كأنه مو عاجبك

الاثنين

| كفتة التونة بالبطاطس |

.
.

من الأشياء اللازمة عندنا برمضان من كنا صغار .

سهله ولذيذة .

| الطريقة والمقادير مع بعض | :

حبتين بطاطس مسلوقه ومهروسه - نهرسها بالملعقة أو شوكة مو بالخلاط -

وتحطين عليهم علبة تونه - نكون مصفينها من الزيت اللي فيها - مخلوطة مع :

الأحد

| دجاج بالزبدة مع رز بالزعفران |

وحدة من البنات طلبت مني أحط طريقة عمل رز بالتفصيل ..

وسوينا اللي تبي =)

| الطريقة والمقادير مع بعض | :

نسلق دجاجة كاملة مع :

- ربع حبة فلفل أخضر بارد

- 5 حبات مسمار " قرنفل "

- 5 حبات هيل

- 5 حبات فلفل أسود

- عود قرفة , متوسط الحجم

- فص ثوم

- مكعب واحد ماجي

- شوي كزبره مفرومه

- ورقتين غار

- شوي زعفران

نسلقها لمدة 40 إلى 45 دقيقة .

بعد ما تنسلق نشيل الدجاجه ونحطها بصينية للفرن وندهنها بهالخلطة :

[ ملعقة كبيرة زبدة نذوبها | ملعقة كبيرة صوص الـ hp | نص ملعقة صغيرة بهارات مشكلة | شوي من البقدونس المجفف ]

* البقدونس اختياري

مثل كذا :

وندخلها الفرن تتحمر

الحين نروح نغسل الرز وننقعة في موية مدة 20 دقيقة .

بعد هالخطوه نروح لموية السلق اللي سلقنا فيها الدجاج ونشيل منها الفلفل والقرفة والهيل .. وباقي البهارات الصحيحة الثانية اللي حطيناها .

ونحط الرز عليها - طبعاً بعد مانصفية من الماي اللي نقعناه فيه -

ونضيف عليه موية لما يبدى يغطي الرز شوي مثل كذا :

هنا الماي ماتحسونه مغطي الرز لأنه كان يغلي .. بس هو مغطيه شوي .

ونخليه لما يستوي وينشف الماي منه .

ونقدمة مع الدجاج والبطاطس المقلي .

السبت

| حلا التويكس والجالكسي |

.
.

من الحلويات اللازمة برمضان عندنا ..

فوق الـ 10 سنين واحنا نسويه كل رمضان ,

سهل وما ياخذ وقت .

| الطريقة والمقادير مع بعض | :

أول شي نجيب كيك شوكولاته ونقطعه لشرايح متوسطة العرض .

ونصفها في الصينية اللي بندخلها الثلاجة ..

وبعد ما نصف الكيك نضغط عليه عشان يتماسك مع بعض .

وبعدها نسوي الطبقة الثانية :

بالخلاط نخلط :

- علبتين قشطة - مثل التاج وغيره , بس لا تستخدمون قيمر لأنها ثقيلة وبيصعب الخلط -

- ظرف كريم كراميل

- ظرف دريم ويب

- 4 أصابع تويكس

- جالكسي واحد

وبعد ما نخلطها نصبها شوي شوي على الكيك وندخله الثلاجة أقل شي 5 ساعات .

والأفضل نخليه ليلة كاملة عشان يتماسك أكثر .

وعند التقديم نبشر جالكسي ونقدمه .

الجمعة

| لفائف التوست |

.
.

سهله وبسيطة ونفع كطبق جانبي برمضان .

أخذت فكرتها من خزامى الله يجزاها خير .. الإختلاف كان بالحشوة بس .

| الطريقه والمقادير مع بعض | :

أول شي نقلي أصابع الدجاج - ماركة أمريكانا -

وبعد مانقليها نحطها في صحن عليه منديل عشان يمتص الزيت .

الحين نجيب التوست ونقطع أطرافه ونفرده .. وممكن نستخدم آله المطازيز اللي تفرد بس بدون مانشغلها طبعاً .

وناخذ حبة التوست وندهن نصها بصوص بيتزا - دهنته بنفس الصوص اللي استخدمته بسمبوسة البيتزا -

* إذا ماتوفر عندك إدهنيه بأي صلصة بيتزا سواء منزليه أو جاهزه .

ونحط فيه حبة دجاج وشوي جبن - استخدمت تشدر وموزريلا -

ونلفها ونسكرها بخلطة الطحين والماي - مثل السمبوسة -

ونحطها بصينية للفرن وندهن التوست من جميع الأطراف بـ :

[ ملعقتين كبيره زيت زيتون | ثلاث ملاعق كبيره كاتشب | ملعقه كبيرة شطة | رشة نعناع مجفف ]

* النعناع المجفف اختياري .

مثل كذا :

* ملا حظة مهمة :

لا تلصقونها ببعض مثل الصورة .. أنا بعدين فرقتهم ,

لأن لو لصقتوها ببتمسك في بعض وصعب تفرقينهم عن بعض بعدين بدون ماتخربين شكلهم .

وندخلها الفرن ربع ساعه تقريباً وبعدين نحمرها شوي من فوق .

ونقطعها بالنص ونقدمها

الخميس

| كريم كراميل بالفرن | .. وكل عام وأنتوا بخير

.
.

كل عام وأنتوا بخير ,

بمناسبة حلول شهر رمضان حبيت أشاركم بشي من الحلويات المفضلة عند أهلي برمضان

وهي الكريم كراميل بالفرن .

سهله ولذيذة .. وخلوا عنكم الجاهز بس :p

بحط هالطريقة التقليدية اللي دايم نسويها ..

وبعد كم يوم بحط طريقة جديدة بإذن الله .

| الطريقه والمقادير مع بعض | :

نخلط بالمضرب اليدوي :

[ 3 بيضات | فنجانين سكر ( =7 ملاعق كبيره تقريبا ) | شوي فانيلا ]

بعدين نضيف عليهم ,
- كاس ونص حليب بودرة .. - مثل النيدو وغيره -
- كاس ونص ماي ..
بحيث تكون كمية الحليب مساوية للمويه .

ونخلطهم ,
لين تصير الخلطه سائله مايله للثقل شوي مو ثقيله مره ,

الحين عشان نسوي الكراميل ..

نجيب فنجانين سكر - ممكن اكثر لو حبيتي - .ونحطهم ع نار هاديه لما تذوب وتصير سايله ,
بس مانخليه يصير بني مره عاد .

- كل ماصار أغمق كل ما صار مر -

الحين نصب الكراميل بصينية الفرن ونحرك الصينية لما تتغطا من تحت كلها وعلى الجوانب .
ونحطها في صينية أكبر منها فيها ماي مغلي عشان بنسوي حمام مائي

الحين نصب على الصينية اللي فيها الكراميل خليط الكريمه اللي سويناها شوي شوي .

ونخليها بالفرن ساعه الا ربع على درجة حرارة 350

المفروض بعد نص ساعه تدخلين السكين وتشوفين .
لأن ممكن تستوي معك قبل الساعه الا ربع - حسب الفرن -

عاد لما تستوي
نطلعها من الفرن ونخليها تبرد شوي , وندخلها الثلاجه اقل شي 4 ساعات والأفضل انها تطول أكثر .

ونقلبها ونقدمها .

الأربعاء

| cheese and jalapeno mini rolls |

.
.

| ميني رولز الجبن والهلابينو |

للي يحبون الأكل الحار :p

| الطريقة والمقادير مع بعض | :

مايبيلها غير عجينة سبرنق رول نقطعها لـ 4 مربعات - عشان يصير حجمها صغير -

لو كنتوا تبونها كبار لا تقطعونها لـ 4 مربعات , وبيني وبينكم كذا أريح :p

الحشوة عبارة عن :

- شرايح هلابينو مقطع لقطع صغيره

- جبن تشدر مبشور

( مثل المستخدمة بسمبوسة البيتزا )

- جبن موزاريلا مبشور

نقلبهم على بعض ونحاول واحنا نقلب نقتت الجبن أكثر شوي عشان يمدينا نحشي فيه الميني رولز

أما إذا كنتوا بتسوونها بحجم كبير ماله داعي تفتتونها .

بعدين نجيب عجينة السبرنق رول ونحط الحشوه على الطرف ونلف البدايه .. ونحط بالباقي الخليط اللي نسكر فيه السبرنق رول بالعادة وهو عبارة عن ( طحين وماي .. نخلطهم مع بعض بحيث يعطينا خليط ثقيل )

مثل هالصوره

بعدين نسكر الأطراف مثل هالصورة ونحط بالأطراف اللي بنسكر فيها بعد خليط الطحين والماي .

سوينا هالخطوتين عشان نضمن إنها ماتنفتح علينا وتحوسنا ,

ونحفظها بالفريز عشان يجمد الجبن ونقدر نقليه بدون مايذوب على طول ويطلع من الأطراف .

وبعدين نقليه ونقدمه مع صوص - نفسه اللي استخدمته بسمبوسة البيتزا -

* ملاحظة :

- حاولو ماتكثرون الحشوه بشكل كبير لو بتسوون الميني رولز عشان لا تنشق العجينه عليكم من الاطراف وانتوا تلفون .

.
.

الأحد

| صينية الدجاج بالخضار |

.
.

| الطريقة والمقادير مع بعض | :

هي عبارة عن طبقتين وفوقهم صوص ..

طبقة خضار فوقها طبقة دجاج

الخضار أنا في هذه الصينية أحطها مسلوقة ,

اللي حاب يحط مقليه شي راجع له بس المسلوقة أخف وأصح .

أول شي نقطع الخضار اللي نبيها لقطع متوسطة - أقرب للكبيرة - ونسلقها مع مكعب ماجي ,

أنا حطيت : بطاطس | جزر | كوسا | فطر

مرات كثيرة أستغني عن الكوسا .

* الفطر المعلب مايحتاج ينسلق .. أضيفية بعد مايستوون معاهم

نخليهم ع النار من نص ساعة إلى ساعة إلا ربع تقريباً .

بعدها نصيفهم ونحتفظ بموية السلق .

الحين نسوي حمسة الدجاج .

أول شي نحمس بصلة متوسطة مقطعة لمكعبات صغيرة .مع شوي زيت لما تذبل نضيف عليها مكعب ماجي .

بعدها نضيف عليها صدور دجاج مقطعة مكعبات متوسطة . - استخدمت 3 صدور -

ونقلبها لما تستوي ونحط عليها ملعقة صغيرة بهارات وشوي فلفل أسود ونقلبها لما تتحمر شوي .. نضيف عليها كزبرة طازجة مفرومة وربع حبة فلفل أخضر بارد مقطعه مكعبات ونقلبها دقايق .

الحين نجهز الصوص ,

عبارة عن :

علبتين قشطة - استخدم التاج -

ملعقتين كبيرة خردل

شوي فلفل أسود

نخلطهم مع بعض لما يتجانسون .

الحين نجيب الصينية اللي بندخلها الفرن ونحط الخضار فيها كطبقة أولى

ونجيب ربع كاس تقريباً من موية السلق ونخلط معاه 3 ملاعق كبيرة من الصوص ونصبها ع الخضار .

- حبيت أضيف موية السلق عشان أغلب فوائد الخضار نزلت فيها -

بعدين نحط الدجاج عليها :