج عليه .. وبعد دقايق نقلبه للجهه الثانيه ..

وبعدها بدقايق نشيل البصل ونخليه عشان بنستخدمه بعدين - ماخليته عشان ما ابيه يتحمر اكثر -

الحين نخلي دجاج ع النار لما يستوي ,

وبعدها نشيله .

الأفضل ان نرجع البصل لنفس القدر ونكمل الخطوات الباقيه ,

بس انا ما انبهت على كمية من البصل كانت موجوده ماشلتها وتحمرت كثير وبيصير طعمها واضح بالصوص لو بسويه بنفس القدر :/ .

فاضطريت اغيره .

الحين نرجع البصل في قدر ع النار ونضيف عليه كريمة خفق وحبتين جبن كيري .

لما تذوب الجبنه وتتمازج مع الكريمه نضيف عليها 3 ملاعق طعام المتبل الفرنسي - ماغيره حق السلطه - .

ونحركه لما يبدا الصوص يثقل ويسخن .

نصبه فوق الدجاج اللي ع الصحن ونقدمه .

.

.

| دجاج بدبس الرمان والخضار |

.
.

بصراحه هالشي ما احسه ذاك الابتكار ,

بس انه شي سهل وما ياخذ وقت ..

| الطريقه والمقادير مع بعض | :

نقطع صدور دجاج لمكعبات متوسطه

ونتبلها قبل بـ ليلة بـ [ عصير نص ليمونه + ملعقه كبيره دبس رمان + فص ثوم مفروم ]

ونخليها بالثلاجه .

بعد ما تاخذ وقتها بالتتبيل ..

نحمس بصل مقطع لشرايح طويله مع زيت لما يذبل

ونضيف عليه الدجاج ونخليه لما ينشف الماي حقه .

ونقلبه ونضيف عليه مكعب ماجي وشوي ملح وبهارات مشكله - مو كثير رشه خفيفه بس -

ونضيف فلفل بارد ملون - فليفة - مقطعه لشرايح طويله

انا حطيت أحمر وأخضر ,

ونضيف بعد جزر مقطع شرايح .

ونقلب لما تستوي الخضار

ونقدمها .

| حلى البسكوت |

بتقولون هذا كوكيز ههههههههه .

لا هو بصراحه لا فيه طحين ولا سكر ولا بيض ..

هو حلى ينحط بصينيه بس انا شكلته بهالشكل لأن حسيت أنسب له =)

هالحلى جداً سهل وبسيط ومقاديره شوي وما ياخذ وقت .

وش احسن من كذا ؟

| المقادير والطريقه مع بعض | :

نطحن علبة بسكوت شاي كبيره .. - 44 حبه يعني -

هذا النوع رهيييييب لا تفكرون تسسون بغيره .

 

وبعد مانطحنها نضيف عليها ربع كاس جوز هند ونحركهم ,

ثم نضيف عليها اصبع زبده لين - بدرجة حرارة الغرفه -

ونفركهم مع بعض زين لما تصير مثل عجينة الباي المفتته .

ثم نضيف على هالخليط ثلث كاس حليب مركز محلى - حليب نستله - .

ونعجن لما تتكون عجينه متماسكه .

ممكن تزيدين من حليب النستله شوي ان ما كانت متماسكه .

بعدها تضيفين حبات الشوكولاته .. استخدمت النوع اللي من هيرشي , بالتحديد نوع السيمي سويت .

ونكورها ولكور صغيره ونضغط عليها عشان تعطينا هالشكل .

ونحطها في صينيه عليها ورق زبده

وندخلها لفرن مشغل - من تحت - مسبقاً على درجة حرارة 360 لمدة 10 دقايق .

ونطلعها ونغطيها لما تبرد شوي ونقدمها

.

.

| Red Velvet Cake |

.
.

.
.

سويتها مرتين ..

مره ما كان عندي ملون الطعام الأحمر , سويتها كب كيك ..

والثانيه حطيت ملون طعام بس للأسف نوعيته مو ممتازه ..اللون خفيف جداً :(

فما اعطاني الدرجه اللي ابيها :(

وناويه اشتري لون طعام نوعية زينه واعيدها ان شاء الله , لأن طعمها أعجبني وتستاهل تتسوى أكثر من مره .

.
.

الطريقه أخذتها من عضوة بالاقلاع ( لمليسا ) الله يجزاها خير ,

بس الكريمه غيرتها وسويت مثل كريمة الزبده اللي اسويها واضفت عليها جبن فلادلفيا

حبيت الكريمه بصراحه مع إني غالباً ما استسيغ الكريمه :D

انحاست علي الكيكه بصراحه لأن كان الوقت اللي اسويها فيه ضيق وما امداني انتظرها تبرد كثير وحاست الكريمه بس رقعتها شوي :P

| المقادير | :

ـ إصبع زبده

ـ كاس وربع سكر - هي كاس ونص بس انا قللته لكاس وربع لأن الكريمه اللي بحطها حاليه -

ـ بيضتين

ـ ربع كوب ملون طعام " أحمر "

ـ ملعقتين كبيره كاكاو بودر

ـ كوب بتر ملك Buttermilk أو بأمكانكم إستبداله بكوب حليب وإضافة ملعقه صغيره خلَ عالحليب - وهذا اللي سويته :$ -

ـ كوبين وربع دقيق

ـ ملعقة صغيره فانيلاَ

ـ ملعقة صغيره كربونات الصوديوم

| الطريقة | :

ـ في الخلاط نخلط الزبده والسكر ثم نضيف البيض فوق المزيج بمعدل بيضة واحدة كُل مرة .

ـ في صحن آخر نخلط معاَ الكاكاو وملون الطعام نخلطهم زين لحدَ مايذوب الكاكاو بعدها
نصبه ع خليط الزبده والسكر .

ـ نخفض على سرعه الخلاط ونضيف البتر ملك ثم الدقيق بالتدريج ونحركه كويس.

ـ نضيف الفانيلاَ ونخلط زين ثم نضيف كربونات الصوديوم .

- نجيب مدهونه بزيت , ونرش عليها دقيق - نسيت اسوي خطو الدقيق :$ - ونحط خليط الكيك

وندخله الفرن على درجة حرارة 360 .

لما تستوي الكيكه - نتأكد من هالشي بغرز سكين أو عود اسنان ويطلع نظيف وجاف - =)

الحين نجي للكريمه :

نخفق 250 جرام زبده - بدرجة حرارة الغرفه -

مع اضافة كاس و4/3 سكر بودره بس شوي شوي لما تخلص كل كمية السكر .

بعدها نضيف ملعقة كبيره حليب سائل مع ملعقه صغيره فانيلا .

ونخفق بسرعه لين تتماسك , ونضيف بعدها نص علبة جبن فيلادلفيا ( العلبه الصغيره اللي فيها 200 جرام )

ونخفق بسرعه لدقايق بس تتجانس .

ونحطها بقمع التزيين ونزين .

طبعاً الكيكه قطعتها بالنص ودهنتها بالكريمه بعدين رجعتها على بعض وبديت ازينها

| buttercream |

.

سمعت كثير عن الـ buttercream .. وشفت لها اكثر من طريقه .

بس اخترت اسهل طريقة وطبقتها .

وكانت النتيجه مرضيه ,

ميزتها إن قوامها ممتاز جداً ومو مثل باقي الأنواع لما تكون برا الثلاجه يخرب قوامها ,

بالعكس هذي تبقى مثل ماهي

بس من عيوبها دسامتها وطعمها الحالي جداً .

حاولت اقلل من السكر بحيث انه ما يأثر على قوام الكريمه وضبطت معي .

| المقادير والطريقه مع بعض | :

250 غرام زبده - بدرجة حرارة الغرفه -

كاس ونص سكر بودره

ملعقه صغيره فانيلا

3 ملاعق طعام حليب سائل

.
.

أول شي نخفق الزبده مع اضافة السكر شوي شوي ..

ولما نخلص من كل كمية السكر نضيف الفنايلا وملعقتين من الحليب السائل ,

ونخفق شوي وبعدها نزيد السرعه .

بعدين نشوف اذا كانك متماسكه وثقيله مره نضيف آخر ملعقه من الحليب السائل ونخفق .

بعدها نبدى نلونها بألوان الطعام ونحطها بأقماع التزيين ونبدى نزيّن .

بالنسبه لهالأشكال اللي سويتها سويتها بهذا التِب :

شريته من ( تافولا ) .

.
.

طريقة هالشكل :

شوفوه بهالروابط :

http://www.youtube.com/watch?v=5c85y0fRNVY&feature=related

http://www.youtube.com/watch?v=q1e0TqmNmDg&feature=related

الفكره هنا أن احنا نبدى من الوسط للخارج .

.
.

وبالنسبه لهالشكل :

نفس التِب المستخدم بس الطريقه تختلف وهنا الطريقه :

http://www.youtube.com/watch?v=Jzo_XrRPfRM&feature=related

الفكره هنا أن نبدأ من الأطراف للداخل .. مع التحريك بشكل بطيء لإضافة ضغط بسيط لعمل هالشكل.

.
.

| ميني بسبوسه |

.

.

| ميني بسبوسه |

حتى البسبوسه صارت ميني

كذا اسهل للعزايم بعيد عن حوسة التقطيع

| المقادير | :

1 كاس سميد ناعم ( انا حتى هذا اطحنه اكثر :$ )

4/3 كاس سكر

4/1 كاس طحين

2/1 كاس جوز هند

1 ملعقه كبيره بيكينج باودر

4/1 ملعقة فانيلا

2/1 كاس زيت

بيضتين

علبة قشطه + ربع كاس ماي نخلطهم مع بعض .

| الطريقه | :

ولا أسهل

نخلط المقادير الجافه مع بعض ..

ونضيف عليها المقادير السائله ,

ونحركهم زين لما يتجانسون ..

ونكون مجهزين الورق وحاطينه داخل القوالب .

نصبهم فيه وندخلهم الفرن .

نتأكد من نضجهم بـ ادخال عود اسنان أو سكين .. ان كان نظيف / ناشف ,

خلاص نحمرها دقيقتين من فوق .

ونزينها بالفستق .. والشيره - اختياري -

عن نفسي حلاوتها ماتحتاج زياده شيره وانتو وذوقكم =)

.

.

| رُبيان بالكريمه والخردل |

.
.

لذيذ .. وسهل جداً .

بس دسم شوي =)

كنت بسوي رُبيان بالليمون على طريقة الطباخه بسمه ,

بس مالقيت كل الاغراض عندي فطلعت بهالطبخه .

| الطريقة والمقادير مع بعض | :

أول شي نجيب ربيان طازج ويفضل يكون حجمه متوسط إلى كبير .

- ننظفه وكذا -

ع النار نحط شوي زيت مقدار ملعقتين كبار بس .

ونحط ملعقه كبيره مليانه بصل أبيض مقطع لمكعبات صغيره .

ونحمسها لما تذبل .

نضيف عليها الربيان ونقلبه شوي .

ونرش عليها فلفل اسود وملح وشوي ريحان مجفف وروز ماري مجفف وبقدونس مجفف .

ونقلبه لما يستوي .

لما يستوي نشيل الربيان بس ومانغسل المقلى .. لأن نبي نضيف عليه كريمة خفق عشان تاخذ النكهه الموجوده .

الحين نضيف كريمة الخفق - علبة صغيره - ع اللي بقى بالمقلى .

ونضيف ملعقه صغيره خردل .

ونحركهم لما تبدى تغلي شوي نضيف عليها رشه جبن موزريلا وشوي ملح وفلفل اسود .

ونقلب لما تذوب الجبنه ونحط الصوص بصحن التقديم وفوقه نصف الرُبيان .

ممكن ماتشيلون الربيان وتكملون باقي الطريقه عليه .

بس هذي افضل للي مايحبون الصوص يكون كثير .

وممكن لو حابين تبدلون الربيان بالدجاج .. بس ماجربتها .

.
.

| سلطة البطاطس بدبس الرمان |

.
.

| سلطة البطاطس بدبس الرمان |

كل هذا اسم هههههههههههه

* صورت الصحن اللي حطيت لي اياه عشان تبين الطبقات .

بنت خالتي كانت جايه عندنا وقلت لازم اتفنن لها واسوي اشياء تحبها وطلعت بهالسلطه اللي فيها شوي من التبوله وشوي من الفته وشوي من مدري ايش هههههه .!

| الطريقه والمقادير مع بعض | :

اول شي نقطع بقدونس وخس لقطع صغيره جداً - مفروم تقريباً -

وشوي نعناع مفروم ,

وبصل اخضر مقطع لحلقات صغيره .

ونحركهم مع بعض ونحطهم في صينية التقديم .

الحين نقطع بطاطس وجزر لمكعبات متوسطه - أقرب للصغيره -

ونلقيهم ونحطهم على صحن فيه منديل عشان يمتص الزيت .

ونجيب قدر ونحمس فيه شوية بصل مقطع لمكعبات صغيره مع شوي زيت وأول مايذبل نضيف عليه البطاطس والجزر ونحط عليهم شوي كزبره مفرومه .

ونلقبهم ونحط عليهم ملعقه صغيره دبس رمان وملعقه صغيره معجون طماط .

ورشة فلفل اسود وملح .

ونلقبهم شوي .

ونشيلهم من ع النار ونخليهم على مانسوي صوص الزبادي ,

| صوص الزبادي | :

نخلط علبة زبادي مع عصير ليمونه
وفلفل اسود وملح وفص ثوم صغير مفروم وملعقتين كبار صوص ايطالي ,

الحين نحط البطاطس والجزر لما بردو شوي ع الخس والبقدونس

ونصب فوقهم صوص الزبادي .

ونحط عليهم طماط مقطع لقطع صغيره .

.
.